ШШГЕГ-ын 461-р Цагдан хорих байранд шүүгч амиа алдсан хэргийн талаар хуульчид мэдээлэл хийж байна. Тус хэрэг явдалтай холбогдуулан хуульчид Хууль зүй, дотоод хэргийн сайд Ц.Нямдоржийг ард түмнээсээ уучлал гуйж, хариуцлага хүлээн ажлаа хүлээлгэж өгөхийг шаардлаа.

Энэ тухай Хуульч Д.Оросоо хэлэхдээ, “ХЗДХЯ-ны харъяа хорих 461 дүгээр ангид саатуулагдан шалгагдаж байсан хуульч эмэгтэй амь насаа алдсан. Төрийн тусгай хамгаалалттай газар, төрийн байгууллагад Монгол Улсын иргэн амь насаа алдсан анхны тохиолдол биш. Та бүхний санаж байгаагаар ЗТХЯ-ны удирдах ажилтан, хуульч ажлын байран дээрээ амиа алдсан. Мөн дүүргийн Засаг даргын тамгын газрын удирдах албан тушаалтан ажлын байран дээрээ хутгалуулж биедээ гэмтэл авч байсан. Хамгийн сүүлд Увс аймагт цэргийн алба хашиж байсан хоёр ч байлдагч амиа алдсан. Энэ мөн л ХЗДХЯ-ны харъяа, Хил хамгаалах ерөнхий газарт хамаарах асуудал. Дээрээс нь Дорноговь аймгийн Зүүнбаян суманд байдаг цэргийн ангийн байлдагч амь насаа алдсан хэрэг шалгагдаж байна. Үүнээс харахад нийгмийг цочроосон гэмт хэргүүд цуврал хэрэг шиг гардаг боллоо. Зэрлэгшсэн нийгэм рүү явж байна.

Монгол Улсын иргэний үндсэн хуулинд заасан амьд явах эрх ноцтойгоор зөрчигдөж байна.

Иймд хуульчид бид зүгээр хараад сууж байж чадсангүй. Ноцтой хэргүүд ар араасаа гарсан байхад Хууль зүй, дотоод хэргийн сайд Ц.Нямдорж таг дуугүй суугаад байна. Олон мянган төрийн албан хаагч, талийгаачийн ар гэр, төрөл садан, нийгмийн бухимдлыг төрүүлж байна. Үнэн зөвөө тогтоолгохоор хуулийн байгууллагад очсон хүний амь нас эрсдчихээд байгаа явдалд Үндэсний аюулгүй байдлын зөвлөл яаралтай хуралдаж анхаарлаа хандуулах ёстой. Монгол Улсын иргэний амьд явах эрхийг хангах, хамгаалах чиглэлээр яаралтай зөвлөмж гаргах ёстой” гэлээ.

Мөн Хуульч, өмгөөлөгч Л.Болормаа хэлэхдээ, “Амь насаараа хохироод үлдчихсэн байхад яагаад хууль зүй дотоод хэргийн сайд мэдээлэл хийдэггүй юм. Яагаад ард түмнээсээ уучлалт гуйдаггүй юм. Амь насаа алдсан шалтгаан нөхцлийн талаар асуудал хөндөж тавьдаггүй юм. Амиа алдсан шүүгчийн хэргийн хувьд яагаад Баасан гарагт хорьсон бэ, яагаад амь насаа алдсанаас хойш долоон цагийн дараа ар гэрийнхэнд мэдэгдсэн бэ гэх мэтээр ноцтой зөрчлүүд гараад байна. Энэ талаар хуулийн салбарынхан яагаад мэдээлэл хийдэггүй юм бэ.

Мөн амь насаа алдсан хүмүүсийн талаар нийгэмд хар бараан мэдээлэл цацагдаж ар гэрийнхнийг нь давхар хохироож байгаа асуудал гардаг нь харамсалтай. Амьд явах эрх ноцтойгоор зөрчигдөж байгаа олон асуудалд иргэдийнхээ амьд явах эрхийг хамгаалж чадаагүй Хууль зүй, дотоод хэргийн сайд Ц.Нямдоржийг ард түмнээсээ уучлалт гуйж, сайн дураараа огцрохыг шаардаж байна” хэмээн ярилаа.