Улсын онцгой комиссын шийдвэрийн дагуу Улс, хот хоорондын зорчигч тээвэр, суудлын галт тэрэг болон орон нутгийн хуваарьт нислэг, тээврийн хэрэгслийн зорчих хөдөлгөөнийг 2020 оны гуравдугаар сарын 03-ны өдрийн 06.00 цагаас нээхээр болов. Үүнтэй холбогдуулан Улаанбаатар хотын долоон шалган нэвтрүүлэх цэгт Онцгой байдал, Мэргэжлийн хяналт, Эрүүл мэндийн байгууллагаас 130 гаруй хүн нэмэлтээр ажиллаж байна. Мэдээ.мн Эмээлт шалган нэвтрүүлэх товчооны тээврийн хэрэгслийн хөдөлгөөний нөхцөл байдал ямар байгааг Тээврийн цагдаагийн албаны Урьдчилан сэргийлэх хэлтсийн мэргэжилтэн, цагдаагийн ахлах дэслэгч Ч.Чимэдбатаас тодрууллаа.

2020 оны гуравдугаар сарын 3-ны өдөр. 10 цаг

Ч.Чимэдбат: “Улсын онцгой комиссын шийдвэрийн дагуу 2020 оны гуравдугаар сарын 3-ны өглөөний 6:00 цагт улс орон даяар тээврийн хэрэгслийн хөдөлгөөнийг нээсэн. Үүнтэй холбоотойгоор Сонгинохайрхан дүүргийн нутаг дэвсгэр, 22-ын товчооны замд орон нутгаас чиглэсэн 20 орчим тээврийн хэрэгсэл нэвтрэх цагаа хүлээгээд бүртгэлд хамрагдаж, асуумж бөглөсөн. Орон нутгаас нийслэл рүү орсон хөдөлгөөн одоогийн байдлаар хэвийн байна. Өдөр болон үдээс хойш хөдөлгөөний ачаалал нэмэгдэх хандлагатай. Нийслэлээс орон нутаг руу гарч байгаа тээврийн хэрэгслийн хөдөлгөөний ачаалал их байна. Орон нутаг руу гарч байгаа нийт жолооч нарт анхааруулж хэлэхэд нийслэл хотоос баруун тийшээ 90 орчим км яваад Атар хүртэлх 40 км замын зорчих хэсэгт мөсөн бүрхүүл тогтсон, гулгаатай, зорчих хэсэг хүндрэлтэй байна. Иймд тээврийн хэрэгслийн хурдаа тохируулан явах шаардлагатайг цагдаагийн байгууллагын зүгээс анхааруулж байна.

Улсын хэмжээнд нийт 98 цэгт хяналт, шалгалтын постыг байрлуулсан

Энэ үед Цагдаагийн байгууллага өндөржүүлсэн бэлэн байдалд бүрэн бүрэлдэхүүнээрээ ажиллаж байгаа. Улсын хэмжээнд нийт 98 цэгт хяналт, шалгалтын постыг байрлуулсан. Байнгын 62, нэмэгдлээр 36 постыг байрлуулсан байна. Түүнчлэн тээврийн хэрэгслийн ачаалал нэмэгдээд эхлэхээр зам тээврийн осол нэмэгдэх хандлагатай байдаг. Үүнээс урьдчилан сэргийлэх чиглэлээр орон нутгийн замд хөдөлгөөнт байдлын хяналт шалгалтыг зохион байгуулан ажиллаж байна. Мөн зөөврийн хурд хэмжигчийг олон газар ойрхон зайтай байрлуулсан. Иймд жолооч та бүхэн замын хөдөлгөөний дүрмээ зөрчихгүй байх, бага насны хүүхдийг хамгаалах суудалд суулгах, ядарсан буюу нойр дутуу үедээ тээврийн хэрэгсэл жолоодохгүй байхыг анхааруулж байна. Мөн зам тээврийн хөдөлгөөнд жолоочоос гадна оролцож байгаа иргэд тухайн тээврийн хэрэгсэл бүрэн бүтэн байгаа эсэхийг шалгах, жолоочид анхаарал, хяналт тавьж, өөрийнхөө болон бусдын аюулгүй байдлыг хангаж хөдөлгөөнд оролцох шаардлагатай. 22-ын товчоон дээр эрүүл мэндийн байгууллага, цагдаагын байгууллага, Онцгой байдлын ерөнхий газар, МХЕГ гэсэн дөрвөн байгууллага иргэдийг үзлэг шинжилгээнд хамруулах зэрэг ажлыг зохион байгуулж байна.

“Ядарсан, нойр дутуу үедээ тээврийн хэрэгсэл жолоодохгүй байх нь хамгийн чухал байна”

-Нийслэл рүү орж байгаа жолооч нарт шаардлага тавилт болон хүлээж авах байдал ямар байна вэ?

-Одоогийн байдлаар төрийн байгууллага болон цагдаагийн байгууллагын алба хаагчдын хууль ёсны шаардлагыг биелүүлэхгүй байгаа тохиолдол байхгүй байна. Нийт жолооч нарын хувьд бага насны хүүхдийг буруу тээвэрлэж байгаа, жолооч нь ядарсан нөхцөл байдал ажиглагдаж байна. Иймд ядарсан, нойр дутуу үедээ тээврийн хэрэгсэл жолоодохгүй байх нь хамгийн чухал байна.

Зам нээснээс хойш нийслэл хот руу 300 орчим тээврийн хэрэгсэл нэвтрээд байна

- Өглөө 6:00 цагт Улаанбаатар хот руу орох, гарах хөдөлгөөнийг нээлээ. Нийт нэвтэрсэн болон гарсан тээврийн хэрэгсэл одоогоор хэд орчим байна вэ?

-Зам нээснээс хойш нийслэл хот руу 300 орчим тээврийн хэрэгсэл нэвтэрсэн байна. Нийслэл хотоос орон нутаг руу мөн адил 300 орчим тээврийн хэрэгсэл гарсан байна. Өдөр болон үдээс хойш хөдөлгөөний ачаалал нэмэгдэх хандлагатай. Ойрын өдрүүдэд орон нутагт цас орж, цасан шуурга шуурах төлөвтэй байгаа тул хулгайн замаар хөдөлгөөнд оролцохгүй байхыг анхааруулж байна.

Д.Ууганбаатар