УИХ-ын гишүүний түр үнэмлэхээ гардаж авсан гишүүдийн байр суурийг хүргэж байна.

ХҮЧТЭЙ СӨРӨГ ХҮЧИН БОЛЖ АЖИЛЛАНА

УИХ-ын гишүүн О.Цогтгэрэл: УИХ-ын гишүүн болчихоор бүх салбарыг мэддэг, их мундаг хүн болчихдог гэж бодохгүй байна. Ийм учраас мэргэжлийн баг, хамт олонтой нухацтай ажиллах ёстой. Онцгой анхаарч ажиллах ёстой асуудал бол жирийн иргэдийн орлого. Иргэд нь өөрсдөө орлоготой байх хэрэгтэй. Түүнээс халамж хүсдэг, бүтээн байгуулалт нэрээр иргэдэд хамааралгүй хөрөнгө оруулалт хийдэг байдал арай биш. УИХ дахь намын бүлэг гэдэг бол төрийн нэг институци. Хамт олноороо дүрэм, дэг журмаараа явна. Хүчтэй сөрөг хүчин болж ажиллана. Ард түмний саналаар 11 суудал авлаа.

ЭРХ БАРИГЧ НАМ МАШ ЯАРАЛТАЙ ТӨСВИЙН ТОДОТГОЛ ХИЙХ ХЭРЭГТЭЙ

УИХ-ын гишүүн Т.Доржханд: Сонгуулийн системийг маш яаралтай өөрчлөх шаардлагатай. Цаашид олон залуус битгий няцаасай. Төрөө байгуулах ажилд оролцдог байгаасай. Олон залуусын дуу хоолой болж ажиллана гэсэн байр суурьтай байна. Ирэх дөрвөн жил маш хэцүү байх болно. Эдийн засгийн хамгийн хэцүү үеүүдийг энэ дөрвөн жилд туулна. Ийм үед эдийн засгаа бэхжүүлэх, сэргээх, ажлын байраа хамгаалах, хар, саарал жагсаалтуудаас гарах, бондын өрийг төлөх, ажилтай, орлоготой Монгол хүнийг бий болгоно гэдэг нь Засгийн газрын хамгийн том сорилт байх болов уу. Энэ чиглэлээр маш хүчтэй байр сууриа илэрхийлж ажиллана. Бодлогоор дэмжинэ. Т.Доржханд ганцаараа биш. Эрх баригч нам маш яаралтай төсвийн тодотгол хийх хэрэгтэй.

“БАЛ САР”-ЫГ УДААН ТЭМДЭГЛЭЖ БОЛОХГҮЙ

УИХ-ын гишүүн С.Ганбаатар: “Бал сар”-ыг удаан тэмдэглэж болохгүй. Аюултай нөхцөл байдал үүсчихсэн байгаа. Өнөөдрийн байдлаар төгрөгийн худалдан авах чадвар огцом унах вий гэдэг айдас байна. Коронавирусээс шалтгаалаад манай улсын түүхий эдийн борлуулалт асар таагүй байгаа. Эдийн засгийн гол асуудлууд руу шууд орох хэрэгтэй. Жижиг, сажиг зүйл хөөцөлдөх хэрэггүй. Бүхлийг шийдвэл бүхнийг шийднэ.

ДАРХАНЫ ЗАМЫН АЖЛЫГ ХАМГИЙН ТҮРҮҮНД ДУУСГАНА

УИХ-ын гишүүн Г.Дамдинням: Шударга, зарчимтай, багаар ажиллана. Монгол Улсын Үндсэн Хуулийн шинэ өөрчлөлтөөс хамаараад хяналт сулрах асуудал гарахгүй байх гэж бодож байна. Бид нийтийн үнэт зүйлийн төлөө нэгдэж ажиллах ёстой гэсэн байр суурьтай байна. Дарханы замын ажлыг хамгийн түрүүнд дуусгана.

ҮНДЭСНИЙ ХЭМНЭЛТИЙН БОДЛОГООР ЭДИЙН ЗАСГИЙН ХЯМРАЛАА ДАВАН ТУУЛНА

УИХ-ын гишүүн Ц.Мөнхцэцэг: Нийгмийн тэгш бус байдлыг бууруулах, шударга ёсыг тогтоох, хүн амын амьжиргааг дэмжих, эрүүл мэнд, боловсрол нийгмийн хамгааллын салбарт томоохон шинэчлэл хийх ёстой. Тухайлбал, Хуримтлалын сан, Үндэсний баялгийн сан зэрэг томоохон эдийн засаг, нийгмийн үр дагавар бүхий төсөл хөтөлбөрүүдийг хэрэгжүүлнэ. Энэ удаагийн парламент бол цар тахлын үеийн дэлхий дахины хүндрэл тэр дундаа Монгол Улсын эдийн засгийн хүндрэлийн үед бий болж байгаа учраас юун түрүүнд эдийн засгийн хүндрэлийг даван туулах, хүндрэлийн дараах нийгэм болон эдийн засгийн сөрөг үр дагаврыг багасгах асуудал хамгийн түрүүнд тавигдана. Үндэсний хэмнэлтийн бодлогоор эдийн засгийн хямралаа даван туулна.

АМЛАСАН АЖЛУУДАА ЭХЛҮҮЛЭХИЙГ АРД ТҮМЭН ХҮЛЭЭЖ БАЙНА

УИХ-ын гишүүн М.Оюунчимэг: Мөрийн хөтөлбөрт амласан томоохон ажлуудаа эхлүүлэхийг ард түмэн хүлээж байна. Жишээ нь, Анх удаа ипотекийн зээлэнд хамрагдаж байгаа хүмүүс урьдчилгаа төлөхгүйгээр Нийгмийн даатгалын шимтгэлээ үзүүлээд 4-6 хувийн ипотекийн зээлэнд хамрагдах боломжтой. Мөн зээлийн хүүг нэг оронтой тоонд хүргэнэ гэж амласан. Энэ мэтчилэн зайлшгүй хийх ажлуудаа гадаад зах зээлтэй уялдуулж, богино хугацаанд хийж, хэрэгжүүлнэ. Үүнийгээ хүн бүр ухамсарлаж, цаг наргүй ажиллах ёстой. Төсөвт тодотгол хийх магадлал өндөр байна.

НИЙГМИЙН ДААТГАЛЫГ БҮХЭЛД НЬ ШИНЭЧЛЭХ ХЭРЭГТЭЙ

УИХ-ын гишүүн Н.Учрал: Өнгөрсөн хугацаанд баталсан хуулиудыг хэрэгжүүлэх, эдийн засгаа өргөжүүлэх, бүтцээ тэлэх ажил руу ханцуй шамлан орно. Хуримтлалын нэгдсэн тогтолцоог бий болгох, Нийгмийн даатгалын багц хуулийн шинэчлэлийг зохион байгуулж, тэтгэврийн реформ болон боловсролын реформ, шинэчлэлийг даруй хийх шаардлагатай. Дундаж давхаргыг дэмжсэн намын бодлогыг хэрэгжүүлэхийн тулд Нийгмийн даатгалыг бүхэлд нь шинэчлэх хэрэгтэй. Өнгөрсөн парламентийн үед өргөн барьсан Хувийн тэтгэврийн хууль, Нийгмийн даатгалын багц хуулийн шинэчлэлийг энэ намрын чуулганаар хэлэлцүүлж, батлуулна. Дундаж давхаргыг дэмжих тогтолцоог нэвтрүүлэх шаардлагатай.