Ардчилсан нам амь тавин сөнөж буй талаар 2020 оны УИХ-ын сонгуулийн дараа амтай бүхэн ярьж, МАН-ын ялалтын баярын өдрүүд үргэлжилсээр аймаг, нийслэл, сум, дүүрэг, орон нутгийн сонгуультай залгав.

Ардын нам ялна гэсэн прогноз бүх шатандаа байсан, судалгаагаар ч гарч байсан тул МАН-ын гишүүд амжилтандаа бахдан бөөн бөөнөөрөө хамгийн эрсдэлтэй гэж үзсэн Сүхбаатар аймгийг зорьж ид бяраа үзүүлсэн. УИХ-ын гишүүн П.Анужин, Монгол Усын Ерөнхий сайдын зөвлөх Ж.Энхбаяр, МИАТ-ын захирал Д.Баттөр гээд МАН-ын тамгатай том десант Сүхбаатар аймгийг эзэгнэхээр дайлаар мордсон нь саяхан. Ингэж тэд намын даргадаа сюрьприз барина хэмээн шаагилдсан. Тэдний бодлоор бусад аймгууд нэгэнтээ МАН ялах нь тодорхой гэсэн оношыг тавиад байж. Гэтэл юу болов. Хоёр удаагийн УИХ-ын сонгуулиар үнэмлэхүй олонх болсон МАН-ын бүтэц доогуураа өтсөн, сөнөж байгааг ард түмэн дүгнэлээ. Цаашид мөнгө төгрөгөнд хууртагдахгүй ард түмэн байдгыг ч харуулаад өгөв. Үүний үр дүн бол Ардчилсан намын орон нутагт үзүүлсэн чамлахааргүй ялалт буюу 10 аймагт ялсан ялалтын цуурай байлаа. Энэ ялалт өөрөө 2021 оны Ерөнхийлөгчийн сонгуулийн өнгийг тодорхойлоход чухал.

Ард түмэн ардчилсан намд итгэл үзүүлэхгүй байсан 4 сарын өмнөх дүр зураг аажмаар өөрчлөгдөж байна. Учир нь МАН–ын мөнгөтэй, бэлтэй гишүүдийн хэлж буй үг, хийж буй үйлдэл нийгэмд тийм ч таатай санагдахгүй байгааг орон нутгийн сонгуулийн эрс өөрчлөлт харууллаа.

Энэ бүхэн зүгээр нэг тохиолдлоор ард түмэн эрс өөрчлөгдсөн гэсэн үг биш. Энэ бүх уран нууц тоглолтуудын ард Женко бий. Түүнийг зүгээр нэг бөх гэж харвал эндүүрэл аж. Түүнийг Монгол Улсын Ерөнхий сайд асан Д.Бямбасүрэн “Женко бол нохой. Гэхдээ манай талын нохой” гэж хэлж байсан. Тэнэг биш учраас тэрээр төмөр замын бүтээн байгуулалт, малын гаралтай түүхий эдийг боловсруулах үйлдвэр байгуулах гэх үр өгөөж өгөх төслийг эхлүүлчихэж. Тиймдээ ч торгоны хээ, архины савлагаа, кембриж хөтөлбөр ярихгүй ээ, дэс дарааллаа зөв тогтоо гэж УИХ-ын чуулганы нээлтэн дээр эрхэм гишүүдийг үгээрээ ташуурдаад гарсан. Мөн 21 аймагт ажиллаж ард иргэдтэй тулж уулзсан түүний уулзалт үр дүнгээ өгч орон нутагт цэнхэр далбаа намирах хөрсийг бүрдүүллээ гэж ажиглагчид дүгнэж эхэллээ.

Ардын намынхан алдсан найман аймгийнхаа иргэдийн итгэлийг олох ажлыг хийнэ гэж намын генсек Д.Амарбаясгалан бас онцлоод авав. Гэхдээ тэд ялагдлын шалтгаанаа намын гишүүдийн хуваагдал гэж харж байгаагаас биш ард түмний итгэл нугарч хугардаг гэдгийг арай хараахан хараагүй байна.

Ерөнхийлөгч Х.Баттулга Архангай аймагт ажиллах үеэрээ Ардчилсан намын үед барьсан махны үйлдвэрийг гацаадаг намын талцал орон нутагт байхад ард түмэн рүү чиглэсэн бодлого гарахгүй, намчирхал, талцлын золиос нь ард түмэн гэж нэгэнтээ хэлсэн.

Эцэст нь дүгнэхэд цаг цагаараа байдаггүй гэж ардчилал монголд амьд байгаа аж. Ардчилсан намын хамгийн сул үедээ гаргасан энэ амжилт бол чамлаж болохгүй том боломж юм. Чамлахгүй чанга атгаарай АН-ыхан!!!