Улсын Их Хурлын 2020 оны сонгуулийн 29 тойрогт нэр дэвшин тус бүр ялалт байгуулан Улсын Их Хуралд сонгогдсон 76 эрхэм өнөөдөр Улсын Их Хурлын гишүүний үнэмлэхээ гардан авлаа. Үүний дараа Сонгуулийн Ерөнхий Хороо гишүүнээр сонгогдогчдын нэрийн жагсаалтыг Ерөнхийлөгчид айлтгаж улмаар Ерөнхийлөгч зарлиг гарган УИХ-ын анхдугаар чуулганыг хуралдуулах тов гаргах юм.Улсын Их Хурлын анхдугаар чуулганыг хамгийн ахмад настай гишүүн удирдаж шинэ гишүүд тангаргаа өргөснөөр шинэ парламент байгуулагдаж өмнөх парламентын бүрэн эрхийн хугацаа дуусна.

Энэ удаагийн Улсын Их Хурлын ээлжит сонгуульд 34 гишүүн анх удаа сонгогдоод байна. Тодруулбал, МАН-аас 24, АН-ын 11, Зөв хүн электорат эвсэл 1, Та бидний эвсэл 1, бие даагч 1 тус тус сонгогдоод буй.

Улсын Их Хуралд цоо шинээр сонгогдсон гишүүдийг онцлохын учир нь анх парламентад орж ирсэн гишүүд Төрийн ордонд ажиллах болсноор нэг хэсэгтээ л будилаад авдаг. Зарим нь байнгын хороод, хэвлэлийн бага хурлын танхимаа олохгүй төөрөх тохиолдол гаргадаг бол зарим нь микрофонтойгоо харьцах гэж нэлээдгүй тэвддэг. Энэ бүхэнд “УИХ-ын гишүүний гарын авлага” ихээхэн тус болдогийг сануулахад илүүдэхгүй болов уу. Өмнө нь Улсын Их Хуралд огт сууж байгаагүй гишүүд:

АН-аас намаас Б.Бейсен, А.Адьяасүрэн, Ж.Батуурь, Н.Ганибал, Ц.Туваан, О.Цогтгэрэл, Ш.Адьшаа, “Зөв хүн электорат” эвслээс Т.Доржханд нар анх удаа сонгогдсон гишүүд болж байна.

Харин МАН-аас Т.Аубакар, Ц.Анандбазар, Ц.Сэргэлэн, Т.Энхтүвшин, Ц.Цэрэнпунцаг, Г.Ганболд, Н.Наранбаатар, Ж.Батжаргал, Г.Дамдинням, Д.Батлут, Ц.Сандаг-Очир, Б.Энхбаяр, Ж.Чинбүрэн, Э.Бат-Амгалан, Х.Ганхуяг, Г.Амартүвшин нар анх удаа парламентад сууна.

Түүнчлэн энэ удаагийн парламентад 13 эмэгтэй гишүүн сонгогдсон. МАН-аас Б.Баярсайхан, Ц.Мөнхцэцэг, Ч.Ундрам, Д.Өнөрболор, Б.Жаргалмаа, П.Анужин, АН-аас А.Адьяасүрэн шинээр гишүүн болж байна. Улсын Их Хурлын найм дахь удаагийн ээлжит парламентын гишүүдийн 17%-ийг эмэгтэй гишүүд эзэлж байгаа юм.