-“МОНЦЕМЕНТ БИЛДИНГ МАТЕРИАЛС” КОМПАНИ ҮЙЛДВЭРЭЭ ӨРГӨТГӨХ 5.2 ТЭРБУМ ТӨГРӨГИЙН ТОНОГ ТӨХӨӨРӨМЖИЙГ ТАТВАРААС ЧӨЛӨӨЛҮҮЛЖЭЭ-

Авлигатай тэмцэх газраас гаалийн албан татвараас чөлөөлөх үйл ажиллагааг шалгаж эхэлжээ. Тодруулбал, ЖДҮ-ийг дэмжих зорилгоор тоног төхөөрөмж, сэлбэг хэрэгслийг гаалийн татвараас чөлөөлөх хуультай байдаг. Гэтэл гаалийн татвараас чөлөөлөгдөх ёсгүй томоохон компаниуд хууль зөрчсөн байж болзошгүй үйлдлүүд илэрсэн байна.

Тухайлбал, үйлдвэрээ өргөтгөх 5.2 тэрбум төгрөгийн тоног төхөөрөмжийг татвараас чөлөөлүүлсэн том аж ахуйн нэгж байсныг үргэлжлүүлэн шалгаж байгаа тухайгаа АТГ-аас мэдэгдсэн юм. Гаалийн албан татвараас чөлөөлүүлэхэд УИХ-аар батлуулдаг учраас энэ асуудалд УИХ-ын гишүүдийн ашиг сонирхлын нөлөөлөл байж болзошгүй аж.

Анх 2017 оны хоёрдугаар сарын 9-ний өдөр жижиг, дунд үйлдвэрийн үйлдвэрлэлийн зориулалт бүхий тоног төхөөрөмж, сэлбэг хэрэгслийг гаалийн албан татвар, нэмэгдсэн өртгийн албан татвараас чөлөөлсөн хууль батлагдсан. Энэ нь жижиг, дунд үйлдвэрийг дэмжиж, ажлын байрыг нэмэгдүүлэх, импортыг орлох, экспортыг дэмжсэн бүтээгдэхүүн үйлдвэрлэх гэсэн үндсэн зорилготой.

Гаалийн албан татварын чөлөөлөх тухай хууль хэрэгжсэнээр арьс шир, ноос ноолуур, нэхмэл бүтээгдэхүүн, монгол гэр модон эдлэлийн экспорт нэмэгдсэн гэж үздэг. Улмаар өнгөрөгч 2018 оны эхний арван сарын байдлаар дээр дурдсан бүтээгдэхүүний экспорт 540.3 сая ам.долларт хүрсэн үзүүлэлт гарсан гэж дүгнэсэн.

Тус хууль батлагдаж хэрэгжсэнээр үнэхээр эерэг үзүүлэлт гарсан уу, гаалийн татвараас чөлөөлөгдөх ёстой жижиг дунд үйлдвэрлэгчид хамрагдаж чадсан уу, эсвэл хэн нэгэн эрх мэдэлтнүүдийн бизнесийн томоохон байгууллага, компаниуд татвараас зайлсхийсээр ирсэн үү гэдэг эргэлзээг нийгэмд төрүүлэв.

АТГ-аас дээр дурдсан мэдээлэлд, үйлдвэрээ өргөтгөх 5.2 тэрбум төгрөгийн тоног төхөөрөмжийг татвараас чөлөөлүүлсэн том аж ахуйн нэгж нь “Монцемент билдинг материалс” ХХК аж. Тодруулбал, 2019 оны нэгдүгээр сарын 03-нд Захиргааны хэргийн давж заалдах шатны шүүхээр ялагдсан тухай мэдээлэл нийтэд ил болжээ. “Монцемент билдинг материалс” ХХК нь Монполимет группийн охин компани юм. Тус компанийн захирлаар Н.Мөнхнасан ажилладаг билээ.

-АТГ: ХИЧНЭЭН КОМПАНИ ГААЛИЙН ТАТВАРААС ЧӨЛӨӨЛӨГДӨЖ, УЛСАД ЯМАР ХЭМЖЭЭНИЙ ХОХИРОЛ УЧРУУЛСАН НЬ ДАВАА ГАРАГТ ТОДОРНО-

Татвараас чөлөөлөх жагсаалтад 27 салбарын 641 нэр төрлийн тоног төхөөрөмжийг тусгасныг хэлэлцэн баталсан байдаг аж.

АТГ-аас гаргасан дээрх мэдээллийн мөрөөр бид хичнээн ААН, томоохон компаниуд шалгагдаж байгаа талаар тодруулахад “Одоогоор төчнөөн компани гаалийн татвараас чөлөөлөгдсөн, улсад тэдэн төгрөгний хохирол учруулсан эсэх мэдээлэл тодорхой болоогүй байна. Энэ мэдээллийн мөрөөр манай байгууллага дөнгөж гаалийн байгууллагаас холбогдох материалуудыг шаардаж шалгалтын ажиллагаагаа эхлүүлээд байна.

Ямар журмаар хэрхэн шалгаруулж гаалийн татвараас чөлөөлөгддөг тухай судална. Ирэх даваа гарагт асуудал тодорхой болчихно. Өөрөөр хэлбэл хичнээн компани байгаа эсэх нь тодорчих байх. Үйлдвэрээ өргөтгөх 5.2 тэрбум төгрөгийн тоног төхөөрөмжийг татвараас чөлөөлүүлсэн том аж ахуйн нэгжийн асуудал бол шүүхээр ороод шийдэгдчихсэн хэрэг. Шүүхийн шийдвэрээс мэдээллийг нь харж болох байх” гэсэн юм.

Удахгүй хичнээн том компани гаалийн албан татвараас чөлөөлөгдөж хууль зөрчсөн тухай мэдээллийн сураг дуулдах нь.