Увс аймгийн иргэн, “Аянгат тэнгэр” ХХК-ийн захирал Д.Баянмөнх долоон настай охиноо ОХУ-ын талд алдах гээд байна хэмээн манай сайтад хандлаа. Тэрбээр хэдэн жилийн өмнө ОХУ-д тува бүсгүйтэй хамтарч амьдарч байхдаа охинтой болжээ. Улмаар Монголд буцаж ирчихээд буцаад эхнэр охин руугаа явах гэтэл виз нь гараагүй хар тамга дарчихсан гэнэ. Ингээд охин эхнэр хоёртойгоо уулзах гэж удаан хөөцөлдөж ОХУ-д очиход эхнэр нь бусдын гарт амиа алдсан, охин нь асрамжийн газар очсон байжээ. Тиймээс охиноо аваад Монголд ирсэн аж. Харин одоо тэр хоёр дахь амьдралаа зохиож, Увс аймагт эхнэр болон охины хамт амьдарч байгаа юм байна.

Гэтэл нэг л өдөр Тувагийн албаны хүмүүс, Увс аймгийн цагдаагийн хэлтэс, Гэр бүл хүүхэд залуучуудын хөгжлийн газрынхан ирж, охиныг гэрээс нь хүчээр авч явсан бөгөөд аймгийн Гэр бүл хүүхэд залуучуудын хөгжлийн газрын хамгаалалтын байранд “хориод” байгаа гэх мэдээллийг охины аав Д.Баянмөнх өгч байна.

Тэрбээр “Надтай хувийн өс хонзонтой Г гэх иргэн намайг аль болж бүтэхгүй муу муухайгаар энд, тэнд яриад явсан. Эцэстээ миний охиныг надаас салгах шалтгаан болоод байна. Тэр хүн юу гэж ярихаараа ОХУ-ын Парламентын гишүүний чихэнд тийм үг хүрдэг байна гэж гайхаж байгаа. ОХУ-ын Тува Улсын парламентын гишүүн намайг Увс аймгийн засаг даргад “хар тамхины наймаачин” гэж хэлсэн байна. Охиныг минь надаас салгаж байгаа нэгдүгээр шалтгаан энэ. Хоёрдугаарт, ОХУ-ын талаас надад “Хүүхдийн асран хамгаалагч мөн” гэсэн бичиг өгөөгүй гэдэг шалтгаан. Мөн намайг төсрөн охиноо хүчирхийлдэг байсан гэсэн мэдээллийг Увс аймгийн цагдаагийн газар өгсөн байсан. Шүүх эмнэлгийн байгууллагын дүгнэлт болон цагдаагийн байгууллагын шалгалтаар охиноо хүчирхийлээгүй, намайг гүтгэсэн болох нь тогтоогдсон. Намайг охинтой минь уулзуулахгүй байна. Иргэдийнхээ эрх ашгийг хамгаалах ёстой байгууллагууд яагаад ажлаа хийхгүй байгаа юм бэ. Миний охин юу ч мэдэхгүй нялх. Зовж гүйцлээ.” Хэмээн ярьсан юм.

Д.БАТСАЙХАН: ЭНЭ АСУУДАЛ ХУУЛЬ ДҮРМИЙН ДАГУУ ШИЙДЭГДЭХ БАЙХ

Бид энэ асуудлаар мэдээлэл авахаар Увс аймгийн Засаг дарга Д.Батсайхантай утсаар холбогдлоо.

-Охиноо ОХУ-д алдах гээд байна гэж иргэн манай сайтад хандлаа. Та мэдээлэлтэй байна уу?

-Их төвөгтэй хүн юм билээ. Над руу элдэв янзаар дайраад, Монгол хүнийхээ талд ажиллахгүй байна гэж орилж хашгичаад байсан. ОХУ-аас хууль ёсны дагуу хүнээ авна гэж байхад аймгийн засаг даргын хувьд би яаж ч чадахгүй. Бүх зүйл хуулийн хүрээнд шийдэгдэнэ гэж хэлсэн. ОХУ-ын Тувагийн Засгийн газраас тэр хүүхдийг хамгаалалтад ав. Танай улсад хэцүү байдалтай амьдарч байж магадгүй юм байна гэж нодлингоос хойш яригдаж байгаа асуудал. Энэ охин 100 хувь ОХУ-ын иргэн юм билээ. Д.Баянмөнх гэж энэ хүн шууд очоод л асрамжийн газраас аваад ирсэн юм билээ.

-Энэ хүнийг охиноо хүчирхийлэхийг завдсан гэсэн мэдээллийг бас ОХУ-ын талд хүргэсэн байснаас бүх зүйл үүдэлтэй гэж О.Баянмөнх ярьж байна. Та энэ талаар ямар мэдээлэлтэй байна?

-Тийм зүйл яригдаж байсан. Гэхдээ хуулийн байгуулагаар тийм зүйл болсон гэж нотлогдоогүй юм билээ.

-Тэгээд хуулийн дагуу гээд энэ охиныг ааваас нь салгах ёстой юу?

-Хууль дүрмийн дагуу ажлын хэсэг байгуулагдсан. Тагнуул, Гадаад харилцааны яам, ОХУ-ын Консул гээд бүх холбогдох газрууд хамтраад энэ охиныг ОХУ-руу буцааж авахаар ажиллаж байгаа юм билээ. Ер нь бол энэ асуудал хууль ёсныхоо дагуу л шийдэгдэх байх. Д.Баянмөнх гэж энэ хүнд охины аав гэсэн ямар ч шүүхийн шийдвэр, тогтоол байхгүй. Зөвхөн биологийн хувьд эцэг нь гэдгийг нотлоод хуулийн өмнө хүчин мөхөсдөж байгаа юм. Охиныг ОХУ-ын талаас авчирахдаа асран хамгаалагч мөн гэж нотлох баримт бичиг авчраагүй юм байна.

Ж.БЯМБАДОРЖ: ОХИНЫГ ОХУ РУУ ГАРГАХГҮЙ

-Мөн бид ХЭҮК-ийн дарга Ж.Бямбадоржтой утсаар холбогдлоо.

-ОХУ охиныг нь авах гээд байна гэж иргэн манай сайтад хандсан. Танайх энэ асуудалд анхаарлаа хандуулж ажиллаж байна уу?

-Би яг одоо говийн сумуудад ажиллаж байна. Тэгсэн хэрнээ наад асуудлаар чинь цаг минут тутамд мэдээлэл авч, анхаарч ажиллаж байна. Бид бол тэр хүүхдийг хилээр гаргахгүй гэдгийг л хэлж байгаа.

-ОХУ-ын иргэн учраас хуулиараа гаргах ёстой болчихоод байгаа юм биш үү?

-Хоёр улсын Засгийн газар хооронд ярьж байж асуудал шийдэгдэх ёстой байх. Нэгдүгээрт хүүхэд Монгол Улсын нутаг дэвсгэр дээр байна. Хоёрдугаарт хүүхдийн эцэг эх хоёрын аль нэг нь Монгол Улсын иргэн бол хүүхэд Монгол улсын иргэн байна гэсэн хууль байна шүү дээ. Хэдийгээр энэ охины гэрчилгээ ОХУ-ынх ч гэсэн Монгол Улсын иргэн гэж төрсний гэрчилгээ, бичиг баримт авах эрх нь бүрэн байгаа байхгүй юу. Асуудлыг бүх талаас нь нягталсны дараа энэ асуудал нэг тийш шийдэгдэнэ. Энэ асуудалд холбогдох газрууд ажиллаж байна. Хүүхдийг гаргахгүй. Ингээд л болоо.

-Танайхаас охины аавтай холбогдсон уу?

-Манайхаас тодорхой мэдээллүүдийг бүгдийг нь авсан. Охины аав бас худлаа зүйл яриад яваад байгаа зүйл байгаа юм билээ. Манайхаас холбогдох газруудтай хамтарч ажиллаж байгаа. Олон улсын гэрээ конвенци байна шүү дээ. Санаа зоволтгүй.