Олон улсын галт тэрэгний зорчих хөдөлгөөнийг хориглосон шийдвэрийг дөрөвдүгээр сарын 30-ны өдөр хүртэл сунгасан. 2020 оны эхний гурван сард 574 мянган зорчигч тээвэрлэх төлөвлөгөөтэй ажиллаж байсан. Гэвч зорчигч тээврийн урсгал саарсан тул 276 вагоны 90-100 орчмыг нь ашиглаж байгаа юм байна.

ХОЁРДУГААР САРЫН 15-НЫ ӨДРӨӨС ХОЙШ ЗОРЧИГЧ ТЭЭВРИЙН УРСГАЛ БАГАССАН

Гал тэрэгний тээвэрлэлтийн талаар УБТЗ-ын Зорчигч тээврийн албаны дарга Б.Даваасүрэнгээс тодруулахад “Хоёрдугаар сарын 15-ны өдрөөс хойш зорчигч тээврийн урсгал багассан. Мөнгөн дүнгээр тооцвол, төлөвлөгөө 1.7 тэрбум төгрөгөөр тасалдсан. Энгийн үед хоногт 8500 орчим зорчигч вагоноор үйлчлүүлдэг. Харин ачаалалтай үед 13 мянга хүртэл нэмэгддэг. Тэгвэл хоногтоо 3200-3500 зорчигч вагоноор үйлчлүүлж байна. Зорчигчдыг урсгалаар нь авч үзвэл, 20 хувь нь Улаанбаатараас урагш чиглэлд, 80 хувь нь Улаанбаатараас хойш чиглэлд зорчдог” гэв.

УБТЗ-ЫН ЗОРЧИГЧ ТЭЭВРИЙН ОРЛОГО 1.7 ТЭРБУМ ТӨГРӨГӨӨР ТАСАЛДЖЭЭ

Коронавирусын халдварын тархалтын улмаас хөл хорио тогтоосноор УБТЗ-ын зорчигч тээврийн орлого 1.7 тэрбум төгрөгөөр тасалджээ. УБТЗ жил бүр 40-50 тэрбум төгрөгийн алдагдалтай ажиллаж ирсэн. Коронавирусын халдварын эрсдэлийг бууруулах зорилгоор авсан арга хэмжээний дүнд төмөр замын зорчигч болон тээврийн урсгал улам саарсан гэнэ. Өнөөдрийн байдлаар БНХАУ-аас дамжин өнгөрөх чингэлгийн транзит 102 галт тэрэгний аялал цуцлагджээ. Түүнчлэн импортын тээвэр найман хувиар орон нутгийн тээвэрлэлт 10 орчим хувиар буурсан аж.

ОРОН НУТГИЙН НҮҮРС ТЭЭВРЭЭС ЖИЛД 10 ГАРУЙ ТЭРБУМ ТӨГРӨГИЙН, ЗОРЧИГЧ ТЭЭВРЭЭС ЖИЛД 25-30 ТЭРБУМ ТӨГРӨГИЙН АЛДАГДАЛТАЙ АЖИЛЛАДАГ

Энэ талаар “УБТЗ” нийгэмлэгийн Тээвэр зохицуулалтын албаны дарга Ц.Лувсангаас тодруулахад " УБТЗ транзит тээврээс олж байгаа орлогоороо бусад алдагдлаа нөхөж ирсэн. Орон нутгийн нүүрс тээврээс жилд 10 гаруй тэрбум төгрөгийн, зорчигч тээврээс жилд 25-30 тэрбум төгрөгийн, нефть, нефтийн бүтээгдэхүүний тээврээс 2-5 тэрбум төгрөгийн алдагдалтай ажилладаг. Энэ бүх алдагдлыг транзит тээврээс олж байгаа орлогоороо нөхдөг. Коронавирусын халдвараас шалтгаалж транзит тээврийн орлого буурснаар алдагдлаа нөхөхөд хүндрэл үүсч байна. Цаашид тээвэрлэлтийг нэмэгдүүлэх чиглэлд ачаа илгээгч, зуучлалын байгууллагууд, хөрш төмөр замуудтай идэвхтэй хамтран ажиллаж богино хугацаанд тээвэрлэлтийг сэргээж хэвийн ажиллуулахад холбогдох арга хэмжээг авч ажиллаж байна.

Гуравдугаар сарын дундаас хойш транзит тээврийн урсгал сэргэж эхэллээ. Ялангуяа БНХАУ-ын зүгээс хоногийн галт тэрэгний солилцоо 5-6 галт тэрэг, урдаас ирэх ачааны хэмжээ нэмэгдэж байна. Хоногт манайхыг чиглэсэн болон дамжин өнгөрөх чингэлгийн 400 орчим транзит тээврийн мэдээллийг Хятадын талаас өгч байна. ОХУ-ын зүгээс ч гэсэн хоногийн 5-6 галт тэрэг солилцоо нэмэгдэх хандлага ажиглагдаж байгаа. Хаврын тариалалттай холбоотой тээврүүдэд онцгой анхаарал хандуулан цаг хугацаанд нь тээвэрлэх арга хэмжээг бид авч байна. Ялангуяа өргөн хэрэглээний бараа бүтээгдэхүүний тээвэрлэлт саатахгүй” гэлээ.