Өнөөдөр Монголын ардчилал нэг зүтгэлтнээ, Монголын ард түмэн эх оронч хүүгээ алдсан өдөр. Одоогоос 21 жилийн тэртээх эл өдөр ардчиллын алтан хараацай нарын нэг С.Зориг бусдын гарт хэрцгийгээр хорлогдсон билээ. Түүний амийг егүүтгэсэн алуурчдыг олон жил эрж хайж, тэр тоолонд янз бүрийн таамаг дэвшүүлж, цагдаа хүчний байгууллагаас хариу шаардаж, улс төржин талцаж янз бүр болсоор хэдийнэ 21 жилийн нүүр үзжээ. Харин энэ хугацаанд амиа алдсан өдрөөр нь Төрийн ордон руу харц билчээн зогсох түүний хөшөөнд цэцэг өргөж, хүндэтгэл үзүүлдэг уламжлал нэгэнт тогтсон билээ. Тэр жишгээр өнөөдөр С.Зориг агсны хөшөөнд ардчиллынхан цэцэг өргөж хүндэтгэл үзүүлэв.

Ардчиллынхан гэдэг хаяг дотор анхны “партизанууд”, нийгмийн ардчиллын төлөө итгэл сэтгэлээр зүтгэж яваа үе үеийн төлөөлөл ирсэн харагдсан. Харин ар гэрийхнийх нь төлөөлөл байгаагүй. АН-аасаа өрх тусгаарлаж, шинэ нам байгуулсан УИХ-ын гишүүн Ж.Батзандан, Л.Болд нар үг хэлсэн.

УИХ-ын гишүүн Ж.Батзандан “Ардчиллын жинхэнэ бэлгэ тэмдэг болсон С. Зориг бусдын гарт амь үрэгдсэн тэр цагаас хойш ардчилал буруу замаар будаа тээж эхэлсэн гэж би боддог. Энэ хэргийг илрүүлэх сонирхол энэ засаг төрд байхгүй байна” гэсэн бол УИХ-ын гишүүн Л. Болд “Улс төрийн аллага гэж нэрлэж болох ийм харгис үйлдэл дандаа аравдугаар сарын 2-нд үйлдэгдсэн байдаг. Хэргийн жинхэнэ захиалагчийг хурдан илрүүлж, үнэн мөнийг тогтоох ёстой” гэсэн юм. Тэд хөшөөнд цэцэг тавьж, анд нөхрөө, хамтран зүтгэгчээ үгүйлэн дурссан хүмүүстэй уулзаж ярилцах нь харагдсан. Мөн үеэр арга хэмжээнд оролцохоор ирсэн УИХ-ын гишүүн О.Баасанхүүтэй уулзаж зарим зүйлийг тодруулсан юм.

-Аймшигт хэрэг гараад 21 жил өнгөрчээ. Цаг хугацаа өнгөрөх тусам бид энэ хэргийг мартаж байх шиг. Алуурчдыг олсон гэж Та боддог уу?

-Олсон ш дээ. Тэд хоригдож байгаа.

-С.Зориг агсны амь насыг бүрэлгэсэн гэх тэдгээр хүмүүсийг эрүүдэн шүүж хэрэг хүлээлгэсэн гэж үзээд байгаа биз дээ. Салбар хариуцсан сайд нь ингэж мэдэгдсэн. Хэрвээ тэд буруугүй юм бол яагаад суллахгүй байгаа юм бол?

-Хүн алсан хүмүүсийг яагаад суллана гэж. Тэд хэргээ хүлээсэн. Эрүүдэн шүүнэ гэдэг нь дараагийн асуудал ш дээ.

-Захиалагчийг нь зарлах хэрэгтэй гэсэн хүлээлт нийгэмд байгаа. Захиалагчаа мэдэхгүй, жирийн нөхдүүдийг аваачаад хилс хэрэгт хорилоо гэх хандлага ч байна?

-Харин тийм. Захиалагчаа эхлээд зарла гээд байх юм. Би хуульч хүн. Дэлхийн түүхэнд тийм юм байдаггүй л байхгүй юу. Энгийн жишээ хэлье л дээ. Таны ойр дотны хүнийг хэн нэгэн хөнөөж гэж бодъё. Бүр хүний захиалгаар буудчихаж. Тэгвэл юуны өмнө буудсан тэр алуурчныг барих ёстой биз дээ. Тэгж байж дараачийн алхмаа хийнэ. Чухамдаа хэний захиалгаар ямар зорилгоор хүний амь хөнөөснийг нь тогтооно шүү дээ. Яг тийм жишгээр л алуурчдыг эхлээд бариад яг захиалагчийг нь барих гэж байтал улс төр ороод л будлиантуулчихсан байхгүй юу. Тэгээд “Эрүүдэн шүүсэн” энэ тэр гэсэн асуудал босгоод гэмт хэрэгтнүүдийг ял завшуулах гээд байгаа хэрэг. Би бүр баталгаатай хэлнэ.

Цэцэг өргөх ёслолын үеэр бидний дунд ийм яриа өрнөв.

Юутай ч, “Монгол хүний саруул ухаанд ямагт итгэдэг” байсан, ардчиллын нэрт төлөөлөгч С.Зориг агсны амь насыг бүрэлгэсэн хэрэгтнүүд үнэн мөнөөрөө тогтоогдож, ийм жигшүүрт хэргийг захиалсан захиалагч нь илэрч, олон түмний сэтгэл хар сэрийн сэдэлгүй амгалан болох болтугай.