-Коронавирусээс болгоомжилж Хятад руу зорчихоо байя, мөнгөө бэлэглэж, мөнгөө Монголдоо үлдээе-

Коронавирусын халдвар газар авч, Номтойбаярыг огцруулна гэсэн дуулиан оволзож, Тогтохсүрэнгийн казинодсон нам гүмжиж байх энэ үед олон нийтийн бүхий л үйл ажиллагааг хаасан мөртлөө Төрийн ордонд үзэсгэлэн худалдаа зохион байгуулж байна. Улс төрийн өнцгөө зөв олж хараагүй уйтай хоногууд өнгөрсөөр. Азийн цагаан сар болох энэ өдрүүдэд шинэ аюулт нян тархаж юун баяртай л юм болж байна. Цагаан сарыг монголчууд маань маш өргөн дэлгэр тэмдэглэдэг ард түмэн. Ямар ч их зуд турхан, өвчин зовлон тохиосон “Монгол хүн билгээрээ” гээд сар шинээ сайхан тэмдэглэнэ л гэцгээх бий вий. Манай medee.mn сайт “Коронавирусээс болгоомжилж Хятад руу зорчихоо байя, мөнгөө бэлэглэж, мөнгөө Монголдоо үлдээе” гэсэн уриалга гаргасныг Монголын бүх цахим сайт дэмжиж, бичсэн бичвэр маань дэлхий даяар тархан шайрлэгдлээ. Тиймээс бид энэ л санаагаа ахин сөхөж та бүхэнд хүргэхэд илүүдэх юун гэж бодлоо.

Хаврын эхэн сарын шинийн нэгэн цагаан сарын баяр юу юугүй хаяанд хүрээд ирлээ. Золголт хийхээр ирэх зочин гийчиндээ ямар бэлэг бэлдэх билээ гэж гэргий нар үглээд эхэллээ. Аавдаа, ээждээ, ахдаа, эгчдээ, дүүдээ юу өгөх вэ гэж тархиа гашилгаж байна. Монголчууд бид бэлэг гэхээр л юуны түрүүнд Эрээний оймс, хямд тамхи бодоод явчихдаг. Гоо сайхны бараа авч өгье гэхээр хугацаа нь дуусчихсан ч юм уу, эсвэл хэт үнэтэй болчихдог. Хүнсний бүтээгдэхүүн өгье гэхэд захын хүүхдүүд үнэндээ тоохоо байсан. За, тэгээд айлын хүүхдэд боов чихэр өгөөд сууж байх нь настангуудад ч гээгдсэн заншил.

Ханиад томуутай ид улирлын энэ үед хайртай үрстээ нян халдвар тээсэн байх магадлалтай хүнсний бүтээгдэхүүнийг хэн л тэгтлээ ойшоох билээ. Хөгшид “Дайны үед цагаан сараар айл хэсэхэд домбон ёотон өгөөд, тэрний амттайг яриад яахав. Ул боов өвөртөлж хол саахалтуудаа хэсдэг байлаа” энэ тэр бол өнгөрсөн зуунтайгаа адил өнгөрсөн явдал болсон. Өнөөгийн бэлэн хэрэглээний ертөнцөд даавуу даалимба, торго дурдан алд алдаар дэлгэн бариад ч ашиг болоод өгөөж муутай. Өндөр настангуудыг хүндэтгэл болгож хадаг барьж болох ч тийм ч хүсүүштэй бэлгийн тооноос хэдийнэ хасагдсан гэдгийг хэнээр ч хэлүүлэлтгүй мэдэж болно. Эцэст нь ер нь яаж ч бодоод байсан үндэсний мөнгөн тэмдэгтээ л бие биедээ бэлэглэхээс сайхан гарц тэгтлээ нэг их харагдахгүй байгаа юм даа. Бидний мах цусны тасархай Өмнөд Монголчууд маань “Мөнгөө Монголдоо өгье аяныг эхлүүлж, цагаан сараар хятад биш монгол бараа авах уриалга гаргаж.

Эдийн засагч Дашзэвэг гуай ч энэ уриалгыг дэмжиж “Өвөр монголчууд Монголоос ирж бэлэг авах гэж байхад бид Эрээн, Бээжин явах хэрэггүй, мөнгөө бэлэглэцгээе” гэж жиргэсэн байна. Алгаа дэлгэн өгөхөд хөнгөн ч хамгийн оновчтой бэлэг бол ерөөсөө яаж ч бодсон мөнгө л юм даа. Улс орныхоо эдийн засгийг бодсон ч, ойр дотныхныхоо алгыг тэнийлгэхэд мөнгөнөөс оновчтой бэлэг хаа ч байхгүй гэдэгтэй хүн бүхэн л санаа нийлж уриалгыг дэмжицгээх биз ээ! Цагаан сараар мөнгө бэлэглэцгээе, цаашдаа ч мөнгө бэлэглэж хэвшицгээе!

Бид ийм уриалга гаргасан юм. Дэмжих хүн олон байгаагаас л дэлхийгээрээ нэг тараагаа бол уу. Улс төрийн суудал байдал өнцөгдсөн, өнцөгдөөгүй монголчууд цагаан сараа тэмдэглэж л таараа. Жил бүр цагаан сарын бэлгийн 80 орчим хувийг импортоор авч байгаа нь дунджаар 357 тэрбум төгрөгийн гадагшлах урсгалыг бий болгож байгааг Үндэсний статистикийн хороо гаргасан. Энэ жилийн сар шинийн баяраар улсын хэмжээнд 845 тэрбум төгрөгийн зардал гарахаар төлөвтэй байна гэж мэдээлсэн.Тэтгэврийн зээлийг тэглэх тухай хууль батлагдсантай холбоотой Сар шинийн худалдан авалт өнгөрсөн жилтэй харьцуулахад нэмэгдэх төлөвтэй байгаа. Иймээс ХХААХҮЯ-наас гадагш урсах мөнгөн урсгалыг сааруулах, дотоодын үйлдвэрийн бүтээгдэхүүний борлуулалтыг дэмжих эх оронч худалдан авалтыг зохион байгуулахаар “Үндэсний баяраараа-Үндэсний бүтээгдэхүүнээ” сарын аяныг эхлүүлж байна гэж байна. Ханиад томуу айхтар дэгдсэн энэ үед үзэсгэлэн худалдаа хэсэж дэмийрч байхаар үндэсний мөнгөн тэмдэгтээ настан буурлууддаа өргөн барьчихаад төвөггүйхэн төвшин сайхан шинэлэх нь л өлзийтэй байхыг үгүйсгэмгүй л байгаа юм даа, уг нь. Бэлэг бэлгийн дээд бэлэн мөнгөө барьж төрлөөрөө төвшин амгалан, элгээрээ энх амгалан шинэлцгээе!