-НООС, НООЛУУР, АРЬС ШИР, МАХНЫ ҮНИЙГ ХЯТДУУД БАРЬЖ БАЙХАД ХҮНСНИЙ НОГООГОО ГАРТ НЬ ӨГӨХ ГЭЖ ҮҮ-

Энэ жил Монгол Улс, БНХАУ-тай дипломат харилцаа тогтоосны 70 жилийн ой болж байгаа. Үүнтэй холбогдуулж 10 бүтээлч ажил хийхээр болсон аж. Бүтээлч ажлын хүрээнд нийслэлийн нутаг дэвсгэрийн 50 га газарт хүлэмжийн аж ахуй эрхлэх зөвшөөрлийг БНХАУ-ын "Тяньжин" Фүүдс компанид өгсөн. Энэ шийдвэрийг эсэргүүцэж "Хятадын компани хүлэмж ажиллуулбал Монголын аж ахуйн нэгжүүдийг “унагах” хор уршигтай. Мөн хүнсний аюулгүй байдалд сөргөөр нөлөөлнө" хэмээн хүлэмжийн аж ахуй эрхлэгч, иргэдийн төлөөлөл тэмцсээр байгаа юм.

Хүлэмжийн аж ахуй эрхлэгчдийн хэлснээр "Монголчууд хэчнээн ядарч зүдэрлээ ч гэсэн эх орныхоо хөрсөнд ургасан хүнсний ногоогоор дотоодынхоо хэрэгцээг хангах бүрэн боломж бий. Өнөөдөр эс ч маргааш тэр боломж бүрдэнэ. Хятадаас импотоор орж ирдэг хүнсний ногооны чанар, эрүүл ахуйн талаар маш их эргэлзээ бидний дунд бий. Монгол хүний хоол хүнсний чанар үндэсний аюулгүй байдалтай холбоотой асуудал. Тэр дундаа манай мэргэжлийн хаяналтын байгууллагуудын хараа хяналт нь хэр билээ, аливаа эрсдлийн араас нь хашгирдаг газар шүү дээ. Хянаж шалгаад ч нарийн ширийнийг нь илрүүлж чадахгүй. Ийм байсаар байхад хятадуудын тарьсан ногоогоор хэрэглээгээ хангуулна гэж байгаа бол эх орноосоо урваснаас өөрцгүй.

Хятадуудад газар эзэмшүүлж хүнсний ногоо тариулбал ямар балаг авчирдагийн гашуун жишээ хойд хилийн цаана бий. Эрхүү мужид хүлэмжийн аж ахуй эрхэлж байсан хятадуудын талаархи ноцтой мэдээллийг санаж байгаа байх. Тэнд улаан лооль, өргөст хэмх тариалж байсан хятадууд газрыг там болгон хувиргаад явсан. Тэд дээрх нарийн ногоог хурдан ургуулахын тулд асар их хэмжээний химийн бодис ашиглаж, будагч бодисоор буддаг төдийгүй үлдээгээд явсан газрыг нь цэвэрлэж байсан ОХУ-ын онцгой байдлын алба хаагчид масктай байсан ч хордож ухаан алдаж байсан тухай тус улсын “Россия 1” телевиз мэдээлж байсан" гэх зүйлсийг өнгөрсөн гуравдугаар сараас хойш тоть шиг давтаж ярьсаар өнөөдрийг хүрсэн. Тэдний энэ тэмцэл үр дүнд хүрсэнгүй. Сонгинохайрхан дүүргийн 21 дүгээр хороо Дашрын аманд 50 га газар өгчихсөн "Тяньжин" Фүүдс хэзээ мөдгүй хүлэмжээ барьж тариалалт хийхэд бэлэн болжээ.

Энэ бүхнээс харахад Монгол Улсын төрийн бодлого ямар түвшинд явааг хүн бүр мэдэж байгаа. Малын түүхий эд болох ноос ноолуур, арьс шир, махны үнэ ханшийг өнөөдөр хятадууд л барьж байна. 70 сая малтай монголчууд өнөөдөр махныхаа үнийг дийлж идэхэд хэцүү боллоо. Ингээд хүнсний ногоо руу ороод ирвэл Монголчууд ходоодоо урд хөршөөрөө удирдуулна гэсэн үг. Ходоодыг нь барьчихсан байхад улс орны тусгаар тогтнол ойрхон гэдгийг иргэд хэлж буй юм. Монгол Улсын ерөнхийлөгч Х.Баттулга 50 газрын талаар ямар ч ойлголтгүй явсан нь саяхан болсон “Хүлэмжийн аж ахуй хөгжүүлэх цаашдын зорилго” сэдэвт хэлэлцүүлэгийн үеэр мэдэгдсэн. Ерөнхийлөгч ногоо тарьдаг сургалтын төв барих ажил гэсэн ойлголттой явсан нь дэндүү харамсалтай.

-МАШ ОЛОН ИРГЭДИЙН ӨВЛИЙН ХҮЛЭМЖ БАЙГУУЛАХ ГЭЭД ТӨСӨЛ БИЧИЖ ТЕНДЕРТ ОРОЛЦОХОД ХӨРӨНГИЙГ НЬ ШИЙДЭЖ ӨГДӨГГҮЙ-

Бид уг асуудлаар Монголын Хүлэмжийн фермер хөгжүүлэгчдийн нийгэмлэгийн тэргүүн Х.Алтанцацралтаас тодруулсан. Тэрбээр "Монголд жилийн дөрвөн улирлын хүлэмжийн аж ахуй эрхлэх гэж би олон жил зүтгэж ирлээ. Энэ туршлагынхаа дагуу би хятадуудын ногоо тарьдаг арга, технологийг сайн мэднэ. Хөрш, зэргэлдээ улсууддаа ч гэсэн ямар хор уршиг учруулж байгааг бид бүгд харж байна. Гэвч энэ тал дээр манай улсын төр засгийн зүгээс авч хэрэгжүүлэх гэж буй арга хэмжээ нь бүрхэг, хэн нь юу хийж, ямар шийдвэр гаргах гэж байгаа нь мэдэгдэхгүй юм. Надад маш олон аж ахуй эрхлэгч, хэрэглэгч иргэдээс тус асуудал дээр анхаарал хандуулж, нэгдэх хэрэгтэй гэсэн санал хүсэлтүүд ирсээр байна. Түүнээс гадна нарийн ногоо гэдэг нь боловсруулахгүй, түүхийгээр нь хэрэглэдэг хүнсний бүтээгдэхүүн. Хэрэв хятадууд орж ирвэл бидний хэрэглэдэг хоол хүнсэнд маш их химийн бодис, бордоо нэмэгдэнэ гэсэн үг. Энэ нь Монголын ирээдүй, үр хүүхэд болон хүнсний аюулгүй байдалтай шууд хамааралтай гэдгийг санах хэрэгтэй. Монголын хүлэмжийн аж ахуй эрхлэгчидэд жилийн дөрвөн улиралд ус, агаар, хөрсөө ашиглаад малынхаа бууцаар бордоод органик жимс ногоо тарих боломж байгаа. Өнөөдөр маш олон иргэд ААН өвлийн хүлэмжийн аж ахуйг эрхлэх гээд төсөл бичээд, янз бүрийн тендерт ороод мөнгө хөрөнгө нь шийдэгдэхгүй явж байна. -40 градусын хүйтэнд хүлэмжинд нь зөгий нисээд, гүзээлзгэнэ ургаж байгааг миний хүлэмжнээс харж болно. Монголд нарлаг хүлэмж маш сайн зохицно гэдгийг бид мэдэрчихсэн, хийгээд явж байна. Үүнийг хийж биеэрээ мэдэрсэн бид нар, очиж нүдээрээ харсан манай үйлчлүүлэгч нар мэднэ. Өнөөдөр монголын мянга мянган тариаланч, өрхийн тариаланчид, хүлэмж эрхлэгчид төр засгийн, салбарын системээр бодлогоор дутаж алдаж онож өр зээлтэй яваа. Хятадуудын өртөг багатай химийн бордоогоор тэжээж хүчээр ургуулдаг хүнсний ногоо, жимс монголын зах зээлд нийлүүлэгдээд эхлэхээр бид хүссэн хүсээгүй зах зээлээс арчигдана. Улмаар монгол хүн ногоо тарих боломжгүй болоод ирэхээр үнэ ханшаа өөрсдөө тогтоож эхэлнэ. Хүн амын хүнсний аюулгүй байдал төрийн хяналтад байх ёстой монгол хүн эрүүл амьд явахыг төр хангах ёстой. Хятад үндэстэн хаа очсон газраа суусан газраасаа шороо атгадаг дэлхийн бүх том хотуудад чайна таун бариад улс доторх улс болоод явж байна. Маш олон сөрөг үр дагавар, хор хөнөөлийг бий болгох ажлыг төр засгийнхан яагаад хийх гээд улайраад байна вэ гэдэг нь өөрөө хамгийн том асуудал" гэлээ.