Мэргэжлийн хяналтын ерөнхий газрын Экспорт, Импорт, Хилийн хорио цээрийн хяналтын газрын дарга Э.Аззаяа, Хэлтсийн дарга Н.Баярсайхан нарын гэмт хэргийн талаар олон нийтийн сүлжээгээр ил болгосноор авлигачдын үнэн бодит байдлыг харуулж, бусад авлигачдад аюулын харанга дэлдэж байна.

Тэд улсын хилээр түргэн муудах хүнсний бүтээгдэхүүн оруулж ирдэг иргэд, аж ахуйн нэгжүүдийг хясан боогдуулах замаар тэрбум орчим төгрөгийн авлига авсан байх юм.Энэ үйлдлээрээ төрийн хуулийг зөрчиж авлига аваад зогсохгүй олон нийтэд муудсан, хугацаа нь хэтэрсэн бүтээгдэхүүн нийлүүлэх эрхийг өгч, монгол хүний эрүүл мэндэд, хүнсний аюулгүй байдалд тооцож болшгүй хохирол учруулж, заналхийлснээс өөрцгүй.

Тэд 21 ААН, иргэнээс 126 удаагийн үйлдлээр 702 000 000 төгрөг авсан болох нь мөрдөн байцаалтын шатанд тогтоогдсон. Үүнээс гадна бэлнээр авсан мөнгө хэд байгаа гэдэг нь тодорхойгүй байгаа юм. Тодруулбал, Э.Аззаяа, Н.Баярсайхан нарын албан өрөөнд нь нэгжлэг хийхэд сейф дүүрэн мөнгө, бие болоод гэрээс нь 230.800.000 төгрөг, 152.177 ам.доллар, 70.000 юань бэлнээр олдсоныг эд мөрийн баримтаар хураасныг бид хоёр жилийн дараа мэдлээ.

Асар их хэмжээний авлига авсан эрх мэдэлтнийг шийтгэсэн Шүүхийн шийдвэр олныг үнэхээр их бухимдуулаад зогсохгүй анхан, дунд, дээд шатанд шүүсэн шүүгчдийг шалгахыг шаардахад хүргэлээ.

Мэргэжлийн хяналтын ерөнхий газрын Экспорт, Импорт, Хилийн хорио цээрийн хяналтын газрын дарга Э.Аззаяа бол энэ авлигачдын гол зохион байгуулагч гэдэг нь тодорхой. Учир нь Э.Аззаяа газрын дарга, оймсон түрүүт Н.Баярсайхан түүний удирдлага дор ажилладаг хэлтсийн дарга.

Гэтэл шүүх гол зохион байгуулагч Э.Аззаяа, түүний гар хөл бролсон хурган дарга Т.Элдэв-Очир, С.Бүрэнтөс нарт холбогдох Эрүүгийн хуулийн тусгай ангийн 18.6 дугаар зүйлийн 1 дэх хэсэгт зааснаар хөөн хэлэлцэх хугацаа дууссан үндэслэлээр хэргийг хэрэгсэхгүй болгосон байх юм.

Хэргийн хөөн хэлэлцэх хугацаа одоо мөрдөж буй Эрүүгийн хуулийн 1.10 дугаар зүйлийн 2 дахь хэсэгт заасны дагуу гэмт хэргийн хөөн хэлэлцэх хугацааг гэмт хэрэг үйлдсэн өдрөөс эхлэн анхан шатны шүүхийн шийдвэр хүчин төгөлдөр болох хүртэл тоолохоор заасан байдаг. Шүүх байгууллагын гаргасан шийдвэрээс үзэхэд Мэргэжлийн хяналтын ерөнхий газрын Экспорт, Импорт, Хилийн хорио цээрийн хяналтын газрын дарга асан Э.Аззаяа нь Н.Баярсайханыг баригдахаас өмнө гэмт хэрэг үйлдээд шалгагдаж байсан байж болзошгүй байна. Ийн сэжиглэх үндэслэл нь ердөө энгийн. Хэрэг нь илрээд, шалгах явц зэрэг явж байхад яагаад Н.Баярсайханд ял оноосон болоод бусдыг хэрэгсэхгүй болгосныг хүлээн зөвшөөрөх боломжгүй юм. Хуулийг гууль болгож завхруулагч шүүгчдийг шалгая.

Олны анхаарал татсан, онц ноцтой, асар их хэмжээний авлига авсан хэргийг үйлдэгчид хөөн хэлэлцэх хугацаа дууссан гэх хуулийн зүйл заалтын цаана гэм зэмгүй мэт өнгөрсөөр байна.

Эрүүгийн хуульд нэмэлт, өөрчлөлт оруулах тухай, Эрүүгийн хэрэг хянан шийдвэрлэх тухай хуульд нэмэлт, өөрчлөлт оруулах тухай, Зөрчлийн тухай хуульд нэмэлт, өөрчлөлт оруулах тухай, Зөрчил шалган шийдвэрлэх тухай хуульд нэмэлт, өөрчлөлт оруулах тухай, Шүүхийн шийдвэр гүйцэтгэх тухай хуульд нэмэлт, өөрчлөлт оруулах тухай зэрэг багц хуулийн төслийг боловсруулж Засгийн газрын 2019 оны 7 дугаар сарын 03-ны өдрийн хуралдаанаар хэлэлцүүлэн, Улсын Их Хуралд өргөн мэдүүлэхээр тогтоод байгаа юм.

Уг багц хуулийн төслийн хүрээнд Эрүүгийн хуульд нэмэлт, өөрчлөлт оруулахдаа гэмт хэргийн хөөн хэлэлцэх хугацаатай холбоотой зохицуулалтыг боловсронгуй болгохоор тусгажээ.Тухайлбал, одоо хүчин төгөлдөр үйлчилж байгаа Эрүүгийн хуулийн 1.10 дугаар зүйлийн 2 дахь хэсэгт заасны дагуу гэмт хэргийн хөөн хэлэлцэх хугацааг гэмт хэрэг үйлдсэн өдрөөс эхлэн анхан шатны шүүхийн шийдвэр хүчин төгөлдөр болох хүртэл тоолохоор заасныг өөрчилж яллагдагчаар татах хүртэл хөөн хэлэлцэх хугацааг тоолохоор тусгаж УИХ-д өргөн мэдүүлэхээр тогтоод байгаа нь сайшаалтай.

Мөн Эрүүгийн хуулийн тусгай ангид хорих ялын доод хэмжээг зургаан сараас дээш, дээд хэмжээг гурван жил, түүнээс бага хугацаагаар тогтоосон, эсхүл зорчих эрхийг хязгаарлах ялын доод хэмжээг зургаан сараас дээш, дээд хэмжээг гурван жил, түүнээс бага хугацаагаар тогтоосон гэмт хэрэг хөөн хэлэлцэх хугацааг хэрхэн тоолох асуудал тодорхойгүй байсныг засаж, боловсронгуй болгохоор холбогдох зохицуулалтыг 2015 онд батлагдсан Эрүүгийн хуульд нэмж тусгах зэрэг холбогдох нэмэлт, өөрчлөлтийг тусгасан юм байна.

Энэ мэт хууль чангатгасан зүйл заалт оруулж буй нь сайшаалтай ч хуулийн зүйл заалтыг нэгийг нь нөгөөгөөр сөргүүлж, ял завших боломж бүрдүүлж, гэмтнийг гэмгүй мэт алхах боломжийг өгдөг шүүхийнхнийг яавал дээр вэ. Шүүгчдийг шүүх цаг нь аль эрт өнгөрсөн гэдгийг ахих дахин сануулъя. Шүүгчдийг шүүе.