Байгалийн түүхийн музейг буулгаж, шинээр барих асуудал маргаан дагуулсан хэвээр байна. Засгийн газрын зүгээс Байгалийн түүхийн музейг нурааж, Их тэнгэрийн ам руу нүүлгэн, хуучин суурин дээр нь Чингис хааны музей байгуулахаар шийдвэрлэсэн. Харин түүх, соёлын үнэт өв болсон барилга, байгууламжийн хэлбэр дүрсийг алдагдуулахгүйгээр засч сайжруулах боломжтой, засвар үйлчилгээг хийхгүй байлгасаар ашиглалтаас гаргасан хэмээн нэр бүхий архитектур, урлаг соёлын байгууллагын төлөөлөл, төрийн бус байгууллагууд шүүмжилж байгаа.

БАЙГАЛИЙН ТҮҮХИЙН МУЗЕЙН БАРИЛГАД 2013 ОНД ҮЙЛ АЖИЛЛАГАА ЯВУУЛАХ БОЛОМЖГҮЙ ХЭМЭЭН АКТ ТАВЬЖ ЗОГСООЖ БАЙЖЭЭ

Байгалийн түүхийн музейн барилга 1952 оны зураг төсөлтэй. Хөдөө аж ахуйн техникумын барилгын зориулалтаар баригдсан бөгөөд хөдөө аж ахуйн техникумын байр байсан байна. ШУА-ийн Ерөнхийлөгч Б.Ширэндэв гуай “Энэ барилгыг музейн зориулалттай болгоё. Манайд том музей байхгүй байна” гэснээр шийдвэр гарч Байгалийн түүхийн музейн зориулалтаар ашиглаж эхэлсэн байна. Энэ барилга газар хөдлөлтийн эсрэг ямар ч бэхэлгээ, норм норматив, стандарт хангаагүй барилга. Иймээс Мэргэжлийн хяналтын газраас 2012 онд дүгнэлт гаргаж байжээ. Мөн 2013 онд ШУТИС-ийн оношлогоо, зураг төсөл, судалгааны “Реконстракшн” төвийн дүгнэлтийг үндэслэн “Үйл ажиллагаа явуулах боломжгүй” хэмээн акт тавьж зогсоож байсан байна. Учир нь барилгын суурийн тоосгонууд нь үйрсэн, даацын хана нь босоо хагарал цууралтай байжээ. Түүнээс гадна Байгалийн түүхийн музейн ард жижигхэн модон байшин байрладаг юм байна. Уг байшинг 1998 онд музейн нэг ажилтан хувьчилж авчээ. Удалгүй газрыг нь эзэмшихээр болсон аж. Тиймээс музейн барилгын нураахтай зэрэгцээд газрын маргааны асуудал дэгдэж эхэлжээ.

Байгалийн түүхийн музейг засварлах боломжгүй гэнэ. Учир нь баганын дээд талын чимэглэл нь хоёр гурав тасарч унасан байдалтай байна. Нэг нь 10 орчим кг хүнд жинтэй. Хүний толгой дээр унах аюултай. Иймээс Байгалийн түүхий музейг Их тэнгэрийн аманд томоохон талбайтай газар байгуулахаар төлөвлөжээ. Музейн барилгын ажил ирэх жилээс эхэлнэ. Гэхдээ Их тэнгэрийн газрын асуудал шүүх дээр маргаантай байгаа гэнэ. Учир нь тухайн газар дээр хувь компаниуд хөрөнгө оруулалт хийчихсэн байгаа юм байна. Энэ хөрөнгө оруулалтыг Ч.Сайханбилэгийн Засгийн газраас шийдвэр гаргаж, тэнд барилга барих зөвшөөрлийг өгчээ. Иймээс шүүхийн шийдвэр гарсны дараа ажил эхлэх юм байна.

ЧИНГИС ХААНЫ МУЗЕЙ БАРИХ ЗУРАГ ТӨСӨЛ БЭЛЭН БОЛЖЭЭ

Байгалийн түүхийн музейн энэ газар дээр Чингис хааны музей баригдана. Манайд өнөөдөр Чингис хаан судлал, Чингис хааны талаар үзэж харах зүйл үнэндээ байхгүй байгаа. Гэтэл Чингис хааны нэрээр Өвөр Монголд маш олон цогцолбор музей баригдчихсан байдаг. Харин бид 1990 оноос хойш Чингис хаан гэж 30 орчим жил ярьсан боловч өнөөдөр Чингис хааны хөшөөнөөс өөр зүйл байхгүй байгаа. Иймээс төрийн ордны дэргэд хотынхоо төвд Их хааны музейг байгуулах шийдвэр гаргасан. Энд ганцхан Чингис хааны биш, Монгол нутагт төрт ёс үүссэнээс хойших 2000 гаруй жилийн төрт ёсны түүх Модун Шаньюйгаас хойших их хаад, эзэнт гүрнүүдийн баялаг түүхийг өгүүлсэн том музей барина гэдгээр зураг төсөл нь бэлэн болчихсон байгаа аж. Энэ ажил удахгүй эхлэх юм байна.