Өнөөдөр УИХ-ын гишүүн Ж.Батзандан, Л.Болд нар ШШГЕГ-ын харьяа хорих дамжин өнгөрөх 401 дүгээр хорих ангийн эмнэлэгт хэвтэн эмчлүүлж буй Б.Содномдаржаа, Т.Чимгээ нартай ганцаарчилсан уулзалт хийлээ. УИХ-ын гишүүд хорих эмнэлэг руу 12.00 цагийн орчимд орсон бөгөөд гишүүд уулзалтаа дуусгаад 15.00 цагт гарч ирсэн юм.

Тэд хорих ангийн нөхцөл байдал болон Б.Содномдаржаа, Т.Чимгээ нарын биеийн байдал ямар байгаа талаар сэтгүүлчдэд мэдээлэл өглөө.

-ЭМЧИЛГЭЭНИЙ ЧАНАР ХАНГАЛТТАЙ БИШ ГЭДЭГ НЬ ХАРАГДАЖ БАЙНА-

УИХ-ын гишүүн Ж.Батзандан: Б.Содномдаржаа, Т.Чимгээ нартай ганцаарчилсан уулзалтуудыг түр хорооны гишүүд хийгээд гараад ирлээ. Т.Чимгээгийн биеийн байдал тааруу. Олон сар шулуун гэдэснээс нь цус алдаж байгаа гэнэ. Нилээн тамир муутай байна. Энэ тухай хорих ангийн дарга болон эмч нартай ярилаа. Хүний хүүхдийг хилсээр хэлмэгдүүлж, авчирч хорьчихоод аминд нь хүрвэл хүлээж авахгүй шүү гэдгийг хорих ангийн эмч, дарга нарт хатуухан хэллээ.

Мөн эрүүл мэндийн нарийн шинжилгээнд оруулах саналаа ч хэллээ. Эрүүл мэндийн үйлчилгээг сайжруулах чиглэлд арга хэмжээ авч ажиллана гэдгээ хорих ангийн дарга нар хэлж байна. Б.Содномдаржаагийн биеийн байдал ч мөн тааруу, тамирдсан, ядарсан, цөхөрсөн шинжтэй харагдаж байна.

-Эмчилгээ хийж байгаа нь хэр үр дүнтэй байна вэ?

-Эмчилгээ хийж байгаа гэж хорих ангийн зүгээс хэлж байна. Эмчилгээний чанар хангалттай биш гэдэг нь харагдаж байна. Эдгээр хүнийг дөрвөн жил хорьж байна. Ямар ч гэм зэмгүй хүнийг авчраад зодож балбаад, ямар ч халаалтгүй өрөөнд хорино гэдэг бол эрүүдэн шүүх том хэлбэр. Дээрээс нь хэргээ хүлээ гээд эмэгтэй хүний хорих өрөөнд эрэгтэй шалдан нүцгэн хүн оруулаад архи өгөөд зодсон нь эрүүдэн шүүх хэлбэр мөн биздээ.

-ШИНЭЭР ИЛЭРСЭН НӨХЦӨЛ БАЙДЛЫН ХҮРЭЭНД НЭН ДАРУЙ СУЛЛУУЛАХ, ЦАГААТГАХ АЖЛЫГ ХИЙНЭ-

-Түр хорооны зүгээс ямар ч байсан нөхцөл байдалтай танилцлаа. Дараа нь ямар ажил хийх вэ?

-Гэм зэмгүй хоёр иргэн хэлсээр хэлмэгдэж хоригдож байгаа гэдгийг түр хороо олон баримтаар тогтоож байна. Түр хорооны долоон гишүүн уулзах ёстой хүмүүстэй удаа дараа уулзлаа. Тухайлбал, ар гэр, бүх өмгөөлөгч нартай уулзсан. Мөн холбогдох материалуудтай танилцаж байна. Т.Чимгээ, Б.Содномдаржаа нар бол хэлмэгдсэн хүмүүс юм.

Удахгүй шинээр илэрсэн нөхцөл байдлын хүрээнд нэн даруй суллуулах, цагаатгах ажлыг хийж байна. Одоо түр хорооны ажилд саад болж байгаа Дээд шүүхийн хэдэн шүүгч, захиалагч нар байна. Түр хорооны ажлыг саатуулах гэж оролдож байна. Гэвч бид бууж өгөхгүй. Цагаатгахын төлөө явна. Өнөөдөр гэм зэмгүй хоёр хүн хууль ёсны эрхээ эдэлж эрх чөлөөтэй болох ёстой” гэв.

-ААВ ҮР ХҮҮХДҮҮДЭД НЬ МЭНДИЙГ НЬ ДАМЖУУЛСАН ХҮН ЁСНЫ УУЛЗАЛТ БОЛЛОО-

УИХ гишүүн Л.Болд: Маргааш эх үрсийн баярын өдөр. Т.Чимгээ хоригдож байх хугацаандаа нэг хүүхдээ алдсан. Гурван хүүхдийн ээж. Б. Содномдаржаа найман хүүхдийн аав. Тэгэхээр эх үрсийн баярыг энэ хоёртойгоо хамт тэмдэглэж, тэдний ээж, аав үр хүүхдүүдэд нь мэндийг нь дамжуулж хүн ёсны уулзалт боллоо. Бид нар нэг жилийн өмнө уулзаж байсан. Тэр үеийнхээсээ мэдээж сэтгэл санаа дээрдсэн байна. Янз бүрийн мэдээлэл ирж байгаа юм байна. Гэхдээ эрүүл мэндийн хувьд маш ноцтой байгааг харуулж байна. Энэ цагаас хойш эрх нь хохирч байгаа энэ хоёр хүний төлөө нийт ард үмний хөдөлгөөнийг өрнүүлж байна. Бүх хүн гарын үсгээ зурж нэгдээрээ гэж уриалж байна. Ингэснээрээ шударга ёсны нэг ялалт бий болж өнөөдөр гэм зэмгүй хүмүүс эрх чөлөөгөө эдлэх ёстой. Өнөөдөр эрүүдэн шүүсэн хүмүүс нь гавъяа байгуулсан юм шиг хэд хоног байцаагдаад гарч байна.

Энэ олон жил, энэ олон аылын амьдрал сүйрүүлсэн. Монголын нэрийг барьсан зандалчдын хэрэг явсаар байна. Үүнийг цаашид нэг ч хоног тэвчихгүй. Цагаатгахын төлөө бүх хүч чадлаараа ажиллана.

-ХҮҮХДИЙГ НЬ ОРШУУЛСАН ӨДӨР БАЙЦААЛТ АВСАН БАЙГАА ЮМ-

-Эрүүдэн шүүсэн гэх хэрэгтэй холбоотой өөр мэдээлэл сая уулзалтаар өгсөн үү?

-Нийт 400 гаруй хоног явагдсан. Гэхдээ 100 гаруй хоногийн бичлэг байгаа. Т.Чимгээ бол дахин нотолж байна. 100 гаруй хоног нэг богино өмдтэй, нэг нимгэн фодволктай хүйтэн өрөөнд хөлдөөж алах шахсан байгаа юм. Мөн эмэгтэй хүнийг дотуур, хувцсаа ч солих эрхгүй, усанд орох эрхгүй 100 гаруй хоног эрүүдэн шүүсэн байна. Б.Содномдаржааг бол бүүр тэрнээс илүү нөхцөлд байлгасан байгаа юм.

Үр хүүхэд нь өнгөрчихөөд байхад оршуулганд нь оруулна гэсэн найдлагатайгаар яг оршуулдаг өдөр нь байцаалт авсан. Уйлсан, гутарсан сэтгэлтэй байхад нь байцаалт авсан гээд та нар боддоо. Өдөр тутам эм өгч, архи уулгасан. Тэр архиндаа мансууруулах бодис хийж тасраад унангуут нь шалдалж байгаад ээлжилж бичлэг хийсэн байгаа юм. энэ мэтчилэн уйлаад бүх юмаа ярилаа. Өөрсдийнх нь зөвшөөрлөөр дахин боломжтой хэсгээс нь олон нийтэд дэлгэх үү гэсэн хоёулаа зөвшөөрлөө.

-Түр хорооны зүгээс хавтаст хэргийг ил болгох уу?

-Хавтаст хэрэг дийлэнх хэсэг нь ил болсон гэсэн шийдвэр гарсан байгаа. Засгийн газар нь хавтаст хэргийг дийлэнхийг нь ил болгочихоод байхад Тагнуулын байгууллага хавтаст хэргийн тодорхой болох Шүүхийн шийдвэрийн тогтоолын нэгдүгээр өгүүлбэр ил болоогүй гэх мэтчилэн худал бичгийг прокурорын байгууллага руу явуулсан байдаг. Бид прокурорын байгууллага дээр очоод хавтаст хэргүүдтэй танилцах гэсэн боловч ил болсон гэх нэртэй бүгд нууцын зэрэглэлтэй байна. Засгийн газрын шийдвэрийн эсрэг Тагнуулын байгууллага ажиллаад байна. Ийм учраас Монгол улсын ерөнхий сайдад бид хүсэлт явуулсан. Ил болох хэсгийг нуух сонирхол Тагнуулын байгууллагад байгаа гэдийг хэлмээр байна.