Цахим орчинд үйлдэгдэж байгаа хүн худалдаалах гэмт хэргийн талаар ЦЕГ-ын Урьдчилан сэргийлэх хэлтсийн чиглэлийн ахлах мэргэжилтэн, дэд хурандаа Б.Чулуунтамиртай ярилцлаа.

-ЦАХИМ ОРЧИН ДАХЬ БИЕЭ ҮНЭЛЭЛТ ЗОХИОН БАЙГУУЛАЛТТАЙ ДИЖИТАЛ ХЭЛБЭРТ ШИЛЖСЭН-

-Сүүлийн үед цахим орчинд садар самуун сурталчилж, охид эмэгтэйчүүд биеэ үнэлэх тохиолдол цөөнгүй гарч байгаа гэсэн мэдээлэл байна. Та энэ талаар мэдээлэл өгнө үү?

-Сүүлийн үед цахим орчинд зарын групп, сайтуудаар дамжуулан иргэдээс төлбөртэй зар сурталчилгаа оруулан садар самуун сурталчлах, охид, эмэгтэйчүүд амар хялбар аргаар мөнгө олох зорилгоор бусдад биеэ үнэлэх мөн сониуч зангаасаа болж энэ төрлийн гэмт хэрэг, зөрчлийн хохирогч болох тохиолдол гарч байна. Тодруулбал, цахим орчинд 30 гаран хаалттай фэйсбүүк групп нээгдэж, урьдчилгаа мөнгө авч оруулдаг секс бичлэгтэй, видео дуудлага хийж, дуудлагаар биеэ үнэлдэг эмэгтэйчүүдийн дугаар өгөх гэх мэт цахим орчин дахь биеэ үнэлэлт зохион байгуулалттай дижитал хэлбэрт шилжсэн.

Мөн зарын дагуу санхүү авна гэх охид, эмэгтэйчүүдийг клент /үйлчлүүлэгч/ нэрээр гэмт этгээдүүд олзлон авч, гар утас, мөнгө, эд зүйлийг нь дээрэмдэж, хохирогчийг нүцгэлж, дүрс бичлэг хийн тохуурхан даажигнаж, “олон нийтийн сүлжээнд байршуулна, ойр дотны, гэр бүлийн хүмүүст нь тухайн хийсэн дүрс бичлэгийг үзүүлж, биеэ үнэлэгч гэдгийг нь хэлнэ” гэх зэргээр амь нас, эрүүл мэнд, нэр хүнд, хувь хүний нууцтай холбоотой эмзэг асуудлаар нь далимдуулан өөрсдийнхөө эрхшээлд оруулан бусдад хүчээр биеийг нь үнэлүүлэх гэмт хэргийн золиос болгож байна.

-ХУУЛЬ БУСААР САУН, МАССАЖ НЭРИЙН ДООР БУСДЫН БИЕИЙГ ҮНЭЛҮҮЛЖ БАЙСАН 11 ГАЗРЫН ҮЙЛ АЖИЛЛАГААГ ЗОГСООСОН-

-Цагдаагийн байгууллагаас энэ төрлийн гэмт хэрэг, зөрчлийг таслан зогсоох чиглэлээр ямар арга хэмжээ авч байна вэ?

-Хуурамч фэйсбүүк хаягаар иргэдээс урьдчилгаа мөнгө авч, садар самууныг сурталчилсан агуулгатай бичлэг үзүүлэн дуудлагаар биеэ үнэлдэг охид, эмэгтэйчүүдийн утасны дугаарыг өгч, биеэ үнэлэхийг зохион байгуулдаг байж болзошгүй 38 этгээдийг илрүүлсэн.

Садар самуун явдалтай тэмцэх зэрэг холбогдох хуулийн дагуу хариуцлага тооцож, Харилцаа холбооны зохицуулах хороотой хамтран үйл ажиллагааг нь зогсоосон. Мөн захиалга авдаг утасны дугаар болон гүйлгээ хийдэг дансны дугаарыг хаасан.

Биеэ үнэлэх, биеэ үнэлэхийг зохион байгуулахтай тэмцэх чиглэлээр энэ оны I улиралд нэгдсэн болон хэсэгчилсэн арга хэмжээг үе шаттай зохион байгуулсан. Мөн хууль бусаар саун, массаж нэрийн доор бусдын биеийг үнэлүүлж байсан 11 газрын үйл ажиллагааг зогсоосон. Цахим орчинд дуудлагаар биеэ үнэлж байсан 98 эмэгтэйг бүртгэл судалгаанд хамруулсан.

ЭЦЭГ ЭХ, АСРАН ХАМГААЛАГЧ НАР НАСАНД ХҮРЭЭГҮЙ ОХИД, ЭМЭГТЭЙЧҮҮДИЙН ЦАХИМ ОРЧИН ДАХЬ ХЭРЭГЛЭЭНД ХЯНАЛТ ТАВИХ ХЭРЭГТЭЙ

-Цахим орчинд үйлдэгдэж байгаа гэмт хэрэгт өсвөр насныхан голдуу холбогдож байна уу?

-Монгол Улсад биеэ үнэлэх, биеэ үнэлэхийг зохион байгуулах, хүн худалдаалах, бэлгийн мөлжлөгийн гэмт хэрэг сүүлийн жилүүдэд нэмэгдэж байгаа гэсэн тоон мэдээлэл байгаа. Биеэ үнэлэгч гэх этгээдүүд нь гудамж, талбайгаас саун массаж, зочид буудал руу шилжих хандлагатай байсан бол сүүлийн үед цахим орчныг ашиглаж, дуудлагаар биеэ үнэлэх явдал ихэссэн.

ХҮН ХУДАЛДААЛАХ ГЭМТ ХЭРГИЙН ХОХИРОГЧ НЬ 18-35 НАСНЫ ОХИД, ЭМЭГТЭЙЧҮҮД

Ер нь хүн худалдаалах гэмт хэрэгт өртөн хохирч байгаа иргэдийн дийлэнх хувийг хөдөө орон нутгаас Улаанбаатар хотод сургуульд сурах, ажил хийх зорилготой шилжин ирсэн 18-35 насны охид эмэгтэйчүүд эзэлж байна. Мөн Монгол Улсын эдийн засгийн бууралт, ядуурал, ажилгүйдэл, ар гэрийн хараа хяналтгүй байдал, бэлгийн боловсрол, эрх зүйн мэдлэггүй зэрэг байдлууд шалтгаан, нөхцөл болж байна.

Мөн энэ төрлийн гэмт хэрэг нь дотоодод төдийгүй гадаад улсад хохирогч охид, эмэгтэйчүүдийг зуучлах хэлбэрээр нууц далд аргаар явагдахдаа цахим орчныг ашиглах хандлагатай байна. Тиймээс иргэд цахим орчны зохисгүй хэрэглээнээс татгалзах, аливаа эрсдэл, халдлагаас өөрийгөө хамгаалах чадвартай байх хэрэгтэй. Ялангуяа өсвөр насны охидод амар хялбар аргаар мөнгө олох сэдэл өгч, садар самуун явдалд татан оруулах замаар эмзэг байдлыг нь далимдуулан цахим сүрдүүлэг, порнографикт ашиглах, бэлгийн мөлжлөгийн зорилгоор үйлдэгдэж байна. Гэмт хэрэгт өртөж, хохирох нөхцөл бий болгож болзошгүй тул эцэг эх, асран хамгаалагч нар насанд хүрээгүй охид, эмэгтэйчүүдийн цахим орчин дахь хэрэглээнд хяналт тавих хэрэгтэй.

ЦАГДААГИЙН БАЙГУУЛЛАГАД НИЙТДЭЭ 472 ЗӨРЧЛИЙН ГОМДОЛ, МЭДЭЭЛЭЛ БҮРТГЭГДСЭН

-Энэ төрлийн гэмт хэрэг нэмэгдэх хандлагатай байна гэлээ. Нийтдээ хэчнээн хэрэг бүртгэгдсэн бэ?

-Цагдаагийн байгууллагад нийтдээ 472 зөрчлийн гомдол, мэдээлэл бүртгэгдсэн. Эдгээр гомдол мэдээллээс авч үзвэл 2017 онд нийт 106 зөрчил бүртгэгдсэнээс 106 хүнийг 7.260.0 мянган төгрөгөөр, 2018 онд нийт 201 зөрчил бүртгэгдсэнээс 248 хүнийг 15.450.0 мянган төгрөгөөр, 2019 онд нийт 154 зөрчил бүртгэгдсэнээс 173 хүнийг 11.350.0 мянган төгрөгөөр торгох арга хэмжээг авч ажилласан.

-Эмэгтэйчүүдийн биеийг цахим орчинд үнэлүүлэхийг зохион байгуулсан тохиолдолд ямар хариуцлага хүлээлгэх вэ?

- Зөрчлийн хуулиар хариуцлага тооцдог байсан. Одоо бол Эрүүгийн хуулиар нийгмийн аюулын шинж чанараар нь гэмт хэрэгт тооцож, хариуцлага хүлээлгэдэг болсон. Тухайлбал, Эрүүгийн хуульд зааснаар бусдыг биеэ үнэлэхэд зуучилсан, татан оролцуулсан бол зургаан сараас гурван жил хүртэл хугацаагаар зорчих эрхийг хязгаарлах эсвэл зургаан сараас гурван жил хүртэл хугацаагаар хорих ял шийтгэнэ.

Харин санхүүжүүлсэн, биеэ үнэлэхийг зохион байгуулсан, биеэ үнэлэхэд нь тээврийн хэрэгсэл, орон байр, бусад зүйлээр хангасан бол нэг жилээс таван жил хүртэл хугацаагаар зорчих эрхийг хязгаарлах, эсвэл нэг жилээс таван жил хүртэл хугацаагаар хорих ял шийтгэнэ. Энэ гэмт хэргийг зохион байгуулалттай гэмт бүлэг үйлдсэн бол 5-12 жил хүртэл хугацаагаар хорих ял шийтгэхээр заасан.