БНСУ-ын Намъянжу хотод 35 настай монгол иргэнээс коронавирусын халдвар илэрч, өвчтөнийг Сөүлийн Үндэсний их сургуулийн "Пундан" эмнэлэгт тусгаарлан эмчилж байгаа талаар тус улсын зарим хэвлэлд мэдээлсэн. Энэхүү мэдээллийг Монгол Улсын Эрүүл мэндийн яамнаас албан ёсоор баталгаажуулаад байгаа ба түүнтэй хамт явсан эхнэр, эгч нараас халдвар илрээгүй гэдгийг мэдэгдээд байгаа билээ.

Эх сурвалжийн мэдээллээр, коронавирусын халдвар авсан дээрх эрэгтэй нас барсан тухай мэдээлэл ирүүлсэн. Гэвч тун удалгүй мэдээллийг залруулж, иргэн нас бараагүй, гэхдээ биеийн байдал нь маш хүнд байгаа гэлээ.

Монгол Улсын иргэн 35 настай эрэгтэй А нь элэгний архаг үрэвсэл гэх оноштойгоор тус улсад эмчлүүлэхээр хоёрдугаар сарын 12-ны өдөр БНСУ-ыг зорьсон бөгөөд ОМ-302 онгоцоор зорчсон байна. Улмаар тус улсад очсон даруйдаа дүүргийн эмнэлэгт хэвтэн эмчлүүлж байсан бөгөөд элэг шилжүүлэн суулгах хагалгааны өмнө шинжилгээнд хамрагдаж, хариугаа өчигдөр авжээ. Уг шинжилгээгээр өвчтөний коронавирусын халдварын онош эерэг гарч, онош батлагдсан байна.