Нийслэлийн зохих албан тушаалтнууд өнөөдөр ээлжит мэдээлэл өгөх үеэрээ “БЗД-ийн 17 дугаар хорооны иргэн 29 настай Г дуудлага өгөөд арван хормын дараа түргэний тэрэг очиход нас барсан байсан. Одоогоор угаарын хийнд хордсон эсэхийг тогтоох ажиллагаа явагдаж байна. Яагаад гэхээр нэг гэрт хамт байсан аав, ээжийнх нь биеийн байдал зүгээр хэвийн байгаа” гэж мэдээлсэн. Гэтэл үнэн хэрэгтээ талийгаач угаартсаныг түүний настай аав, ээж нь ч мөн угаарын хордлоготойгоор эмнэлэгт ирснийг нууцалсан байх юм. Тэр бүү хэл, талийгаач бүсгүй гурван сартай жирэмсэн байсан ажээ. Ээжийнх нь биеийн байдал арай дээр ч, аав нь ухаангүй байгаа гэнэ. Талийгаачийн төрөл садан хэвлэлд хандаж ярилцлага өгөхдөө “Аав ээжийнх нь биеийн байдал гэвэл ээж нь арай гайгүй, аав нь манарсан байдалтай юугаа ч мэдэхгүй байна. Эмч нартай нь уулзахаар “угаарт хордож ирсэн” гэдэг үг л хэллээ. Одоо тасагт гарчихлаа. Гэрт нь очиход цагдаагийнхан ирчихсэн, хаалга үүд, цонхыг нь онгойлгочихсон байсан. “Яагаад ингэсэн юм бэ?” гэсэн чинь “Та байж бай” гэсэн. Тэгээд би пийшин рүү нь очоод юу түлсэн юм бол гэж харсан. Нөгөө сайжруулсан шахмал түлш түлсэн байна лээ. Ер нь хүүхдээ өнгөрснийг мэдсэн юм уу, үгүй юм уу бүү мэд. Шууд л түргэнээр нааш нь аваад ирсэн юм байна лээ. Охин нь түргэн ирэхэд өнгөрчихсөн байсан юм билээ. Охины хувьд гурван сартай жирэмсэн байсан. Тэгэхээр одоо хоёр хүний амь л сүйдчихээд байна шүү дээ. Хэцүү байна. Би энэ бүхнийг шахмал түлшнээс л болж байна гэж бодож байна. Зурагт радиогоор гарахаар л хоргүй зүгээр гарсан гээд байдаг. Төр, засаг үүндээ сонголт хийлгэдэггүй юм уу. Ямар ч бэлтгэлгүй, шууд түлсэндээ л буруу байна ш дээ” гэсэн бөгөөд пийшингийнх яндан хавхлагагүй байсан гэдгийг талийгаачийн эгч хэлж байна. Бодит байдал дээр хүнээ алдсан хүн ингэж хэлж байна.

Гэтэл Нийслэлийн Онцгой байдлын газрын Гамшгаас урьдчилан сэргийлэх хэлтсийн дарга, хурандаа Г.Нэргүй ““Үхлийн шалтгаан нь угаарын хий гэхэд хэцүү. Яагаад гэвэл хамт амьдардаг 60 гаруй настай аав, ээж хоёрынх нь биеийн байдал хэвийн байгаа. Тэгэхээр нас барсан шалтгаан нь шүүх эмнэлгийн задлан шинжилгээ болон эрүүл мэнд, цагдаагийн байгууллагын үзлэг, шалгалтаар тодорхой болно” гэж мэдэгдэх болов оо. Түргэний тэргээр эмнэлэгт ирсэн хүмүүсийг яагаад биеийн байдал хэвийн гэж хэлэх болов. Нөгөө угаарын мэдээллийг нууцалж эхэлсэн гэдэг нь үнэн болж байгаа хэрэг үү.