Үндэсний их баяр наадмын босгон дээр дүрслэх урлаг шимтэн сонирхогч, үзэгч түмэндээ зориулаад ХААН галерей “Уламжит дүрслэхүй” анхны 360 виртуал үзэсгэлэнгээ танилцуулаад байна.

“Ковид-19” цар тахлын улмаас галерей, үзвэр үйлчилгээний газрууд түр хугацаанд ажиллахгүй байгаа энэ үед ХААН галерей өөрийн сан хөмрөг дэх дүрслэх урлагийн сор бүтээлүүдээсээ түүвэрлэн цахим үзэсгэлэн нээж буй нь үзэгч олон нийтийн оюуны алжаалыг тайлж, мэлмийг баясгах нь лавтай.

Монголчуудын бахархал болсон эртний уламжлалт урлаг бол яах аргагүй Монгол зураг билээ. Эртний эзэнт гүрнүүдийн түүх соёл, нүүдэлчдийн аж байдлын тод тусгал болж уламжлагдан ирсэн дүрслэх урлагийн энэ төрөл XXI зуунд зураач уран бүтээлчдийн арга барил, хэв маягийг шингээснээр хөгжлийнхөө цоо шинэ түвшинд хүрч орчин үеийн Монгол зураг хэмээгдэх болсон юм.

ХААН Банкны дэргэдэх ХААН галерейн сан хөмрөгт буй урлагийн бүтээлийн цуглуулгад орчин үеийн Монгол зураг зохих байр суурь эзэлдэг билээ. Тэгвэл энэхүү цахим үзэсгэлэнд Монголын орчин үеийн Монгол зургийн төлөөлөл болсон найман уран бүтээлчийн 12 бүтээлийг цахимаар үзэж сонирхох боломжийг бүрдүүлжээ.

Тулгар төр байгуулагдсаны 2229, Их Монгол улс байгуулагдсаны 814, Ардын хувьсгалын 99 жилийн ойн Үндэсний их баяр наадамд зориулан толилуулж “Уламжит дүрслэхүй” 360 виртуал үзэсгэлэнг үзэхийг хүсвэл та бүхэн ЭНД дарна уу.