“Зөрчлийн хууль”-ийг эсэргүүцэж Баянгол дүүргийн жижиглэнгийн худалдаа эрхэлдэг иргэд Хууль зүйн, Дотоод хэргийн яамыг ажлаа хийхийг шаардаж, өнөөдөр мэдээлэл хийлээ. Тэд “Зөрчлийн хууль”-ийн торгууль амьдралд нь хүндээр нөлөөлж, туйлдаж байгааг хэлж байв. Иймд торгуулийг уян хатан болгож, төлбөрийн хэмжээг олон хэлбэрээр тогтоох ёстой гэх байр суурийг илэрхийлсэн юм.

Хөдөлмөр эрхлэгчид торгуулахгүй гээгүй. Гаргасан зөрчилдөө таарсан торгууль л төлье

Үндсэн шаардлага нь

1. Зөрчлийн тухай хуулийн торгуулийн заалтад өөрчлөлт оруулж иргэдэд уян хатан сонголттой болгох,
2. Нийслэлийн Худалдаа үйлчилгээний журмыг батлах асуудалд яаралтай арга хэмжээ авах,
3. СХД-ийн 13-р хорооны нутаг дэвсгэр Хамбын-Овооны ойр орчим байгаа 40-өөд айл өрхийн тог цахилгааны асуудлыг шийдэх зэрэг шаардлагуудыг хүргүүлж байгаа бөгөөд хэрэв хүлээж авахгүй тохиолдолд тэмцлийн хурц хэлбэр болох өлсгөлөн зарлана гэдгээ хурлын үеэр мэдэгдлээ.

Зөрчлийн хууль бидэнд ахдаж байна

Хувиараа хөдөлмөр эрхлэгч С.Мишиг: “Би ганцаараа энэ хуулийг эсэргүүцэж байгаа хүн биш. Бид яагаад Зөрчлийн тухай хуулийг эсэргүүцээд байгаа вэ гэвэл тус хуульд зөвшөөрөлтэй худалдаа эрхэлдэг газар зөвшөөрөлгүйгээр худалдаа эрхэлбэл 50 нэгжээр торгоно гэж заажээ. Гэтэл энэ 50 мянган төгрөгийг яагаад 10-50 нэгж болгож болохгүй байгаа юм бэ. Ар гэрээ авч явж, амьдрахын тулд нэг улавч оймс зараад 50 мянган төгрөгөөр торгуулна гэдэг дэндүү харамсалтай. Алхам тутамд биднийг цагдаа нар хянадаг. Тэднийг ажлаа хийж байгааг бид буруутгахгүй. Гэхдээ амьдралд нийцэхгүй, хөрсөн дээр буугаагүй энэ хуулийн “золиос” цагдаа нар болсон шүү.

Тиймээс энэхүү хуулийг баталсан УИХ-ын гишүүдэд хуулийн заалтаа эргэж харж ард иргэдийнхээ дуу хоолойг сонсохыг шаардаж байна. Нүдээ нээж, чихнийхээ бөглөөсийг аваач. Энэ хууль Монгол Улсын Үндсэн хуулийг зөрчиж байна. Зөрчлийн хуулийн заалтууд хэтэрхий хатуу гэдгийг ХЗДХЯ-ны сайд Ц.Нямдорж хэлж байсан. Баячуудад үйлчилдэггүй хуулийг, борчууд мөрдөж, торгуулж байна. Дээрх хууль санаачилсан хүмүүс тэрхүү хуулийн заалтаа эргэж хараасай. Үнэндээ торгуулиар төсөв бүрдүүлдэг төр засгаас залхаж байна. Эцэст нь дахиад хэлэхэд жирийн мөрөөрөө яваа иргэдийн нуруун дээр хүнд ачаа болж байгаа хөрсөн дээрээ буухгүй байгаа Зөрчлийн тухай хуулийн зарим зүйл заалтыг эргэж харахыг хүсье” гэв.