Хөдөлмөр, халамж үйлчилгээний ерөнхий газар (ХХҮЕГ)-ын удирдлагуудыг АТГ-аас хорих 461 дүгээр анид цагдан хорьж, шалгаж эхлээд байгаа. Тэднийг шалгах болсон үндэслэл нь ямар ч сонгон шалгаруулалтгүйгээр зарим компанид давуу байдал олгож, 200 хүртэлх сая төгрөгийг шилжүүлсэн гэх асуудал юм. ХХҮЕГ-ын дарга Б.Нямдаваа, дэд дарга Б.Шижиржаргал нар ийм хэрэгт холбогдсон бөгөөд тэднийг албан тушаалаас нь түдгэлзүүлж, Эрүүгийн хуулийн 22.1 дэх хэсэгт заасан “Нийтийн албан тушаалтан албан үүрэг, бүрэн эрх, албан тушаалын байдлаа урвуулан ашиглаж, эсхүл зориуд хэрэгжүүлэхгүй байж өөртөө, бусдад давуу байдал бий болгосон” гэх үндэслэлээр яллагдагчаар татаад байгаа ажээ. Зүй нь, Хөдөлмөр халамж үйлчилгээний ерөнхий газар энгийн иргэд, жижиг аж ахуйн нэгжүүдийн гарааны бизнесийг дэмжиж, тодорхой хэмжээний зээлийг хүүгүй олгох зориулалттай юм. Тиймдээ ч нэг төсөлд таван саяас 200 хүртэлх сая төгрөгт тооцож нийтдээ дөрвөн тэрбум төгрөгийг зээлээр олгох санхүүжилтийг шийдсэн байжээ.

Гэтэл ХХҮЕГ-ын удирдлагууд дээрх зээлийг олгохдоо зарим компанид давуу байдал үүсгэснээс гадна нэр бүхий УИХ-ын гишүүдийн болон тэдгээрийн хамаарал бүхий компанид олгосон нь асуудлын үүсгэж, АТГ-т шалгагдах шалтгаан болсон төдийгүй, замхарч байсан ЖДҮ-гийн үргэлжлэл болж гарч ирэх нь тэр. Ингэснээр ЖДҮ-2-ын асуудал төрийн ордонд сөхөгдөж, ЖДҮХС-гаас тэрбум тэрбумаар нь халаасалсан зарим төрийн түшээд барьцаа сулруулж, ажилгүй, орлогогүй энгийн иргэддээ очих байсан 200 хүртэлх сая төгрөгнөөс ичихгүйгээр хулгайлж эхэллээ гэсэн “бор шувуу” нисч эхлэв. Энэ асуудал олонд дэлгэгдэж, нууц задарваас байдал улам дордоно гэж үзэх хүмүүс ч байна.