Дархан чиглэлийн Хар модот давааны араас Урьхан хүртэл замын 80-81 километрт замын зорчих хэсэг цөмөрчээ

Энэ талаар ЗТХЯ-наас "Улаанбаатар-Дархан чиглэлийн 204.11 км авто замын өргөтгөл, шинэчлэн засварлах төслийн хүрээнд Европын Сэргээн Босголт, Хөгжлийн Банкны санхүүжилтээр хэрэгжүүлж буй хоёрдугаар багц буюу Хар модот давааны араас Урьхан хүртэл авто замын 80-81 км-т дөрвөлжин хоолойн буцаан дүүргэлтийн хэсэгт суулт үүссэн.

Одоогоор тус авто замын төсөл хэрэгжүүлэх нэгж, барилгын ажлын зөвлөх, гүйцэтгэгч компаниуд шуурхай арга хэмжээ авч, засварлаж, тэмдэг, тэмдэглэгээ тавьж, осол гэмтлээс хамгаалж, урьдчилан сэргийлэх арга хэмжээ авч ажиллаж байна.

Иргэд, тээвэрчид та бүхэн хурд хэтрүүлэлгүй, анхаарал болгоомжтой зорчихыг хичээнгүйлэн хүсье" гэв.

Улаанбаатар-Дархан чиглэлийн 204.11 км авто замыг хоёр урсгалтай дөрвөн эгнээ зам болгох бүтээн байгуулалтын ажил 2019 оны зургаадугаар сарын 17-ны өдөр эхэлж, дөрвөн жилийн дараа буюу 2023 оны арваннэгдүгээр сард хөдөлгөөнийг нээж байсан юм.

Хоёр эгнээ хуучин авто замыг Азийн Хөгжлийн Банкны санхүүжилтээр өргөтгөн шинэчилж, дөрвөн урсгалтай болгох ажлыг Европын сэргээн босголт, хөгжлийн банк(ЕСБХБ)-ны 120 орчим сая ам.долларын хөрөнгөөр санхүүжүүлжээ.

Замыг өргөтгөх бүтээн байгуулалтын ажлыг таван багцад хувааж, Монголын болон БНХАУ-ын компанийн ажилтнууд гүйцэтгэсэн билээ.