БНАСАУ-ын эрх баригчид улсынхаа баруун хойд хэсэгт байх Сохэ пуужингийн туршилтын полигон дээр нөхөн сэргээх ажил явуулж эхлэсэн гэнэ. Энэ талаар Вашингтоны Генри Стимсоны нэрэмжит төвийн дэргэд үйл ажиллагаа явуулдаг 38North цахим портал мэдээллээ.

Эх сурвалжийн мэдээлснээр, шинжээчид хиймэл дагуулаас авсан зургуудыг шинжлэн, улмаар Хойд Солонгосын эрх баригчид “пуужингийн хөдөлгүүр турших гарааны талбай болон полигон дээр нөхөн сэргээх ажил эхлүүлсэн” гэсэн дүгнэлтэд хүрсэн байна.

“Эдгээр объектуудыг нөхөн сэргээх ажлыг 2019 оны хоёрдугаар сарын 16-гуравдугаар сарын 2-ны хооронд эхлүүлсэн” гэж мэргэжилтнүүд таамаглаж байна. Мөн Пхеньян полигоныг буулгана гэж амласан ч өнгөрсөн оны наймдугаар сараас хойш ийм ажил хийгдээгүй гэж мэргэжилтнүүд онцолжээ.

Ийнхүү нөхөн сэргээх ажил эхлүүлсэн гэж үзэх болсон нь гарааны талбай дээр хоёр өргөгч кран байрлуулан, шинэ объект байгуулсантай холбоотой гэнэ. Пуужингийн хөдөлгүүр турших полигоны хэсэгт мөн хоёр өргөгч кран, барилгын материалууд аваачсан нь хиймэл дагуулаас авсан зурагнаас харагджээ.

Энд дуулгахад, Сохэ дахь пуужингийн хөдөлгүүр турших объект болон гарааны цогцолборыг буулгах ажлууд 7-8 дугаар сарын эхэн хүртэл үргэлжилсэн ч үүний дараа энгийн горимоор ажиллаж эхэлсэн гэж 38North сайт өнгөрсөн онд мэдээлж байлаа.

Хойд Солонгосын Тончхан-ни бүсд байх Сохэ туршилтын полигон нь Хятадтай хиллэдэг хилээс холгүйхэн, Пхеньянаас баруун хойд хэсэгт 200 км зайд, Йонбен дахь томооон цөмийн төвөөс 70 км зайд байрладаг юм. Энэ полигоноос 2016 оны хоёрдугаар сарын 7-ны өдөр хиймэл дагуултай “Кванменсон-4” пуужинг хөөргөж байв.

Б.АНАНД