Наймдугаар Богд Жавзундамба хутагтын түмэн өлзий гийсний 150 жилийн ойн ёслол, хүндэтгэл нөгөөдөр буюу арваннэгдүгээр сарын 04-ний өдөр болох гэж байна. Шороон гахай жилийн намрын адаг сарын шинийн наймны билэгт сайн эл өдөр Гандантэгчэнлин хийдийн Батцагаан цогчэн дуганд 08:00 цагт Богд Жэвзүндамба хутагтуудын дончод хурал хурж, ёслол хүндэтгэлийг нээж Монголын Бурхан шашинтны төв Гандантэгчэнлин хийдийн тэргүүн их хамба лам, гавж Д.Чойжамц, Монгол Улсын Ерөнхийлөгчийн зөвлөх Ц.Хулан, доктор, профессор О.Батсайхан нар үг хэлснээр үйл ажиллагаа эхлэх аж. Тэрчлэн Богд Жавзүндамба хутагтын түмэн өлзий гийсний 150 жилийн ойд зориулсан үзэсгэлэнгийн нээлтийн дараа “VIII Богд Жэвзүндамба хутагтын шашин номын үйл хэрэг” эрдэм шинжилгээний бага хурал болох юм байна.

Эрдэм шинжилгээний хуралд докторант Х.Бямбажав “Номгоны сүмийн Дара эх ламтаны VIII Богд Жавзүндамба хутагтын намтар”, доктор З.Лонжод “1915 оноос эхлэн Хан уулын хоёр амыг тахих болсон тухай”, гавж Н.Нанзаддорж “Богд гэгээний намтар түүхэнд холбогдох баримт сурвалжийн мэдээ”, доктор Г.Дашням “Богд хаан, Жанжаа хутагт нарын харилцсан нэгэн захидлын тухай”, доктор З.Нинжбадгар“Жибзундамба хутагтын шавийн захиргаа: Эрдэнэшанзудбын тушаалын тухайд /XVII-XX зууны эхэн”, Бурханы шашны соёл судлалын хүрээлэнгийн захирал, доктор Г.Мягмарсүрэн“Богдуудын анхны зарлиг зохиолын тухай”, доктор Б.Няммягмар“Богдын ногоон ордон ба Шамбалын номлол”сэдвүүдээр илтгэл тавина.

Үдээс хойшхи хуралдааныг Гандантэгчэнлин хийдийн да лам Х.Бямбажав даргалах бөгөөд Монголын бурханы шашны дээд сургуулийн дэд захирал, докторант Б.Жамбал “Лувсанжамба ламын зохиол дахь түүхэн үйл явдалд холбогдох зарим мэдээ”, Варшавын их сургуулийн багш Р.Бямбаа “VIII Богд гэгээн, Эх Дагина, Банчен богд нарын харилцсан захиа бичгийн тухай”, магистр Т.Ганзориг “Хансүр цорж Агваандондүвийн VIII Богд гэгээнд зориулсан магтаал залбиралд хийсэн ажиглалт”, докторант Б.Соронзонболд “Хансүр цорж Агваанлувсандондүвийн Богдод зориулан зохиосон хоёр залбиралын тухай”, докторант Б.Идэрбаяр “VIII Богдын улс төр нийгмийн сэтгэлгээ, түүний зохиол бүтээлд туссан нь”, докторант Н.Амгалан “Жавзүндамба ринбүчийн Дөрөвдүгээр дүрээс эхлэж Долдугаар дүр хийгээд Наймдугаар дүр нугуудын зохиолын тэмдэглэл хэмээх сурвалжийн мэдээ” сэдвээр тус тус илтгэл тавих аж.