-ХОТЫН УДИРДЛАГУУД ХУРГАН ДАРГА НАРЫНХАА ҮГЭЭР ҮГ ХИЙСЭЭР ӨВӨЛТЭЙ ЗОЛГОХ УУ-

Улаанбаатар хотын гэр хороололд 220 мянган өрх амьдардаг. Нэг өрхөд хамгийн багадаа гурван хүн амьдардаг гэж тооцвол 600 мянга хол давсан иргэд өвөл гал алдах уу, үгүй юу гэсэн айдастайгаар өвөлжилтийн бэлтгэлээ хангаж байна. Нэг ёсондоо нийслэлчүүдийн амь амьдрал 100 хувь шахмал түлшнээс хамааралтай болчихсон гэсэн үг. Намрын хяруу унав уу үгүй юу шахмал түлштэй холбоотой асуудлууд ар араасаа хөвөрч нэг айлд хоёр уутнаас илүү сайжруулсан түлш худалдахгүй гэж сүржигнэж эхлэв. Төд удалгүй Орчны бохирдлыг бууруулах үндэсний хорооны Ажлын албаны дарга Ч.Гантулга гэх нөхөр “Нүүрс түлж буй айл өрх, албан байгууллагын талаар мэдээлэл өгсөн иргэнийг шахмал түлшээр шагнана” гэж нэгэн хэвлэлд ярилцлага өгөв.

“Сэрэлт” кинон дээр гардаг шиг гэр хорооллын айл өрхүүд Ч.Гантулга даргад “Багш ээ, Бумаа гуайнх шөнө зуух руугаа түүхий нүүрс хийчхэж байдаг шүү. Яндангаас нь хар утаа олгойдоод л” ингэж хов зөөж шахмал түлшээр шагнуулах юм гэнэ. Уг нь ажлаа мэддэг удирдлагатай байсан бол матаасаар биш бодит байдалтай танилцаж, илчгүй, үнс их гараад байна гэх шахмал түлшнийхээ чанарыг яаж сайжруулах вэ гэдэгт толгойгоо гашилгаж суух цаг үе мэт. Гэтэл огт байрнаасаа хөдөлсөнгүй, арьсан сандал дээрээ шалз шиг шигдчихээд хурган дарга нарынхаа үгээр үг хийж нийслэлчүүдийг “Хов зөө” гэж дамшиглав.

Гэр хороололд амьдардаг 220 мянган өрх идэр ес эхлэхээр бүгдээрээ шахмал түлш худалдаж авна гэвэл эндүүрэл. Эдгээр өрхөөс хэд нь амьжиргааны түвшнээс доогуур орлоготой, хөлдөж үхэхгүйн тулд гарт баригдсан бүхнээ түлж дулаацна гэдгийг тооцсон болов уу. Нүүрсгүй нэг нь хаягдал дугуй, өнгөрсөн өвлөөс үлдсэн түүхий нүүрсээ түлнэ. Энэ бүхэнд хов зөөж шагнана гэвэл нийслэлчүүд өвлийг өнтэй давахгүй л болов уу. Өнөөдрийн байдлаар “Тавантолгой түлш” компани 180 мянган тонн сайжруулсан түлш бэлтгэсэн. Гэвч нэг сар гаруй хугацаанд хэрэглээд дуусах түлш. Намрын налгар цагт ховрын бараа болсон шахмал түлш өвөл нийслэлчүүд хүрэлцэх үү гэх асуулт гарч ирнэ. Тиймээс нөөцийг нэмэгдүүлж, худалдан борлуулах газрыг олон болгоход анхаарч, нэг хүнд хоёроос илүү шуудай сайжруулсан түлш зарахгүй гэдэг картын барааны үеийн хоцрогдсон аргаа зогсоохгүй бол өнөөдрийн энэ журам иргэдийг чирэгдүүлж гүйцэж байна.

Хөхөө өвлийн хүйтэнд осголтой нь биш дээ, дулаацахын тулд зуух руугаа нэг юм хийж л таарна. Дарга нараа хөрсөн дээр бууж ажлаа хийе.