ЦЕГ-ын Хар тамхитай тэмцэх газрынхан хар тамхи гэртээ хадгалсан, мансуурсан үедээ ээжийгээ зодсон гэх хэргээр жүжигчин Т.Билэгжаргалыг баривчилсан. Улмаар Хар тамхитай тэмцэх газрынхан түүний мансуурсан үедээ гаргасан зохисгүй бичлэгийг "Хар тамхи шорон эсвэл үхэл рүү хүргэнэ" гэсэн шторк болгож цахим хуудсанд цацсан юм.

Жүжигчин Т.Билэгжаргалыг өмөөрч дуучин Б.Амархүү “Би Билэгжаргалын зовлонг биеэрээ туулсан. Тиймд нийгмээрээ түүнийг хараах биш, ойлгож, уучлах ёстой. Хүн нэг алдаа л биз дээ. Залуу хүнд алдаагаа засах боломж олгоорой” гэж бичсэн мэт пост цахим ертөнцөөр аялж, хүмүүсийн эгдүүцлийг нэлээд хүргэсэн.

Хар тамхичин нь хар тамхичнаа өмөөрч, өмгөөлсөн мэт энэ мэдээлэл худал болохыг Б.Амархүү цахим хуудсаараа дамжуулан мэдэгдлээ. Тэрбээр “Худлаа мэдээлэл тараагаад байна шүү. Билэгжаргал гээд залууг өмөөрсөн зүйл огт байхгүй шүү. Ээждээ гар хүрэх битгий хэл ширүүн дуугарах эрх ч байхгүй бид нарт.

Миний бие хар тамхинд донтсон хэрэглэгч залуусыг эмчлэх, сэтгэл зүйч нийгмийн ажилтан гээд бүхий л зүйлийг судалж, эмчилж буруу зуршлаас салахад нь туслах ажлыг хийсээр байх болноо үүнийг л ойлгож авсан” гэжээ.

Дуучин Б.Амархүү сэтгэцэд нөлөөт бодисыг хууль бусаар бэлтгэсэн, хадгалсан гэх хэрэгт анхан шатны шүүхээс хоёр жилийн хорих ял авсан ч давж заалдах шатны шүүхээс түүнийг үндсэндээ цагаатгаж "толгойг нь илсэн" юм.

Тэрбээр ”Монголчуудаасаа уучлалт гуймаар байна. Дахиж би ийм зүйлд огт орооцолдохгүй. Цаашдаа олон уран бүтээл хийж зүтгэж ажиллах болно. Хамгийн гол нь ийм урт хугацаанд намайг шүүмжилж, өмөөрч байсан бүх хүмүүст баярлалаа. Би огт гомдоогүй. Би цаашдаа хар тамхи, мансууруулах бодисын эсрэг "Эрүүл Монголын төлөө" хөдөлгөөнд нэгдэнэ” хэмээн ам тангараг өргөсөн байдаг юм.