Коронавирусийн дэгдэлт буурахгүй байгаа хүндхэн үед хот хоорондын хөдөлгөөний хязгаарлалт дуусаж байна. Хөдөөнөөс хот руу ирэх дөч тавин мянган хүн, арван дөрвөн мянган тээврийн хэрэгсэл байгаа гэж байна. Зарим иргэд нас барсан хүний гэрчилгээ ашиглаж хот руу орж ирэх сэдэл гаргасан ч гэх шиг элдэв юм дуулдаж л байна. Халдварын голомттой БНСУ-аас ирэгсэд Казахстан, Буриад, ОХУ-аар дамжин хойд хилээр орж ирэн тусгаарлагдаж байна. Зарим нь асуумжаа буруу бөглөсөн ч тохиолдол гарав. “Тураг ядрахаар уулаа, хүн ядрахаар ургаа барааддаг” гэсэн бичигдээгүй хууль бий. Тэгэхээр гадаадад ажиллаж, амьдарч байсан монголчууд маань ирэлгүй л яахав.

Өвчин зовлон гарсан хүний нутагт үйлдвэр үйлчилгээ нь зогсчихоор тэнд юугаа хийж хуйхаа маажиж суух вэ. Солонгост бараг тавиад мянган монгол иргэн аж төрдөг гэж байгаа. Цагаан сараас хойш нааш харьж ирээд ирээд үсрээд мянга гаруй нь л гэрийн бараа харсан байх. Зарим нь ч тусгаарлах байранд туршилтын амьтан шиг ажиглагдаж байгаа. Аюулт өвчин юу юугүй тавь жаран оронд тархаад байхад ажиглуулахгүй гээд ч яахав. Төр засгийн хууль, эрүүл мэндийн байгууллагынхны зөвлөмжийг дагах нь зүй. За ингээд, хөдөө гадааны зам харгуй ч яахав хөдөлгөөнд ороод дотооддоо болоод явчихлаа гэж бодъё.

Гэтэл, БНСУ-аас эх орондоо ирэх иргэдийн захиалга хэдэн зуугаар тогтохгүй олон байгаа тухай холбогдох байгууллагынхан ярьж эхэллээ. Лав л хоёр гурван мянга, бүр дөрөв таван мянгаар ч тогтохгүй юм дуулдав. "БНСУ-аас дотоод, гадаадын нийт 6200 иргэн Монголд ирэх хүсэлтэй байгаагаа илэрхийлжээ. Тэд гуравдугаар сарын 11-нд нислэг нээхээр Улаанбаатарт ирэхээр “МИАТ”, “Корейн эйр”, “Азиана Эйрлайнс”, “Эйр Пусан” гэсэн дөрвөн авиа компанид нислэг захиалсан байна" гэсэн мэдээлэл ч байна. “Эргэж уулзахад ээж сайхан” гэдэг шиг эх оронтой улс эх нутагтаа ирэлгүй яах вэ. Харин ч аль болох хурдан ирэх хэрэгтэй. Энд байгаагийнх нь ч элэг дэвтэнэ. Тэндээс ирэгсдийн ч тэмүүлсэн сэтгэл амарна. Хамгийн гол нь нэг л юм үүнд садаа болох шинжтэй. Тэр юу вэ гэвэл өвчний голомттой улс орноос ирэгсдийг бүгдийг шинжилгээнд хамруулж, ажиглаж, тусгаарлаж олон хоног болох улсын маань эдийн засгийн чадамж юу билээ. Мянга мянгаар нь тусгаарлаад, эмчлээд байж чадах уу гэсэн яах аргагүй бэрх асуулт урган гарч ирэх нь зүй ёсных юм даа.

Наашаа ирнэ гэсэн иргэдээ хүлээж авах нь улс орны өмнө тулгарсан шаардлага, иргэдийн хувьд ирэх нь хүний эрхийн зайлшгүй чухал асуудал. Харин өвчин зовлон чирээд ирвэл хүн төрөлхтөнтэй хөл нийлүүлэн яваа монгол үндэстнээ баллах аюул. Үндэсний аюулгүй байдлын зөвлөл, Улсын онцгой комиссынхон үүний төлөө санаагаа чилээж суугаа нь тодорхой.

Монгол Улсын Шадар сайд, Улсын онцгой комиссын дарга Ө.Энхтүвшин коронавирусийн эсрэг хийж, хэрэгжүүлж буй ажлынхаа талаар өнөөдөр танилцуулахдаа “Би өглөө босоод Хятад, Солонгост вирусийн тархалт хэдээр нэмэгдэв, дэлхийд хэд хүрэв гээд хамгийн түрүүнд тоог харж байна. Тархалт огт буурахгүй байна. Солонгост гэхэд өчигдөр 2500 гаруй байсан бол өнөө өглөөний байдлаар 4210 болж нэмэгдлээ. Тэнд манай улсын 49 мянга орчим иргэн бий. Монголдоо ирэх хүсэлтэй байгаа. БНСУ, Япон, Иран, Италиас ирж байгаа хүмүүсийг Замын-Үүд, Буянт-Ухаа, Алтанбулаг боомтоор л авч байна. Хэрэв халдвартай хүн ороод ирвэл бидэнд туршлага байхгүй. Тиймээс оруулж ирэхгүй байхад бүх анхаарлаа хандуулж байна. Монголынхоо онцлогийг бид бүгд мэднэ. Тиймээс оруулж ирэхгүй байя. Орж ирсэн нөхцөлд бэлэн байдлыг хангасан байя гэж ажиллаж байна" гэж байсан.

Бодит байдал ийм байхад цаашид үнэхээр хэцүүднэ л дээ. Юутай ч хилийн чинадад нисэхийн тийз захиалаад хэдэн мянгаараа дугаарлаж буй монголчууд чинь хорио тавигдсан өдөр л юу юугүй нисэж ирэхээр бөөгнөрөөд байна. Ирэх иргэд маань ч хариуцлагатай байж, асуумжаа үнэн зөв бөглөж, ариун цэврээ сахьсан шиг сахихгүй бол, төр засаг маань оновчтой шийдвэр гаргаж иргэдээ цөөн тоогоор авчрахгүй бол коронавирусийн аюулт халдвар нэг л тархвал тогтоон барихад хэцүү гэдгийг хаа хаанаа ухамсарлаж буй биз ээ.