“Эмэгтэйчүүд авлигын эсрэг” чуулган өнөөдөр /2019.11.28/ боллоо. Тус чуулганыг Монгол Улсын 21 аймагт салбар зөвлөлтэй “Либериал эмэгтэйчүүдийн оюуны сан” байгууллага болон Азийн сангийн тэтгэлгээр зохион байгуулав.

2016-2019 оны хооронд орон нутгийн худалдан авах ажиллагаа, тендерийн шударга байдал, сум хөгжүүлэх сангийн зээл олголт, төсвийн хөрөнгийн зарцуулалт болон төрийн зарим үйлчилгээний чанар хүртээмжийн асуудлаар нийт 80 гаруй асуудалд хяналт шалгалт хийж, өнөөдөр олон нийтэд нээлттэй хэлэлцүүллээ.

Чуулганд Монгол Улсад идэвхтэй үйл ажиллагаа явуулж буй 100 гаруй Иргэний нийгмийн байгууллагын төлөөлөл, улс төрийн намын дэргэдэх эмэгтэйчүүдийн байгууллагын төлөөлөл, “Либериал эмэгтэйчүүдийн оюуны сан”-гийн 21 аймаг дахь салбар зөвлөлийн гишүүд гээд 150 гаруй эмэгтэй оролцсон юм.

“Либериал эмэгтэйчүүдийн оюуны сан”-гийн тэргүүн Ц.Бүжидмаа: “Авлигатай тэмцэх үйл ажиллагаанд оролцох нь иргэн бүрийн үүрэг. Тэр дундаа эмэгтэйчүүд үүнд манлайлж оролцох хэрэгтэй гэдэг уриалгыг гаргаад ажиллаж байна. Олон орны туршлагаас харахад эмэгтэйчүүд авлигын эсрэг үйл ажиллагаанд идэвхтэй нэгдсэнээрээ тухайн оронд авлига буурсан тохиолдол маш их байдаг. Улс төрийн салбарт эмэгтэйчүүд олноор гарснаар авлигыг бууруулж чадсан тохиолдол цөөнгүй бий. Тийм учраас монгол эмэгтэйчүүд өөрсдийнхөө үүргийг ухамсарлан Монгол Улсад бий болоод буй авлигатай тэмцэхэд нийгмийг манлайлах хэрэгтэй байна. Манай байгууллагын зүгээс дөрвөн жилийн хугацаанд “Авлигагүй нийгмийн төлөө иргэдийн оролцоо” төслийг хэрэгжүүллээ. Энэ төслийн хүрээнд орон нутгийн тендер худалдан авах ажиллагаа, өндөр дүнтэй бүтээн байгуулалтын ажилд хяналт шалгалт хийсэн. Үр дүнд нь аймаг орон нутагт хэлэлцүүлгийг хийж, шийдвэр гаргах түвшинд зөвлөмжүүдийг хүргэж ажилласан байна. Энэ бол эмэгтэйчүүдийн дуу хоолой нийгэмд хүрч буйн тод жишээ юм” гэв.

Түүнчлэн чуулганаас гарсан санал, зөвлөмжийг холбогдох байгууллагуудад хүргүүлэх бөгөөд авлигыг бууруулах, урьдчилан сэргийлэхэд хэрхэн хамтран ажиллах талаар санал солилцож, үүний эсрэг дуу хоолойгоо өргөнө гэдгээ онцоллоо.