УИХ-ын Тамгын газар хуулиар хүлээсэн чиг үүргээ бүрэн хангалттай хэрэгжүүлж байна гэж дүгнэлээ

Улсын Их Хурлын Төрийн байгуулалтын байнгын хорооны хуралдаанаар Улсын Их Хурлын Тамгын газрын 2019 оны үйл ажиллагааны тайланг хэлэлцэв.

Улсын Их Хурлын Төрийн байгуулалтын байнгын хорооны хуралдаанаар Тамгын газрын 2018 оны ажлын тайланг хэлэлцээд хуралдааны тэмдэглэлээр өгсөн гурван чиглэлийн үүргийг хэрэгжүүлэх 17 заалт бүхий төлөвлөгөө гарган бүрэн хэрэгжүүлж ажилласныг дурджээ.

Байнгын хорооны дарга С.Бямбацогт “Улсын Их Хурлын Тамгын газар 2019 онд, түүнчлэн 2016-2020 оны Улсын Их Хурлын бүрэн эрхийн хугацаанд Улсын Их Хурлын үйл ажиллагаанд мэргэжил, арга зүй, техник, зохион байгуулалтын туслалцаа үзүүлэх үүргээ бүрэн дүүрэн биелүүлснийг онцолж байна” гэв.

2020-05-12

Гадаадад оршин суугаа хүүхдүүдэд 2020 оны аравдугаар сарын нэгэн хүртэл хүүхдийн мөнгөн тэтгэмж олгоно

Засгийн газрын ээлжит хуралдаанаар дараах асуудлыг хэлэлцэн шийдвэр гаргажээ.

Улсын хэмжээнд хүсэлт гаргасан хүүхэд бүрт Хүүхдийн мөнгөн тэтгэмжийг олгож байгаа билээ. Цар тахлын тархалтын үед Засгийн газраас Нийгмийн халамжийн чиглэлээр авч хэрэгжүүлж буй арга хэмжээний хүрээнд аравдугаар сарын 01-нийг хүртэл хүүхэд бүрт 100 мянган төгрөг олгохоор болсонтой холбогдуулан Хүүхдийн мөнгөн тэтгэмжид шинээр хамрагдах хүсэлт гаргасан хүүхдийн тоо 20 мянгаар нэмэгдсэн байна. Мөн гадаадад оршин суугаа Монгол Улсын иргэдээс хүүхдийн мөнгөн тэтгэмжид хамрагдах хүсэлтүүд хөдөлмөр халамж үйлчилгээний газарт олноор иржээ.

Иймд Коронавируст халдварын цар тахлын үед хүсэлт гаргасан гадаадад оршин суугаа Монгол Улсын иргэний хүүхдэд Хүүхдийн мөнгөн тэтгэмжийн 100 мянган төгрөгийг хүсэлт гаргасан сараас эхлэн 2020 оны аравдугаар сарын 01-ний өдрийг хүртэл олгохоор шийдвэрлэлээ.

2020-05-13

Хувийн тэтгэврийн тухай хуулийн төслийг өргөн барив

Монгол Улсын Их Хурлын дарга Г.Занданшатарт Хувийн тэтгэврийн тухай хуулийн төслийг Улсын Их Хурлын гишүүн Н.Учрал, Б.Баттөмөр, Л.Мөнхбаатар, З.Нарантуяа, Б.Саранчимэг нар өргөн барив.

Монгол Улсын дундаж цалингийн хэмжээ 2016 оны эцсийн байдлаар 942.02 мянган төгрөг байсан бол өндөр насны бүрэн тэтгэврийн дундаж хэмжээ 325 мянган төгрөг байгаа нь дээрх цалингийн хэмжээтэй харьцуулахад 34.5 хувь болж байна. Энэ үзүүлэлт хамгийн багадаа 40 хувиас багагүй байх ёстой ба энэ хэмжээнд хүргэх санхүүгийн нөхцөл эдийн засгийн боломж бүрдэхгүй байгаа аж.

Иймд даатгуулагчийн олон эх үүсвэрээс тэтгэвэр авах нөхцөлийг бүрдүүлэх зорилгоор хувийн тэтгэврийн тогтолцоог нэвтрүүлэх шаардлагатай хэмээн төсөл санаачлагчид үзжээ.

2020-05-13

Үндсэн хуулийн цэцийн 03 дүгээр дүгнэлтийг хүлээн зөвшөөрөх нь зүйтэй гэж үзлээ

Монгол Улсын Их Хурлын сонгуулийн тухай хуулийн 29 дүгээр зүйлийн 29.8 дахь хэсэг, 32 дугаар зүйлийн 32.2.9, 32.3.11 дэх заалт Үндсэн хуулийн холбогдох заалтыг зөрчсөн эсэх маргааныг хянан шийдвэрлэсэн тухай Үндсэн хуулийн цэцийн 2020 оны 03 дугаар дүгнэлтийн хэлэлцэв.

Цэцийн дүгнэлттэй холбогдуулан асуулт асуух гишүүн байгаагүй бөгөөд Үндсэн хуулийн цэцийн 2020 оны 03 дүгээр дүгнэлтийг хүлээн зөвшөөрөх нь зүйтэй гэж үзэв

2020-05-14

Сергей Диордица: Монголчууд халдвар аваад дархлаа тогтсон гэдэг нь шинжлэх ухаанаар нотлогдоогүй

ДЭМБ-ын Монгол Улс дахь суурин төлөөлөгч Сергей Диордица өчигдөр мэдээлэл хийлээ.

ЦАР ТАХАЛ ХАРААХАН ДУУСААГҮЙ БАЙГАА ТУЛ БИД ТАЙВШИРЧ БОЛОХГҮЙ

ДЭМБ-ын суурин төлөөлөгч Сергей Диордица: Халдварыг зогсоохын тулд Засгийн газар, Эрүүл мэндийн байгууллагын шийдвэрийг ард иргэд дагах нь зүйтэй. Урт хугацааны туршид тусгаарлах арга хэмжээ нь ард иргэдийн сэтгэл зүйн байдалд сөргөөр нөлөөлнө гэдгийг бид ойлгож байна. Монгол Улсын Засгийн газар, Эрүүл мэндийн яам, Мэргэжлийн хяналтын ерөнхий газар, олон улсын байгууллагуудын ажлыг үгүйсгэж буй худал мэдээлэлд хариу өгөхөөр би энд ирсэн. Бидний дархлааны тогтолцоо эрүүл мэндийг хамгаалж, аливаа халдвараас сэргийлдэг. Цар тахал хараахан дуусаагүй байгаа тул бид тайвширч болохгүй.

Монгол Улсад жил бүрийн 11, 12 сард томуугийн улирал эхэлдэг бөгөөд иргэдийн дунд Монголчууд халдвар аваад дархлаа тогтсон гэсэн мэдээлэл бий. Энэ нь шинжлэх ухааны ямар ч нотолгоогүй. Коронавирусын халдвар шинээр нээгдсэн вирус мөн.

Олон хүмүүс өөрсдөд нь дархлаа тогтсон гэж бодож өөрийгөө болон өөр бусдыг аюул эрсдэлд оруулж байна. Монголчуудад дархлаа тогтоогүй.

Хамгаалалт, сэргийлэлтийн арга хэмжээг авахгүй бол Монгол Улс дотоодод халдвар тарах эрсдэл өндөр хэвээр байна. Худал мэдээлэл коронавирусээс илүү аюултай" гэжээ.

2020-05-15