НИТХ-аар авто зам ашигласны төлбөрийн хувь хэмжээг тав дахин нэмэгдүүлэхээр шинэчлэн баталж, хотын даргад хэрэгжүүлэх үүрэг чиглэл өгсөн. Нийслэлийн авто зам ашигласны төлбөрийн хувь хэмжээг нэмэгдүүлснээр өмнө нь жилд 14 тэрбум төгрөг улсын төсөвт цугладаг байсан бол ирэх онд 74 тэрбумыг төвлөрүүлэх боломжтой гэж үзэж байгаа аж. Энэ нь эргээд жолооч нарын зорчиж байгаа замыг засахад зарцуулагдана гэж албаны хүмүүс нь тайлбарлаж байна.

Авто зам ашигласны нэмэгдэл төлбөрийг 2020 оны нэгдүгээр сарын 1-нээс авч эхэлнэ. Тухайн автомашины хөдөлгүүрийнх нь багтаамжаас хамаараад төлбөрийн хэмжээ өөр өөр байх юм байна.Харин иргэдийн хувьд авто зам ашигласны төлбөрийн хувь хэмжээг тав дахин нэмэгдүүлсэн асуудлыг эсэргүүцэж байгаа. Тухайлбал,20 мянган төгрөгийн татвар төлж байсан жолооч 100 мянган төгрөг болчихоор нь приусээ зараад автобус сонгох уу, 80 мянган төгрөгийн татвар төлж байсан жийптэй хүн 250 мянган болчихлоор нь жийпээ зараад приус авах уу гэдэг асуудлыг ярьж байна.

АВТО ЗАМ АШИГЛАСНЫ ТӨЛБӨРИЙН ХУВЬ ХЭМЖЭЭГ ТАВ ДАХИН НЭМЭГДҮҮЛЖ БАЙГАА НЬ ХУУЛЬ БУС ҮЙЛДЭЛ

С.Орхонбаяр “МАН 2016 оны сонгуульд нэр дэвшиж өрсөлдөж байхдаа татвар нэмнэ гэдэг асуудлыг хэлж байгаагүй. Ард түмнээ аз жаргалтай болгоно гэж амлаж байсан. Одоо хэлж ярьсан зүйлүүд нь бүгд эсрэгээр эргэж байна. НИТХ-ын дарга Р.Дагва хоёр хоногийн өмнө мэдээлэл хийхдээ “Сардаа найман мянга, жилдээ 100 мянган төгрөг өгөхөд болохгүй зүйл байхгүй. Энэ мөнгөөр зам тавина” гэж хэлж байсан. Өнөөдөр мөнгөгүй хүмүүс зөндөө байгаа” гэв.

Ё.Баттогтох “Татварыг нэмэхгүйгээр бууруулах хэрэгтэй. Учир нь долоо хоногийн нэг өдөр авто машины дугаарын хязгаарлалт үйлчилж байгаа. Энэ нь бидний зорчих эрхийг хязгаарлаж байна. Дээрээс нь авто зам ашигласны төлбөрийн хувь хэмжээг тав дахин нэмэгдүүлж байгаа нь хууль бус үйлдэл” гэлээ.

АВТО ЗАМ МӨНГӨ УГААХ АВЛИГЫН СҮЛЖЭЭ БОЛЧИХСОН

МАХН-ын дэд дарга Ц.Оюунбаатараасавто зам ашигласны төлбөрийн хувь хэмжээг тав дахин нэмэгдүүлсэн болон бусад асуудлаар тодруулга авлаа.

-НИТХ-аас гарсан шийдвэрийг ард иргэднэлээд эсэргүүцэж байгаа. Энэ эсэргүүцэл амжилт олох болов уу?

-Биднийг зүгээс эсэргүүцлийг санаачилж байгаа. Авто зам ашигласны төлбөрийн хувь хэмжээг тав дахин нэмэгдүүлснийг Нийслэлийн бүх иргэд эсэргүүцэж байна. Төр засгийн дарангуйлал дангаараа ноёрхсон цөөн хэдэн авлигачид луйварчдын явуулж байгаа хууль бус тогтоолыг өөрчилж хүчингүй болгох хэрэгтэй. Энэ НИТХ-ын тогтоолыг Захиргааны хэргийн шүүхээр хүчингүй болгоно. Би Аюулгүй байдал, гадаад бодлогын байнгын хорооны даргаар ажиллаж байхдаа Нийслэлийн замын асуудлаар 500 орчим сая ам.долларыг гаднаас оруулж ирж байсан. Өнгөрсөн жилүүдэд авто замын хөрөнгө оруулалтыг хангалттай хийсэн. Өнөөдөр замын хөрөнгө мөнгө дутагдаагүй. Жил бүр хэдэн зуун тэрбумаар боршуур сольж байгаа. Энэ бол зөвхөн бизнесээ хийх гэж л сольж буй хэлбэр. Замыг нөхөж янзлах ажлыг хоёр гурван компанид хувааж өгдөг. Авто зам мөнгө угаах авлигын том сүлжээ болчихсон.

-Холбогдох дарга нар нь Нийслэлийн төсөв хүрэлцэхгүй байгаа учраас ард түмнээсээ босгож байгаа гэдгийг хэлж байсан?

-Монгол Улсын төсвийг 60 тэрбумаар нэмэгдүүлэхийг Засгийн газраас өгсөн учраас ард иргэдээс авч байна гэж ярьж байсан. Өдрийнхөө хоолыг олох гэж байгаа хүмүүсийг шулж мөлжих замаар төсвийг бүрдүүл гэж Засгийн газар чиглэл өгөөгүй байх гэж найдаж байна. Хэрэв Засгийн газраас ийм чиглэл өгсөн бол энэ нь хууль бус үйлдэл. Энэ шийдвэрийг нэн даруй цуцлах хэрэгтэй.Өнөөдөр өр зээлгүй хүн байхгүй байгаа. Иймээс энэ хууль бус татвар хуурамжийг бүгд эсэргүүцэх хэрэгтэй.

-Захиргааны хэргийн шүүхэд хэзээ хандах вэ?

-Томоохон цуглаан зохион байгуулсны дараа хандана.

-Та авлигачид луйварчид гээд байна. Та Шадар сайд байхдаа авлигын хэрэгт холбогдож байсан. Энэ хэрэг юу болсон вэ?

-Авлигатай тэмцэх газраас асуу. Би ямар ч хэрэгт холбогдоогүй. “Тэмээн поло” тэмцээнийг 150 сая төгрөгөөр хийгээд С.Ламбаа сайд тушаалаа гаргаж зардлыг өгчихсөн. Би хэвлэл мэдээллийн хэрэгслээр чаддаг юм бол намайг шийтгэ гэдгээ хэлчихсэн байгаа.

-Тэгэхээр энэ хэрэг хэрэгсэхгүй болчихсон юм уу?

-Хэрэг байхгүй. Тасалгаанд чөтгөр байхгүй тохиолдол чөтгөр барина гэж байхгүй шүү дээ.

-Танай намын гишүүн З.Баянсэлэнгэд холбогдох хэргийг тусгаарлаж цагдан хорьсон байгаа. Та энэ асуудал ямар байр суурьтай байна вэ?

-Цагдан хорьсон асуудал улс төрийн даалгавраар хийгдсэн. З.Баянсэлэнгэ Засгийн газрын 298 дугаар тогтоолоор “Бэрэн” компаниас 223 айлын орон сууцыг 15 тэрбум төгрөгөөр ав гээд үүрэг өгчихсөн.Энэ тогтоолыг хэрэгжүүлэхдээ албан тушаалаа хэтрүүлж, тогтоолын зүйл заалтыг зөрчсөн үйлдэл хийж үү гэдгийг харах хэрэгтэй. Улс төрийн хэлмэгдэл явуулж, зохиомол хэрэг үүсгэж байна. Ардчилсан төрд ийм зүйл байж болохгүй.