Өнгөрсөн долоо хоногийн мягмар гарагийн орой хуралдсан Засгийн газрын ээлжит хуралдаанаар "Эрдэнэт" үйлдвэрт зургаан сарын хугацаанд онц байдал тогтоох шийдвэр гаргасан юм. Ингэхдээ үйлдвэрийн үйл ажиллагаанд саад учруулахгүйгээр зарим нэг санхүүгийн материалыг татаж үзэх шаардлагатай байгаа хэмээн ЗГХЭГ-ын дарга Л.Оюун-Эрдэнэ мэдэгдсэн. Улмаар шууд тэр өдрөө Эрдэнэтийг зорьсон байдаг.

Ийнхүү Эрдэнэт уулын баяжуулах үйлдвэрийг зорьсон автомашины цуваа Төв аймгийн Баянчандмань өнгөрч яваад 14 цагийн орчимд цувааны өмнө явсан приус-30 загварын автомашин эсрэг урсгалд явж байсан sonata загварын машиныг мөргөж ноцтой осол гаргасан байна. Ослын улмаас автомашин жалга руу унасан аж.

Харин осол болсон даруйд цуваа ослын газарт 30 секунт зогсоод цааш хөдөлгөөнөө үргэлжлүүлэн замдаа гарсан байгаа юм.

Тэрхүү осолд өртсөн приус загварын машины жолооч урд цонхоо мөргөж ухаан алдсан байсан гэх бөгөөд sonata загварын машины жолооч машинаасаа бууж ирээд газар дээрээ ухаан алдаж унасан тухай эх сурвалж хэлж байна. Ослын улмаас 30-40 насны дөрвөн хүн хүнд бэртэж ГССҮТ-д яаралтай хүргэгдсэн байна. Харин өчигдөр буюу энэ сарын 11-ний өдөр олон нийтийн цахим сүлжээнд дээрх ослоор хүнд бэртсэн Б нь шархаа даалгүй нас барсан хэмээн нийтэлжээ. Энэ талаар холбогдох албанаас тодруулах гэсэн боловч ийм мэдээлэл ирээгүй гэсэн хариу өгсөн юм.