УРГАЦ ХУРААЛТЫН АЖИЛД ОЮУТНУУДААР ХҮЧ НЭМНЭ

Aдмин / Орон нутаг

Хүнс, хөдөө аж ахуй, хөнгөн үйлдвэрийн яаманд өнөөдөр Ургацын комиссын хурал болж, 2020 оны ургацын урьдчилсан төлөв байдлыг танилцууллаа. Ургацын комиссын бүрэлдэхүүнд багтсан яамдын дэд сайд нар, холбогдох агентлагуудын мэргэжилтнүүд оролцлоо.

Ургацын комиссын хурлыг Хүнс хөдөө аж ахуй, хөнгөн үйлдвэрийн сайд, Ургацын комиссын дарга З.Мэндсайхан “Ургацыг хүйтрэлтээс хамгаалах, техникийн бэлэн байдлыг хангах, хаягдалгүй хураах технологийг боловсруулж тариалачдад хүргэх, ургац хураалтын ажлыг технологийн хугацаанд үр дүнтэй, шуурхай зохион байгуулахад холбогдох төрийн байгууллагуудын уялдаа холбоог хангаж шуурхай ажиллах”-ыг үүрэг болголоо.

-УЛААНБУУДАЙ, ТӨМС, ХҮНСНИЙ НОГООНЫ УРГАЦ ЭНЭ ЖИЛ НЭМЭГДЭХ ТӨЛӨВТЭЙ БАЙНА

2020 онд улсын хэмжээгээр 394.6 мянган га-д үр тариа, үүнээс 364.0 мянган га-д улаанбуудай, 18.6 мянган га-д төмс, 9.6 мянган га-д хүнсний ногоо, 61.1 мянган га-д тосны, 52.7 мянган га-д тэжээлийн ургамал, нийтдээ 536.6 мянган га-д тариалалт хийсэн.

Урьдчилсан балансаар 513.3 мянган тонн үр тариа, үүнээс 487.6 мянган тонн буудай, 237.0 мянган тонн төмс, 113.6 мянган тонн хүнсний ногоо, 32.8 мянган тонн тосны ургамал, 109.4 мянган тонн малын тэжээлийн ургамал тус тус хураан авах боломжтой гэсэн төлөв гарч байна. Улаанбуудайн хэрэгцээг 100 хувь дотоодоос хангах боломж бүрдэж байгаа юм.

Ургацын урьдчилсан төлөвийг өнгөрсөн оны ургацын дүнтэй харьцуулбал хураан авах улаанбуудай 80.0 мянган тонноор, төмс 46.2 мянган тонноор, хүнсний ногоо 19.0 мянган тонноор тус тус нэмэгдэх төлөвтэй байна.

-УРГАЦ ХУРААЛТЫН АЖИЛД ОЮУТНУУДААР ХҮЧ НЭМНЭ

Ургац хураалтын ажилд оролцох оюутан, цэргийн алба хаагчид болон ажиллах хүчний судалгаа, захиалгыг орон нутгаас авч зохицуулалт хийснээр Хөдөө аж ахуйн Их сургуулийн 1992, Дотоод хэргийн их сургуулийн 500 оюутныг ургац хураалтын ажилд оролцуулах юм.

Ургац хураалтад нийтдээ 1020 ширхэг комбайн ажиллах бөгөөд үүний 300 нь дэвшилтэт технологид суурилсан 2-6 жил ашиглагдаж байгаа өндөр хүчин чадлын комбайн байгаа бол төмс хураах комбайн 70 ширхэг, төмс ухагч 410 ширхэг, үр тариа цэвэрлэх, ялгах, ачих зориулалттай 678 ширхэг техник, тоног төхөөрөмж бэлэн болоод байна.

Энэхүү техникийн хүчин чадлаар ургац хураалтын ажлыг технологийн 20-25 хоногт багтаан зохион байгуулах боломжтой гэсэн тооцжээ.

-НОГООЧДОД БҮТЭЭГДЭХҮҮНЭЭ ЗАРАХ БОЛОМЖООР ХАНГАХААР АЖИЛЛАЖ БАЙНА-

Улаанбаатар хотод төмс, хүнсний ногоог хямд үнээр борлуулах, ногоочдын борлуулалтыг дэмжих зорилгоор Нийслэлийн Захирагчийн ажлын албатай хамтран 9 дүүргийн 45 байршилд борлуулалтын цэг нээж шинэ ургацын төмс, хүнсний ногооны борлуулалтыг эхлүүлсэн. Цаашид Төмөр замын Улаанбаатар өртөөний баруун талд байрлах “1000 машины зогсоол”-ыг 11 дүгээр сар хүртэл орон нутгийн ногоочдод бөөний борлуулалт хийх зориулалтаар ашиглуулах асуудлуудыг шийдвэрлүүлэхээр холбогдох байгууллагуудтай хамтран ажиллаж байна.


Сэтгэгдэл

Зочин [122.201.22.135] 2020-09-07 00:19:04

Оюутны намар- их ажлын намар байдагсан . Ёстой л Өргөн сэлэнгийн хөвөөн будаа тариа хурааж Өрнийн цэнхэр говьд худаг ус гаргаж Ногоон ЗИЛ-ийн дэвшин дээр шуугилдаж Номин талын энгээр дууулцгааж....явдаг байж.

Энхтуяө [202.9.40.89] 2020-09-05 02:06:45

Ургац хураалтын ажилд оеутнуудыг дайчилж ажил сургах нь зөв . Гэхдээ унаа , байр , хоол , хувцаснаас нь эхлээд аеулгүй байдлыг нь урьдчилж сайн хангах хэрэгтэй . Зах зээлийн нийгэмд тариа , ногооны компаниуд бүгд хувийнх болсон , хүний хүчийг ашигласан бол үр дүнг нь шударгаар тооцож цалин хөлсийг нь өгөх ёстой шүү ! ! !

Зочин [203.91.115.49] 2020-09-03 14:19:19

10 jild ch gesen urgats huraaltand daichlagdaad yavdag baisan. Bi 8, 9, 10-r angiinhaa namar urgats huraaltand angiaraa yavj baisan. Ih daarch ulsdug baisan ch angiaraa naizuudaaraa yavdag baisan bolohoor hugjiltei goyo baij dee.

Зочин [66.181.161.6] 2020-09-03 14:03:23

en zov zov

Иргэн [192.82.68.87] 2020-09-03 11:57:10

Оюутануудыг ургац хураалданд гаргаж ажилд сурга.соц үёд хичнээн сайхан байлаа.одоо сэргээ зөв алхам байна.


5 сэтгэгдэл байна
1000 тэмдэгт оруулах үлдлээ.
Уншигчдын бичсэн сэтгэгдэлд Medee.MN хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.
5 сэтгэгдэл байна
Уншигчдын бичсэн сэтгэгдэлд Medee.MN хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.