“Монголын татвар төлөгчдийн үйлдвэрчний эвлэлийн үндэсний холбоо”-ноос өнөөдөр Нийгмийн даатгал, Эрүүл мэндийн даатгалын шимтгэл болон авлигын талаар мэдээлэл хийлээ.

Гутал худалдаж авбал ажлаа үргэлжлүүлэн хийх боломжтой

"Хүүхдийн төлөө амьдрах ухаан" төвийн захирал Т.Эрдэнэцэцэг: "Бид ажил хөдөлмөр эрхлэхэд хүндрэлтэй болсоор байна. Өөрөөр хэлбэл, жижиг хэлбэрийн авлигачид бидний үйл ажиллагааг хаан боогдуулж байна. Өнөөдөр авлигатай холбоотой зарим баримтуудыг зоригтойгоор дэлгэхээр шийдлээ. Эрүүл мэндийн даатгалын газартай манай байгууллага хамтран ажилладаг. Гэтэл сүүлийн үед ажил явуулахаа байсан. Ямар нэг төрлийн эм, эмийн төрлийн бүтээгдэхүүн, хувцас, гутлыг таарахгүй, авахыг хүсээгүй байхад ирж хүчээр “шахдаг”. Хэрвээ авахгүй бол ажил явуулахад ямар нэг байдлаар саад учруулдаг. Эрүүл мэндийн даатгалын газар ажлаа шударга явуулахаа байсан. Эрүүл мэндийн даатгалын газрын байцаагч Н.Гэрэлмаа гэдэг хүнээс 180 мянган төгрөгөөр албан хүчээр гутал авсан. Мөн тэрээр үнэгүй сувилуулах эрхийн бичиг, сүү, цагаан идээ авч шуудайтай хувцас ажлын цагаар шахсан нь төрийн албыг гутамшиг болгож буй жишээ юм. Мөн тус байгууллагын дарга байсан И.Энхбат 2017 онд хахууль авсан хэргээр ажлаасаа чөлөөлөгдсөн ч одоо ЭМД-ын газрын Хяналт шалгалтын газрын даргаар ажиллаж байна. Ийм авлигын нөхцөл байдалд ажилчид асар ихээр өртөж байгаа. Үүнийг нуулгүй ил тод гаргаж, эдгээр авлигачдаас салмаар байна. Эмзэг бүлгийн хүүхдүүдийн төлөө 27 жил ажиллаж байгаа алгын чинээ хүүхдийн байгууллага гутал худалдаж авч байж ажлаа чөлөөтэй хийх боломжтой болж байна. Ийм дарамттай нийгэмд амьдарч байгаа нь гутамшигтай" гэлээ.

Иймд тэд дараах асуудлаар арванхоёрдугаар сарын 4-ний өдрийн дотор Монгол Улсын Ерөнхий сайдтай уулзах хүсэлтэй байгаагаа илэрхийлэв.

1. Авлигын эсрэг тэмцэх тэмцлийг бүх нийтийн үйл хэрэг болгож хамтран ажиллах, ажлын хэсэг байгуулах
2. Зарим байгууллага, иргэдээс ЭМД, НД-ын хөрөнгөд учруулсан хохирлыг нэн даруй төлүүлэх, арга хэмжээ авах
3. НД-ын шимтгэлийг нэмэгдүүлэх асуудлыг түр зогсоож, нэмэх шаардлагатай болсон үндэслэлүүдийг дахин судалж, нийтэд ил тод болгох
4. Төрийн хяналт шалгалт, ААН-ийн тусгай зөвшөөрлийн тухай хуулиудад өөрчлөлт хийх, ажлын хэсгийг ТББ, иргэд, бизнес эрхлэгчдийн төлөөллийг оролцуулан даруй байгуулах
5. Дээд удирдлагаас эхлэн авлига, хээл хахууль авсан Нийгмийн халамж үйлчилгээний ерөнхий газар, ЭМД-ын Ерөнхий газрын бүтэц зохион байгуулалтыг шинэчилж, авлигад холбогдсон хүмүүст хуулийн дагуу арга хэмжээ авах
6. Мэдээллийн ил тод байдал, мэдээлэл авах эрхийн тухай хуулийн хэрэгжилтийг хангаж, илэрсэн зөрчил бүрт хариуцлага тооцдог болох

Нийгэмд бий болсон зохисгүй үйлдлийг зогсоохын төлөө “Авлигын эсрэг бүх нийтээр тэмцье” хугацаагүй хөдөлгөөнийг өрнүүлж, цаашид “жижиг” авлигачдын энэ мэт хэргийг баримттайгаар олон нийтэд хүргэж ажиллахаа тэд онцоллоо.