Хаа сайгүй хүмүүс хүнсний нөөцөө базааж эхэлсэн энэ цаг үед нөөцийн махны асуудал өрнөсөн нь зүй хэрэг. Учир нь, энэ жилийн нөөцийн махыг гуравдугаар сарын 9-нөөс дэлгүүрүүдээр зарж эхэлнэ гэж урьд нь мэдээлж байсан ч, товлосон хугацаа болчихоод байхад нөөцийн махгүй сууж байгаа нь иргэдийг эмээхэд хүргэсэн юм. Тиймдээ ч, өчигдрийн Нийслэлээс хийсэн ээлжит мэдээллийн үеэр иргэд энэ талаар их сонирхож байсан. Иргэдийн асуултад “Нөөцийн махны хувьд 13 000 орчим тонн махыг бэлтгээд, бүгдийг хөрөөдөж, савлах ажлыг хийгээд явж байна. Уг нь нөөцийн махыг гуравдугаар сарын 9-нөөс зарж эхлэх ёстой байсан. Гэтэл мах савлах уут савны асуудлаас болж, хугацаа алдсан тал бий. Тиймээс өнөөдөр 15 цагаас нийслэлийн хэмжээнд 279 дэлгүүрт 2-3 кг-аар савласан албан ёсны уут савтай нөөцийн махыг борлуулж эхэлнэ. Зарим савлагааны ажил саатсанаас болж хүндрэл үүсэх магадлалтай учраас ингэж хүлээсэн гэдгийг хэлэх байна. Нэг хороон дээр 1-3 дэлгүүрт нөөцийн мах борлуулна” гэж хариулж байсан. Үнэхээр ч хэлсэндээ хүрч өчигдрийн үдээс хойшоос эхлээд нөөцийн мах зарж эхэлсэн ч эхний ээлжинд ирсэн мах тэр дороо дуусч байсан нь нийслэлийнхнийг бас цухалдуулаад амжсан.

Монгол Улс махны нөөцөө хэр базаасан бэ?

Цагийн байдалтай холбоотой ийм асуудал урган гарна. Тэгвэл Салбарын сайд нь ингэж хэлж байна.

ХХААХҮ-ийн сайд Ч.Улаан “Өнөөдрийн байдлаар улсын нөөцөд 12 мянган тонн мах нөөцөлж бэлдсэн байна. Энэ нь дөрвөн сарын хэрэгцээгээ хангана гэж тооцвол сар тутам 3,000 тонн, нийслэл хотын өдрийн хэрэгцээнд 100 тонн нөөцийн махыг бэлдэн нийлүүлэх нөхцлийг бүрдүүлж чадсан хэрэг.

Өнгөрсөн жил махны хангамжийн асуудлаар иргэд бухимдаж байх үед өдөрт 60-70 тонныг л гаргаж чадаж байсан юм. Харин энэ жил махны нийлүүлэлтийг хоёр дахин нэмэгдүүлэх нөхцөл бүрдсэн байгаа.

Түүнчлэн манай улсын нөөцөд тооцох боломжтой өөр нөөцөлсөн мах бий. Тэр нь юу вэ гэхээр, манай улсын 60 гаруй аж ахуйн нэгж экспортод гаргах зориулалтаар 12 мянган тонн мах бэлдсэн байгаа. Энэ нь импортлогч орны итгэмжлэгдсэн үйлдвэрт бэлдээгүй учир экспортод гаргах боломжгүй болсон юм. Тиймээс тэр хэмжээний махыг экспортод гаргалгүй дотоодын зах зээлд борлуулах боломжтой. Бид тухайн аж ахуйн нэгжүүдэд Монголынхоо зах зээлд борлуулахад нь хамтран ажиллах санал тавьсан байгаа. Иймд энэ хавар махны хангамж дээр тасалдал, доголдол үүсэхгүй байх боломжтой. Харин жигд, тасралтгүй, шуурхай хүргэх ажлыг зохион байгуулах нь чухал" гэсэн юм.

Салбар хариуцсан сайд Ч.Улаан "Гурилын хувьд Монгол Улс өнгөрсөн жил 407 мянган тонн улаан буудай хурааж авсан. Үүнээс 246 мянган тонн нь шаардлага хангаж, гурилын үйлдвэрт тушаагдсан. Энэ бол манай улсын бүтэн жилийн гурил үйлдвэрлэх хэрэгцээний 80 хувийг хангаж буй хэрэг.

Түүнчлэн бий болсон нөхцөл байдалтай уялдуулан стратегийн нөөц зайлшгүй бий болгох нөхцлийг харгалзан үзэж, Хүнсний аюулгүй байдлын зөвлөлийн хоёрдугаар сарын 20-ны өдрийн шийдвэрээр манай улс гаднаас 100 мянган тонн удаан буудайг импортлохоор болсон. Үүнээс 90 мянга нь гурилын үйлдвэрүүдэд нөөц бэлтгэхээр ашиглагдана.

90 мянган тонн улаан буудай нь 60 мянган тонн гурил болох бөгөөд манай улсын улирлын хэрэгцээний нөөцийг бүрдүүлэх боломжтой юм" хэмээжээ.