Шинэчлэн баталсан дүнгээр автомашин эзэмшигчдийн төлдөг байсан төлбөр хамгийн багадаа тав дахин нэмэгдсэн. Тухайлбал, 2000 см3 хүртэл багтаамжтай тээврийн хэрэгсэл, үүний хамгийн гол төлөөлөл болох приүс автомашин эзэмшигч 2019 онд авто зам ашигласан хэмээн 20 мянган төгрөг төлдөг байсан бол ирэх онд 100 мянган төгрөг төлнө. Ийнхүү төлбөрийг тав дахин нэмснээр 2020 онд авто зам ашигласны төлбөрөөс төсөвт 73 тэрбум 579 сая 715 мянган төгрөг төвлөрүүлэхээр тооцоод байгаа аж. 2019 онд энэ тоо 12 сая 795 сая 600 мянган төгрөг буюу даруй 60 тэрбум төгрөгөөр нэмэгдэх юм. Нийслэлийн авто зам ашигласны төлбөрийн хувь хэмжээг нэмэгдүүлснээр эргээд бидний зорчиж байгаа замыг засахад зарцуулагдана гэдгийг албаныхан тайлбарлаад байгаа.

Эл шийдвэрийг иргэд эсэргүүцэн автомашинтай жагсаалыг Сүхбаатарын талбайд буюу Нийслэлийн “Хангарьд” ордны үүдэнд хийж байгаа. Жагсагчдын төлөөлөл “Өнөөдөр энд мянган машинтай иргэд ирсэн. Хэрэв бидний шаардлагыг хүлээж авахгүй бол 10 мянган машин ирэх болно. Аз жаргалтай хот болгоно гэчихээд ард түмнийхээ идэх хоолноос нь хумслан өөрсдөө аз жаргалтай амьдарч, иргэдээ аз жаргалгүй болгож байна. НИТХ-ын 22 гишүүн өнөөдрийн цуглааныг Хангарди ордноосоо харж байгаа байх. Хэн нэгэн төлөөлөгчөө биш Нийслэлийн Засаг дарга С.Амарсайхан өөрөө гарч ирээд бидэнтэй уулзаач гэж шаардаж байна” гэсэн. Тэд уг жагсаалаа энэ долоо хоногийг дуустал буюу арванхоёрдугаар сарын 15-ны ням гараг хүртэл хийнэ гэж мэдэгдсэн. Машинтай жагсагчдын автомашиныг ачихаар ачилтын машинууд ирээд байгаа.

Автомашинтай жагсаал болж буйг Монгол Улсын Ерөнхий сайд У.Хүрэлсүх хараад Улаанбаатар хотын Засаг дарга бөгөөд Нийслэлийн захирагч С.Амарсайханыг дуудаж уулзан “Автомашины татвар нэмэх болсон асуудлаа эргэж харах хэрэгтэй” хэмээн тушаасан байна. Харин яг одоогийн байдлаар НИТХ-ын төлөөлөгчид болон хотын удирдлагууд жагсагчдын шаардлагыг одоо болтол хүлээж аваагүй байна манай сурвалжлагч газар дээрээс мэдээлсэн юм.