Ахмад настнууд амралт, сувиллын газарт жилд нэг удаа хөнгөлөлттэй үнээр амрах эрхтэй байдаг. Ахмад настны тухай хуулийн 8.1.2-т ахмад настан ахмадын зориулалттай амралт, сувиллын газарт 10 хүртэлх хоног хөнгөлөлттэй үнээр амрах эрхтэй гэж заасан. Ингэхдээ нэг ор хоногт Нийгмийн халамжийн сангаас олгох хөнгөлөлтийн хэмжээг 20 мянган төгрөг байхаар зохицуулжээ. Харин аймаг, дүүрэг дэх Хөдөлмөр, халамжийн үйлчилгээний газрын харьяа ахмадын сувиллын газрууд нэг ор, хоногт 13 мянган төгрөгийн хөнгөлөлт үзүүлдэг байна.

Уг хөнгөлөлтийг эдлэхийн тулд ахмад настан дараах зүйлсийг бүрдүүлж, сум, хорооныхоо нийгмийн ажилтанд хандах юм.

Үүнд:

1. Өргөдөл (маягтын дагуу)
2. Иргэний үнэмлэх, хуулбарын хамт;
3. Эрхийн бичгийн үнийг төлсөн баримт
4. Замын зардал төлсөн тухай баримт

2020 онд ахмад настанд амралт, сувиллын үйлчилгээ үзүүлэх гэрээ байгуулсан байгууллагуудын жагсаалтыг зургаар орууллаа. Ахмад настнууд нийгмийн ажилтанд хандахаас гадна сонирхсон амралт, сувилалын газрынхаа утасны дугаар руу холбогдож, шаардлагатай мэдээллээ лавлах боломжтой.

Ахмад настнуудыг хүлээн авах амралт сувилалын газрууд бэлтгэлээ хэрхэн хангасан талаар зарим хүмүүстэй холбогдож тодрууллаа.

Бид нэг өрөөнд 4 хүн байхаар зохицуулан ажиллана

АШУҮИС-ийн Сургалтын нэгдсэн эмнэлгийн дарга Ж.Өнөржаргалтай холбогдоход манай АШУҮИС-ийн Сургалтын нэгдсэн эмнэлгийн харьяа сувилал нь амралтын улиралд тааруулан 50 орчим амрагч хүлээн авдаг. Ахмад настанд хөнгөлөлттэй үнээр үйлчилгээ үзүүлээд дөрвөн жил болж байна. Амрагч ахмадууд 300 мянган төгрөгийн үнэтэй эрхийн бичгийг Хөдөлмөр халамжийн үйлчилгээний газраар 200 мянган төгрөгөөр хөнгөлүүлж хувь хүн өөрөө 100 мянган төгрөгийн төлбөрөө төлж амардаг. Коронавируст өвчлөлийн эрсдэл буураагүй байгаа учир аливаа хэлбэрийн үйл ажиллагаанд амрагчдыг 2-3 хэсэг болгон зохион байгуулж оролцуулах, нэг өрөөнд 4-өөс дээш амрагч авахгүйгээр ажиллана гэлээ.

Энэ жил амрагч багатай үйл ажиллагаа явуулж байна

Ахмад настны үндэсний төвийн нярав Л.Оюундэлгэрээс мэдээлэл авлаа. Ахмад настны үндэсний төв амрагчдаа хүлээн авахад бэлэн болсон байна. Амрагчдыг 10 хоног амрааж сувилахдаа зүү төөнүүр бариа засал физик эмчилгээгээр үйлчилдэг аж. Энэ жилийн тухайд амрагчдын тоо бага байгаа учраас олноор цуглахаас үүдсэн аливаа эрсдэл байхгүй гэж байна. Иргэд тус амралт сувилалд үйлчлүүлж байх хугацаандаа амны хаалт зүүхээс эхлээд ариун цэврийн дэглэм сахиж хэвшсэн гэлээ. Хоолны заал болон амралтын байрны ачааллыг нэг дахин бууруулахаар тооцож зохион байгуулалтыг хийж эхэлжээ.