Иргэн Г.Буяндорж Ерөнхийлөгчийн Тамгын газрын дарга З.Энхболдод “Нэр бүхий шүүгч, прокурорын авлига авсан баримт" гэх 65 хуудас материалыг өчигдөр гардуулан өгч хууль хяналтын байгууллагаар шалгуулах хүсэлтээ гаргасан. Иргэдээс төрийн байгууллага, албан тушаалтанд гаргасан өргөдөл, гомдлыг шийдвэрлэх тухай хуулийн 13 дугаар зүйлийн 2-т заасны дагуу иргэн Г.Буяндоржийн өргөдөл, гомдлыг Монгол Улсын Ерөнхий Прокурор, Төрийн хууль цаазын тэргүүн зөвлөх Б.Жаргалсайхан, Авлигатай тэмцэх газрын дарга, Тэргүүн комиссар З.Дашдаваа нарт “Гомдол шилжүүлэх тухай” албан бичгээр шилжүүлж, иргэний гомдлыг зохих журмын дагуу судлан шийдвэрлэж, хариу өгөхийг хүсэв гэж Ерөнхийлөгчийн хэвлэлийн албанаас өнөөдөр мэдээлсэн.

Харин үүнтэй холбоотойгоор УЕПГ-аас мэдэгдэл гаргажээ. Уг мэдэгдэлд “Улсын Ерөнхий Прокурорын газраас холбогдох асуудлыг мөрдөн шалгах ажиллагаа явуулах эрх бүхий байгууллагаар шалгуулахаар шийдвэрлүүлээд байна. Тус мэдээлэлд нэр дурдагдсан П.Халиун нь 2015 онд Прокурорын байгууллагаас чөлөөлөгдсөн болно. Улсын Ерөнхий прокурорын сахилга, хариуцлагыг дээшлүүлэх, ёс зүйн дүрэм журмыг нэг мөр хэрэгжүүлж ажиллахад анхаарч ажиллаж байгаа болохыг мэдэгдэж байна” гэсэн байна.