Эмили Замурк гэх орон гэргүй, гуйлгачин бүсгүй гурван долоо хоногийн өмнө гэхэд Лос-Анжелес хотын 60 гаруй мянган гэр оронгүй хүмүүсийн нэг байсан бөгөөд ойролцоогоор 2-3 жил гудамжинд амьдарчээ. ЗХУ-д социализм систем задран унаснаас хойш АНУ-д нүүж ирсэн Эмили Замурк бүсгүй хоёр жилийн өмнөөс метроны буудалд дуулж эхэлжээ. Тэрээр “Өөрт нь үлдсэн цорын ганц зүйл түүний хоолой” гэж боддог учраас мөнгө олохын тулд үүнийг хийдэг байсан байна. Гэтэл түүний амьдралд санаанд оромгүй зүйл тохиолджээ. Эмили хэлэхдээ “Намайг метроны буудалд дуулж байхад нэгэн цагдаагийн офицер над руу ирж байгааг харсан. Цагдаагийн офицерт миний дуулах маш их таалагдсан” гэж хэлээд дууг маань утсан дээрээ бичиж болох эсэхийг асуусан” гэжээ. Удалгүй Лос-Анжелес хотын цагдаагийн газрын инстаграм хуудсанд түүний бичлэгийг байршуулсан байна. Богино хугацаанд нэг саяас их хүн үзэж “метроны дуучин” нэрээр хүмүүсд танигдаж эхэлжээ.

Үүний дараагаар тэрээр анх удаагаа нэгэн арга хэмжээнд дуулахаар болов. Энэ нь түүний анхны тайз байсан юм. Эмили тайзан дээрээс “Надад хангалттай бэлдэх цаг байсангүй. Би метроны буудалд дуулдаг байсан дуугаа дуулбал та бүхэн хэрхэх бол” хэмээгээд Италийн алдарт “O mio babbino caro” дууг дуулжээ. Түүний үзүүлбэрийн дараахан Грэммигийн шагналт хөгжмийн продюсер Жоел Даймонд 52 настай Эмилид хамтран ажиллах санал тавьсан байна. “Эмилигийн түүх бол мөрөөдөл яаж биелдгийг харуулсан үйл явдал” гэж Даймонд “CNN”-д өгсөн ярилцлагадаа дурдсан байна.

Мөн “GoFundMe” кампанит ажлын хүрээнд гэр оронгүй хүмүүст болон Эмили Замуркд туслах зорилгоор одоогоор 80 мянган ам.доллар цуглуулаад байна. Тэрээр “Миний төлөө бүхнийг хийж, одоог хүртэл туслахыг хичээж байгаа бүх хүнд чин сэтгэлээсээ баярлалаа” гээд өөрийн энэхүү түүхийг бусдад болон гэр оронгүй хүмүүст итгэл найдвар өгнө гэдэгт итгэлтэй байгаагаа илэрхийлсэн байна.

Эх сурвалж: CNN