Монгол Улсын Засгийн газрын 2018 оны 284 дүгээр тогтоолоор Улаанбаатар-Дархан чиглэлийн автозамыг дөрвөн эгнээ бүхий авто зам болгон өргөтгөн, шинэчлэх шийдвэрийг гаргасан ч өнөөдрийн байдлаар замын бүтээн байгуулалтын ажил удаашралтай товлосон хугацаанд ашиглалтад орохгүй нь тодорхой болсон. Уг 204.11 км авто замыг шинээр барих ажлыг 2019 оны 6 дугаар сарын 17-ны өдрөөс эхлүүлсэн бөгөөд 2019 оны 11 дүгээр сарын 30-нд ашиглалтад оруулна хэмээн холбогдох удирдлагууд удаа дараа мэдэгдэж байв.

1.7 тэрбум төгрөгийн өртөгтэй “түр зам” тавьсан нь зам тээврийн осол аваар гарах гол шалтгаан болжээ

Гэтэл Дарханы замын ажил эхнээсээ маш олон асуудлыг дагуулсан. Нэгдүгээрт, тендэрийн нөхцөлд Монголын авто замчдаа дэмжсэн ямар нэг бодлого, заалтуудыг оруулаагүй. Тавигдах шаардлага, технек тоног төхөөрөмж, санхүүгийн хувьд Монголын компаниуд дийлэхээргүй нөхцөлтэй байсан. Өөрөөр хэлбэл Монголын компаниуд нийлээд ч замын ажилд орох боломжгүй өндөр нөхцлийг тавьсан талаар бид өмнө мэдээлж байв. Хоёрдугаарт, шинэ замаа ашиглалтад оруулахын тулд 1.7 тэрбум төгрөгийн өртөгтэй “түр зам” тавьсан нь зам тээврийн осол аваар гарах гол шалтгаан болжээ. Тээврийн цагдаагийн албанаас өгсөн мэдээллээр 2019 оны 6 дугаар сарын 17-ны өдрөөс 8 дугаар сарын 31-н хүртэлх хугацаанд Дарханы замд нийт 83 зам тээврийн осол гарч, гэмт хэргийн шинжтэй 22 үйлдэл бүртгэгдсэнээс 8 хүн алтан амиа алдаж, 34 хүн гэмтэж, бэртжээ. Энэ бол цагдаагийн байгууллагад бүртгэгдсэн тоо. Үүний цаана тус замаар зорчиж буй олон иргэн эд материал, эрүүл мэндээрээ хохирч байгаа нь харамсалтай.

ЗТХЯ-ны эрхэм дарга эхнээсээ авилгын хэргээр цагдан хоригдож, иргэдийн мэдэх эрхэнд бүдүүлгээр халдаж байна

Иргэд энэ талаарх гомдол, мэдээллийг удаа дараа манай редакцид ирүүлсэн бөгөөд холбогдох удирдлагуудаас нь Дарханы замын ажил ямар шатандаа явж байгаа, хэзээ ашиглалтад орж, амар тайван, аюулгүй зорчих талаар тодруулж өгөхийг хүссэн юм.

Гэвч иргэд, болон сэтгүүлчийн мэдэх эрхийн хүрээнд Зам тээврийн хөгжлийн яамны хэвлэлийн төлөөлөгчөөр дамжуулан холбогдох газар, хэлтсийн дарга нараас Дарханы замын нөхцөл байдлын талаар тодорхой мэдээлэл авах гэсэн боловч “Дарга нар зам дээр ажиллаж байгаа” гэсэн тайлбарыг удаа дараа хэлж, мэдээлэл өгөхөөс зугтлаа.

Өөрөөр хэлбэл бүтэн сарын турш ЗТХЯ-ны хаалгыг сахиж дэд сайд Л.Халтар болон бусад удирдах албан тушаалтнуудаас мэдээлэл авч чадсангүй. Уг нь төрийн байгууллагын үйл ажиллагаа, улс эх оронд өрнөж буй бүтээн байгуулалтын ажил олон нийтэд ил байх ёстой. Гэсэн ч ЗТХЯ-ны эрхэм дарга нар эхнээсээ авилгын хэргээр цагдан хоригдож, иргэдийн мэдэх эрхэнд бүдүүлгээр халдаж байна.

Түүнчлэн Шилэн дансны тухай хуулиар төрийн байгууллагын аливаа төсөл хөтөлбөр, тендер, санхүүгийн тайлан нь олон нийтэд ил байх ёстой. Харамсалтай нь Дарханы замтай холбоотой тендерийн сонгон шалгаруулалт, зарцуулсан төсвийн мэдээлэл тус яамны вэб сайтад алга.

Энэ мэт үйл ажиллагаа, төсөл хөтөлбөрүүдийн мэдээлэлгүй, олон нийтэд мэдээлэл өгөхөөс эрс татгалздаг Зам, тээврийн хөгжлийн яамыг Засгийн газрын тэргүүн анхааралдаа авч, чиглэл өгөхийг хүсье.