Банкны салбарт эргэн төлөлт өндөртэй, нийгэмд эрэлттэй зээл бол орон сууцны 8 хувийн зээл. МАН УИХ-ын сонгуулийн өмнө ипотекийн зээлийн хүүг бууруулна гэж амлалт өгч сонгогчдоос багагүй санал авсан. Тэгвэл тэд орон нутгийн сонгуулийн өмнө зээлийн хүүг бууруулахаар зэхэж байна.
Ипотекийн 8 хувийн зээлтэй 73 мянган иргэн бий. Тэдний зээл 3,4 их наядаар хэмжигдэж байгаа. Өнгөрсөн сард арилжааны банкууд 1077 хүнд 74.8 тэрбум төгрөгийн ипотекийн зээл шинээр олгосноос 57.3 хувь нь хөтөлбөрийн, 42.7 хувь банкуудын өөрийн эх үүсвэрээр олгосон зээл байгаа юм. Өнгөрсөн хугацаанд засгийн газар Монголбанкнаас гарсан ажлын хэсэг хүүг бууруулах боломжийг судлаад 6 хувь болгох боломж бий гэх дүгнэлт хийсэн байдаг юм.
Засгийн газрын хийсэн судалгаагаар зах зээл дээр 70 гаруй мянган орон сууц эзнээ хүлээж байгаа гэх. Нөгөө талдаа 180 мянган өрх орон сууцанд орох туйлын хүсэлтэй. Гэвч зээлийн санхүүжилт хангалтгүйгээс иргэд ипотекийн зээлэнд хангалттай хамрагдаж чадахгүй байгаа юм. Засгийн газар энэ хөтөлбөрийн санхүүжилтийг нэмэгдүүлбэл илүү олон айл өрх орон сууцанд орох боломж бүрдэнэ. Гэвч сонгуулийн өмнө хүү бууруулах нь иргэд, сонгогчдоос оноо авах хамгийн том боломж юм.
Ипотекийн зээлийн хүүг зургаан хувь болгох асуудлыг өнгөрсөн долоо хоногт болсон Засгийн газрын хуралдаанаар дэмжжээ.
Засгийн газраас ипотекийн зээлийн хүүг бууруулах ажлыг судлахаар Барилга хот байгуулалтын яам, Монголбанк, Сангийн яамны бүрэлдэхүүнтэй ажлын хэсэг байгуулсан. Ажлын хэсэг хуралдаанд саналаа танилцуулж, дэмжигдсэн бөгөөд ирэх сарын дундаас ипотекийн зээлийг зургаан хувь болгох ажлыг эхлүүлэхээр төлөвлөөд байгаа талаар эх сурвалж мэдээллээ.
МАН 2020 оны Улсын Их хурлын сонгуулийн мөрийн хөтөлбөртөө ипотекийн зээлийн хүүг зургаан хувь болгоно хэмээн тусгасан юм. Албан бус мэдээллээр одоо зээл авсан иргэдийн зээлийг зургаан хувь болгож шилжүүлэхгүй бөгөөд шинээр зээл авахад л хүүг зургаан хувь байх зохицуулалттай.