Жил бүр монголчууд дэнж хотойтол нааддаг дэлхийд ганцхан Монгол наадамаа есөн хөлт цагаан тугаа төв цэнгэлдэх хүрээлэндээ залснаар эхлүүлж, түмэн олноороо хуран цуглаж ёслол төгөлдөр тэмдэглэдэг түүхэн уламжлалтай. Монгол наадам Хүннүгийн үеэс эхлэлтэй хэмээн түүхэн эх сурвалжид дурдсан буй. Жаргалтай дэлгэр Монгол наадам маань тэр чигээрэээ нүүдэлчдийн ахуй амьдралын тусгал илэрхийлэл, өв соёлын мөнхийн үргэлжлэл билээ.

Тэгвэл энэ жилийн баяр наадам урьд урьдын наадмаас ихээхэн онцлогтой. Учир нь дэлхий нийтийг хамарсан коронавирусын халдварт цар тахлын улмаас хотол олноороо баясан тэмдэглэдэг наадамаа үзэгчгүй зохион байгуулахаас өөр аргагүйд хүрээд байгаа юм.

Үндэсний Их баяр наадмыг зохион байгуулах хорооноос орон даяар Баяр наадмыг хүний бөөгнөрөл үүсгэхгүйгээр, халдварт цар тахлаас сэргийлэх дэглэмийг чанд баримтлан 2020 оны 07 дугаар сарын 11-12-ны өдрүүдэд нийслэл, аймаг, сум, дүүрэгт зохион байгуулахаар, уул овооны тахилга, ой тэмдэглэх зэрэг нийтийг хамарсан арга хэмжээг зохион байгуулахгүй байхаар тус тус шийдвэрлэн бүх шатны засаг дарга нарт үүрэг болгож, Монгол Улсын Ерөнхийлөгчид уламжилж, Монгол Улсын Засгийн газарт танилцуулсан.

Ингэснээр коронавирусын халдварт цар тахлын үед Тулгар төрийн 2229, Их Монгол Улсын 814 жил, Ардын Хувьсгалын 99 жилийн ойн Үндэсний их баяр наадмыг зохион байгуулах түр журмын төслийг хэлэлцэн батлаад буй. Энэхүү журмаар Үндэсний баяр наадмыг зохион байгуулах явцад КОВИД 19-ийн халдварт цар тахлаас урьдчилан сэргийлэх, хяналт тавихтай холбоотой үүсэх бүхий л харилцааг зохицуулж байна.

Халдварт цар тахлаас урьдчилан сэргийлэх дэглэмийн хүрээнд иргэдийн бөөгнөрөл үүсгэхгүй үүднээс Үндэсний бөхийн барилдаан, сур, шагайн харвааг “XIII зуун” байгалийн цогцолборт газрын төв талбайд, хурдан морины уралдааныг уламжлал ёсоор “Хүй долоон худаг”-т, Төрийн хүндэтгэлийн концертыг СТӨ-нд тус тус зохион байгуулахаар шийдвэрлэж, бэлтгэл ажил хийгдэж байгаа аж.

Бөхчүүд, сур шагай харваачид, уяачид, морь унаач хүүхдүүд болон бусад дагалдах оролцогчдыг эрүүл мэндийн урьдчилсан үзлэгт оруулж, асуулга авах бөгөөд биеийн халууныг нь хэмжиж, халдвар хамгааллын дэглэм сахиулж, мэргэжлийн албан хаагчид байнгын хяналт тавьж жижүүртэй ажиллахаар журамласан байна.

Харин Жанжин Д.Сүхбаатарын хөшөөнд цэцэг өргөх, Их эзэн Чингис хааны хөшөөнд хүндэтгэл үзүүлэх ёслол, Төрийн далбааны өдөрт зориулсан цэргийн жагсаал, Дээлтэй Монгол наадам, Баяр наадмын ёслолын буудлага, Өсвөрийн бөхийн барилдаан, Өсвөр үе, балчир насны хүүхдийн сурын болон шагайн харваа, Төрийн дайллага, Уяачдын наадам, Соёл урлагийн арга хэмжээ, үзвэр, үйлчилгээ үзэсгэлэн худалдааг явуулахгүй байхаар тогтжээ.

Ингэснээр энэ жил ард иргэд маань баяр наадмын нээлтийн үйл ажиллагаа болон зөвшөөрөгдсөн бөхийн барилдаан, сур шагайн харваа, 6 насны морин уралдааныг теле болон онлайн хэлбэрээр шууд дамжуулан үзүүлэхийг харах л үлдлээ.