COVID-19-ийн цаг үеийн мэдээллийг ЭМЯ-наас хийлээ. Манай улсад өчигдрийн байдлаар шинээр 16 хүн ажиглалтанд орж 31 хүн ажиглалтаас гарснаар 2468 хүнд тандалт ажиглалтыг үргэлжлүүлж байна. Тусгаарлалтын арга хэмжээ авч эхэлснээс хойш нийтдээ 5447 хүнд тусгаарлах арга хэмжээ авчээ. Тэдний 623 хүнийг гэрийн нөхцөлд тусгаарлан ажигласан гэлээ. Ажиглалтад байгаа хүмүүс дунд 1-5 насны 118 хүүхэд, 53 жирэмсэн эмэгтэй байна. Шуурхай 119 дугаарын утсанд 24 цагт 161 дуудлага ирсэн бол шуурхай аппликейшнд нэг дуудлага ирж, зөвлөгөө мэдээлэл авсныг мэдээлэв.

Өнгөрсөн хугацаанд нийтдээ 11 мянга гаруй иргэнд тандалт, судалгаа хийж, батлагдсан 220 тохиолдлыг илрүүлж, тусгаарлан сэргийлэх арга хэмжээ авсан бөгөөд 175 буюу 81 хувь нь эдгэрсэн байна. Сувилалд 68, гэрт 73 хүн хяналтад байна. Батлагдсан тохиолдлын 181 нь ОХУ-аас зөөвөрлөгдөн орж ирсэн байна. Мөн 50 хувь нь Алтанбулаг боомтоор орж ирсэн бөгөөд 6-80 насны хүмүүс өвчилжээ. Нийт батлагдсан тохиолдлуудын эмнэл зүйн шинж өөрчлөгдөөгүй, хөнгөн үед нь тусгаарлаж эмчилж байгаа гэдгийг ХӨСҮТ-ээс мэдээллээ.

ХӨСҮТ-ийн захирал Д.Нямхүү “ Өчигдөр хийгдсэн 406 хүний сорьцод вирус илрээгүй байна. Сайн мэдээ нэг хүн эдгэрч дараагийн шатлалд шилжлээ. Энэ хүн бол ОХУ-д суралцаж байсан эрэгтэй 21 настай оюутан. Нийт 36 хоног эмчлэгдээд гарч байна. Нийт батлагдсан 220 тохиолдын 176 хүнийг эмчилж дараагийн шатны тусгаарлалтанд шилжүүлээд байна. ХӨСҮТ-д 44 хүн эмчлэгдэж байна.Эдгээр хүмүүсийн биеийн байдлыг үнэлбэл 33 хүний биеийн байдал хөнгөн 11 хүний бие хүндэвтэр байна гэлээ.