Монгол Улс, БНХАУ-ын хооронд дипломат харилцаа тогтоосны 70 жилийн ойн хүрээнд зохион байгуулагдаж буй шилдэг их дээд сургуулиудын боловсролын үзэсгэлэн яармаг өнөөдөр буюу 15-ны өдөр МУИС-ийн Номын санд зохион байгуулагдлаа.

Тус үзэсгэлэн нь Ази тивд зохион байгуулагдаж буй 2 дахь боловсролын үзэсгэлэн бөгөөд танилцуулгыг Монгол дахь албан ёсны төлөөлөгчид биш тухайн их дээд сургуулийн удирдлагууд болон багш нар өөрсдийн биеэр ирж хийснээрээ онцлог болсон байна. Үндсэн зохион байгуулагчаар БНХАУ-ын ЗГ-ын тэтгэлгийн хороо, БНХАУ-аас МУ-д суугаа элчин сайдын яам, МУ-ын БСШУСЯ ажиллалаа.

Үзэсгэлэнд БНХАУ-ын Чинхуа Их Сургууль, Вуханы Их Сургууль, Жежианы Их Сургууль, Хейлонжианы шинжлэх ухаан технологийн их сургууль зэрэг топ их сургуулиуд оролцсон байна. Нээлтийн үйл ажиллагаанд БНХАУ-ын ЭСЯ, БНХАУ-ын Тэтгэлэгийн хороо, МУ-ын БСШУСЯ, МУИС зэрэг байгууллагын төлөөлөл оролцжээ.