Өнөөдрийн байдлаар нийслэл хотын хэмжээнд угаарын хийд хордсон гэх дуудлага цагдаагийн байгууллагад 200 гаруй бүртгэгдсэн. Өнгөрөгч амралтын өдрүүдийн тухайд, бямба гараг буюу аравдугаар сарын 12-ны 06:00 цагаас аравдугаар сарын 13-ны өглөөний 06:00 цаг хүртэл 15 өрхийн 37 иргэн эмнэлэгт хандсанаас, 20 иргэнд гэрээр зөвлөгөө мэдээлэл өгч бусад нь харьяа дүүргийн эмнэлэгт хэвтэн эмчлүүлж байна. Харин өчигдөр буюу ням гарагт угаарын хийд хордсон гэх 12 дуудлага цагдаагийн байгууллагад бүртгэгдэж, 32 иргэн угаартсан гэх мэдээлэл байна.

Угаарын улмаас нийт 129 өрхийн 364 хүн угаарын улмаас эмнэлэгт хандсан бөгөөд зургаан хүн амь насаа алдсан. Тэгвэл угаарын хийн хордлогоор 29 настай иргэн Г амиа алджээ. Тэрбээр өндөр настай аав, ээжийнхээ хамт байсан бөгөөд аав, ээж нь Цэргийн төв эмнэлгийн Хордлогын тасагт хэвтэн эмчлүүлж байна. Ээжийнх нь бие тогтворжсон бол аав нь ухаангүй байгаа аж. Талийгаач гурван сартай жирэмсэн байжээ.

Энэ талаар Нийслэлийн Онцгой байдлын газрын Гамшгаас урьдчилан сэргийлэх хэлтсийн дарга, хурандаа Г.Нэргүйгээс тодруулахад “ Одоогоор албан ёсны мэдээлэл ирээгүй байна” гэв.