-ТУС БҮР НЬ 63 САЯ ТӨГРӨГӨӨР БОССОН НИЙТИЙН БИЕ ЗАСАХ ГАЗАР АГААРЖУУЛАЛТ МУУТАЙ БАЙНА-

Өнгөрсөн долоо хоногт Сонгинохайрхан дүүрэгт орших “Хайрхан” хорооллын “Хайрхан” СӨХ-ны ажилтан бага насны хүүхдийг загнаж, дарамталж цамцаар нь шээс арчуулж буй зураг олон нийтийн сүлжээнд тавигдсан. Бага насны хүүхдэд зүй буй шаардлага тавьсан СӨХ-ны ажилтанд мянга, мянган хүмүүс твиттер, фэйсбүүк хуудсаар дамжуулан дургүйцлээ илэрхийлж, цагдаагийн байгууллагаас уг хэргийг шалгахаар болсон. Тухайн үйл явдлаас томчууд хүүхдүүдэд зөв үлгэр дуурайлал үзүүлээгүй, цаашлаад 1.5 сая хүн амтай нийслэл хотод Нийтийн бие засах газар /City toilet/ хангалттай байдаггүй нь харагдав. Иймд хүмүүс хаа таарсан газраа байшингийн булан тохойд "бие засдаг" гэх шүүмжлэл иргэдийн дунд тархаад байна.

Өнөөдрийн байдлаар Улаанбаатар хотод “Хот тохижилтын газар” ОНӨААТҮГ 19 нийтийн бие засах газар хуриуцдаг бөгөөд үйл ажиллагаа нь жигдрээгүй, амралтын өдрүүдэд ажилладаггүй гэсэн гомдол иргэдийн дунд байдаг. Бид нийтийн бие засах газрын /City toilet/ хэд хэдэн салбаар орж иргэдэд хэрхэн үйлчилж буйг сурвалжилахыг зорилоо. Хамгийн эхэнд 100 айлын барилгын материалын хажууд байрлах нийтийн бие засах газрын гадаа ирэв. Үүдэнд нь оймс, нүдний шил зарахаас гадна барилгын нэг хэсгийг түрээслэсэн байв.

Мөн хогийн шүүр, шалны мод, хүрз гээд янз бүрийн зүйлс зардаг нэгэн эмэгтэй сарын 250 мянган төгрөгөөр "City toilet"-ийн агуулах хэсгийг түрээслэдэг байна. Тэрбээр хэнээс түрээслэсэн, хаана мөнгөө өгдөгөө мэддэггүй, тогтмол өдөр нэг хүн ирж авдаг гэхээс өөр зүйл хэлсэнгүй. Ингээд нийтийг бие засах газар руу ороход бүгчим өмхий агаартай, цэвэрлэгээ хангалттай бус харагдав. Энэ газраар өдөрт 100 гаруй хүн үйлчлүүлдэг ихэнх нь барилгын материал зардаг хүмүүс. Тус газрын ажилтны хэлснээр "Нийтийн бие засах газар зарим талаараа хүндрэлтэй. Одоо болтол хүмүүс ийм газраар үйлчлүүлж сураагүй, бохир заваан бие засдаг. Цэвэрлэж амжаагүй байтал дараагийн хүмүүс нь орж ирээд загнадаг. Манай салбар ням, даваа гаригт амардаг. Бусад өдрүүдэд үйл ажиллагаа нь хэвийн явагддаг" гэсэн хариултыг өгч байлаа.

-НИЙТИЙН БИЕ ЗАСАХ ГАЗАР ӨДӨРТ 60-65 МЯНГАН ТӨГРӨГИЙН ОРЛОГОТОЙ-

Дараа нь хорооллын эцэс "Өргөө" кино театрын баруун талд байрлах "City toilet"-оор оров. Гаднаас ороход гэрэл муутай харанхуй бүүдгэр, зай талбай давчуу орчинтой. Дээрээс нь өмхий, арцны үнэртэй холилдон хүн үйлчлүүлэхийг аргагүй бохир агаартай аж. Эднийх бусад салбаруудаа бодвол үйлчлүүлэгч багатай мөн амралтын хоёр өдрөөр амардаг гэв.

Мөн л адил цэвэрлэгээ хангалтгүй, барилгын эргэн тойрон шээсэнд будагдсан, үүдэнд нь байрлах хогийн сав бохир заваан, эвдэрч хэмхэрсэн дүр төрхтэй. Үйлчлүүлж буй хүмүүс нь ч соёлтой боловсон биш гээд тоочоод байвал нийтийн бие засах газрын асуудал барагдахгүй их аж. Бид "Өргөө" кино театраас наашлан "Бөмбөгөр" худалдааны төвийн дэргэд үйл ажиллагаагаа явуулдаг "City toilet"-д ирэхэд хаалттай байв. Автобусны буудлын хажууд гар дээрээс наймаа хийдэг хүмүүсээс "Байнга хаалттай байдаг юм уу" гэхэд "Амралтын хоёр өдрөөр амардаг. Өнөөдөр "Бөмбөгөр" цэвэр, бохир усыг нь хаасан гээд ажиллахгүй байна" гэх хариултыг хэлж байв.

Нийслэл хотод үйл ажиллагаа явуулж буй "City toilet"-ийн гадна нялх хүүхэдтэй эхчүүд хүүхдээ хуурайлж болно гэсэн таних тэмдэгтэй байдаг. Гэвч бодит байдал дээр агааржуулалтгүй, өмхий үнэртэй, үйлчлүүлэхэд маш хүндрэлтэй байдаг талаар иргэд хэлж байна.

Тус бүр нь 63 сая төгрөгийн өртгөөр боссон нийтийн бие засах газар өглөөний 08:00 цагаас оройн 22:00 цаг хүртэл ажиллаж байна. Одоогоор нэг хүнд 200-300 төгрөгөөр үйлчилдэг. Орлогын хувьд байрлалаас хамаарч харилцан адилгүй байдаг аж.

Тухайлбал хотын төвд буюу УБИС-ийн дэргэдэх “Сити тойлет” үйлчилүүлэгч ихтэйн дээр дараалал үүсэх тохиолдол цөөнгүй. Өдөрт 60-65,000 төгрөгийн ашигтай ажилладаг. Баруун дөрвөн замын автобусны буудлын хажууд байрлах салбар нь өдөрт 30 мянган төгрөгийн орлоготой. Энэ 150 орчим хүн үйлчлүүлдэг гэсэн үг. Ийм хэмжээний орлоготой ажиллаж байхад цэвэрлэгээндээ анхаардаггүй нь хачирхалтай.

ГЭРЭЛ ЗУРГИЙГ Г.БАЗАРРАГЧАА