УИХ-ын чуулганаар Ард нийтийн санал асуулга явуулах, Монгол Улсын Үндсэн хуулийн нэмэлт, өөрчлөлтийн эхийг батлах тухай УИХ-ын 2019 оны 73 дугаар тогтоолд бүхэлд нь тавьсан Монгол Улсын Ерөнхийлөгчийн хоригийг хэлэлцэж байгаа. Энэ үеэр УИХ-ын гишүүн С.Эрдэнэ байр сууриа илэрхийллээ. Тэрээр “Би ч гэсэн Х.Нямбаатар гишүүнтэй адилхан харамсаж байна. Үндсэн хуульд нэмэлт өөрчлөлт оруулах шаардлагатай байгаа. Энэ хууль батлагдаад 20 гаруй жил болсон. Хуульд төгс төгөлдөр зүйл гэж байхгүй. Хуульд нэмэлт өөрчлөлт оруулах шаардлага гардаг. Өнөөдөр Үндсэн хуулийн нэмэлт өөрчлөлт оруулах асуудлыг ярьж байгаа гишүүдийг хараад байхад намын эрх ашгийн үүднээс юм ярьж байгаа юм шиг яриад байна. Үндсэн хууль гэдэг чинь Монгол Улсын нийт ард түмний эрх ашгийн асуудал болохоос биш төр барьж байгаа МАН-ы асуудал биш. 2016 оны мөрийн хөтөлбөрт оруулсан амлалтаа хэрэгжүүлэх үүднээс энэ Үндсэн хуульд өөрчлөлт оруулж байгаа юм шиг зүйл яриад байна. Мөрийн хөтөлбөрөө хэрэгжүүлж байвал юу ч хийсэн яахав гэсэн утга санаатай зүйлийг УИХ-ын гишүүн Бямбацогт яриад байна. Ийм хариуцлагагүй байж болохгүй гэдгийг хэлмээр байна.

Үндсэн хуулийн анхны хэлэлцүүлэг явахад Ардчилсан намаас шаардлага тавьсан. Энэ Үндсэн хуулийн асуудал хууль бус эхэлж байна шүү. Үндсэн хуулийн хэлэлцүүлэг Үндсэн хуулийг зөрчиж эхэлж байна. Үүнийгээ зогсоо, ард түмнээсээ асуу гэдэг анхааруулгыг удаа дараа өгсөн. Харамсалтай нь олонх гэдгээр түрүү бариад явсан. Одоо болохоор сөрөг хүчин хамаг юмыг гацаагаад байгаа юм шиг зүйл яриад байна. Танайх чинь манайхгүй шийдээд явах боломжтой. Бүрэн боломжтой хүч чадалтай нам юм болохгүй болохоор сөрөг хүчиндээ хамаг муу муухайгаа чихэж болохгүй л дээ. Үндсэн хуульд өөрчлөлт оруулах хоёрдугаар төслийн хэлэлцүүлэг ямар зүйл болсныг та нар өөрсдөө мэдэж байгаа. Жинхэнэ холион батлан болсон. Ийм зүйлийг УИХ-аар батлах боломжгүй болгонгуут ард нийтийн санал асуулгаар батлуулах заль хэрэглэж байна. Ард нийтийн санал асуулгаар баталсан гэдэг зүйлийг дараа ярих гэж байна. Ийм улс төрийн явуургүй заль хэрэглэдгээ болих хэрэгтэй. Ерөнхийлөгчийн тавьсан хоригийг хүлээж аваад Үндсэн хуулийнхаа алдаа завхралыг засаад явбал илүү оновчтой байх болно” гэлээ.