“Уртцагаан” ахуйн үйлчилгээний төвийг түрээслэгч нарт нь давуу эрхээр хувьчлах шийдвэрийг анх 2007 онд Нийслэлийн Засаг даргын Тамгын газраас гаргаж байсан боловч өнөө хэр хэрэгжээгүй аж. Ахуйн үйлчилгээний сүүлийн ганц төв болох Уртцагааныг хувьчлуулахаар түрээслэгчид нь шаардлага, хүсэлтийг төр, засгийн бүхий л шатанд удаа дараа хүргэж байсан ч ямар нэгэн нааштай хариу авсангүй өдий хүрч. Сүүлийн үед өмнөх хувьчлах тогтоолыг үл ойшоож, Уртцагааны түрээслэгч нарыг байрнаас нь хөөн гаргаж, барилгыг нь нураах шийдвэр гаргасан байна. Иймд Уртцагааны 800 гаруй түрээслэгчид дөнгөж сая хуралдаж, хувьчлалын шийдвэрийг хэрэгжүүлэхийн төлөө хатуухан тэмцлийг эхлүүлэхээр шийдвэрлэсэн байна.

Тэд өөрсдийнхөө төлөө нэгдэж, төрийн гурван өндөрлөгт хатуу шаардлага хүргүүлэхээр болжээ. Мөн “Хотын өв соёлыг шат дараатай устгаж буй” хэмээн үзэж Нийслэлийн Засаг дарга С.Амарсайханыг огцруулах тэмцлийг эхлүүлэх юм байна. Хэрвээ тэдний шаардлагад тодорхой хариу өгөхгүй бол Нийслэлийн Засаг даргын Тамгын газрын өмнө жагсаал, цуглаан зохион байгуулан өлсгөлөн зарлаж, тэмцлийн бүхий л хатуу хэлбэрийг сонгоно гэдгээ илэрхийллээ. Уртцагааны түрээслэгчдийн энэхүү тэмцэл нь энэ хаврын улстөрийн хамгийн халуун цэг болох бололтой.

Нийслэлийн төв хэсэгт байрлах Уртцагаан үйлчилгээний төв нь анх 1962 онд хувийн хоршоологчдын хөрөнгөөр барьсан анхны хувийн өмч аж. Энэхүү барилгыг өдгөө 800 гаруй түрээслэгч түрээслэн, ахуйн үйлчилгээний үйлчилгээг ард түмэндээ үзүүлж байгаа. Гадна, дотор завсар, үйлчилгээг түрээслэгч нар өөрсдийн хөрөнгөөр хийх хүсэлтийг удаа дараа гаргасан боловч НЗДТГ-аас хориглосоор байдаг аж. Улмаар албаар өнгө зүсийг нь доройтуулж, ашиглалтын чанар муудсан гэх үл ялих шалтгаанаар нураахыг МАН эрх барьж байх хугацаандаа үеийн үед санаархаж байсан гэв. Барилгын чанар, үзүүлэлтийн талаар мэргэжлийн хүмүүс хамгийн сайн чанартай төдийгүй актлах шаардлагагүй гэж үздэг байна. Уртцагааны барилга нь манай улсын архитектурын өнгө төрхийг тусгасан, үнэт дурсгал тул Азийн архитектурын үнэт өвийн жагсаалтад 2015 онд орсон барилга гэнэ.