Монголын урлагийн ертөнцөд олон сайхан уран бүтээл гаргаж өөрсдийн орон зайг бий болгосон хамтлаг бол “Гурван бүдүүн” хамтлаг юм. Өнгөрсөн есдүгээр сард хамтлагийн гишүүн А.Мөнгөншагай зам тээврийн осолд орж харамсалтайгаар амь насаа алдсан. Тэгвэл талийгаач андынхаа дурсгалд зориулан хамтлагийн гишүүд “30 хүрсэн бүсгүй” дурсамж, хүндэтгэлийн тоглолтыг зохион байгуулахаар болжээ. Тоглолтонд “Гурван бүдүүн” хамтлагаас гадна урлаг соёлын томоохон уран бүтээлчид оролцохоор болсон байна. Түүний хувьд Монгол орныхоо 21 аймгаар тойрч, “30 хүрсэн бүсгүй” тоглолтоо зохион байгуулаад хамгийн сүүлд Улаанбаатар хотдоо тоглохоор төлөвлөсөн байжээ.

Гурван бүдүүн хамтлагийн ахлагч Б.Учрахбаяр: “Зарим хүмүүс яагаад 49 хоногт нь багтааж тоглолт хийх гэж байгаа юм бэ гэж асууж байгаа. Талийгаач маань олон жил шашин номын мөр хөөсөн мундаг хүн байсан. Тийм учраас энэ хугацаанд өөрийнх нь бодож, зүтгэж явсан зүйлийг нь амжуулж хийхээр ажиллаж байна. Эцгийн хайрыг юу ч орлож чадахгүй ч хоёр хүүхдэд нь тоглолтоос олсон бүх орлогыг нь өгнө” гэсэн юм.

Дурсамж, хүндэтгэлийн тоглолтыг энэ сарын 23-нд “UB palace”-ын концертын их танхимд зохион байгуулахаар болжээ.