Монгол Улс “Саарал жагсаалт”-д орсонтой холбогдуулан Монголбанкны ерөнхийлөгч Н.Баяртсайхан, Санхүүгийн зохицуулах хорооны дарга С.Даваасүрэн нарыг ажлаас нь чөлөөлөх тухай саналыг УИХ-ын дарга Г.Занданшатар гаргасан. Уг асуудлыг Эдийн засгийн байнгын хороо хэлэлцэж, ажлаас чөлөөлөхийг хорооны гишүүд дэмжсэн билээ.

Эдийн засгийн байнгын хорооноос гаргасан саналыг УИХ-ын чуулганы нэгдсэн хуралдаанд оруулж, дээрх албан тушаалтнуудыг үүрэгт ажлаас нь чөлөөлөх асуудлыг эцэслэн шийдвэрлэх юм.

Энэ талаар УИХ дахь МАН-ын бүлгийн дарга Д.Тогтохсүрэн “Дараагийн Монгол банкны ерөнхийлөгч болон Санхүүгийн зохицуулах хорооны дарга хэн болох талаар одоогоор яригдаагүй байна. Хуулиараа өмнөх хүмүүс нь чөлөөлөгдсөн тохиолдолд дараагийн томилгоо яригддаг. Саарал жагсаалтын талаар ярих гэж байгаа учраас энэ хоёр хүнийг албан тушаалд нь байлгаж, энэ асуудлыг ярих хэрэгтэй гэсэн санал гаргасан юм. Тиймээс чөлөөлөх асуудлыг нь хойшлуулсан. Энэ долоо хоногт уг асуудал яригдана. Дараа нь бүлгээрээ хэлэлцэж шийдвэрлэнэ” гэв.