Ерөнхий сайд У.Хүрэлсүх Засгийн газрын гишүүнд нэр дэвшигчдийг нэг бүрчлэн танилцуулсны дараа УИХ-ын гишүүд үг хэлж, асуулт асууж байна.

УИХ-ын гишүүн О.Цогтгэрэл: Шинээр байгуулагдаж байгаа танхим, томилогдож байгаа сайд нарт ажлын амжилт хүсье. Татварын бодлого цаашид өөрчлөгдөх үү. Татварын бодлого төсвөө бүрдүүлэх, бизнесээ дэмжих, хамгаалах олон чиглэлтэй. Бизнесээ дэмжих чиглэлд татварын бодлого гүйцэд ажиллахгүй байна. Татварууд бүгд нэг хэвийн байна. Татварын орлогоо нийт дүн дээр бариад түүхий эд орж байхад татвар багатай буюу Монголд ажлын байр бий болохыг дэмжсэн, эцсийн бүтээгдэхүүн орж ирэхэд татвар өндөртэй байх гэх мэт энэ чиглэлд ялгаатай татварын бодлогыг бий болгох боломж бий юу. Ингэвэл маш олон мянган ажлын байр, нэмүү өртөг манай улсад бий болох эдийн засгийн бодит том хөшүүрэг байгаа юм биш үү.

Хоёрдугаарт, Хорт хавдарын өвчлөл Монголд өндөр хувийг эзэлдэг. Тэр тусмаа Увс аймагт улсын дунджаас өндөр үзүүлэлттэй байна. Үүний шалтгаан нөхцөлийг тодруулж, онцгойлон урьдчилан сэргийлэх тал дээр анхаарч өгөөч гэж хүсэж байна.