Нийслэлийн прокурорын газраас хаана, хэнд хаягласан нь мэдэгдэхгүй, нэгэн хачирхалтай учир битүүлэг мэдэгдлийг өчигдөр гаргажээ. Хуучны До яамны “ногоон малгайтны” аймшигт хар дарсан зүүд шиг тэр улирсан баларсан үе эргэн ирэв үү ч гэж бодохоос хэн хүний толгойтой үс өрвөсхийн босмоор санагдаж байна. Нийслэлийн прокурорын газрын логотой мөнөөх мэдэгдэл “анхааралтай ажиглаж байна” ч гэх шиг цаанаа л нэг сэжиг бүхий утга агуулгатай ажээ. Жорж Оруэлийн “1984” романд л нийгмийн үл үзэгдэх дарангуйллын тогтолцоог ийм нэг бараан дүнсгэр, айдас хүрмээр байдлаар дүрсэлсэн байдаг даа. “Анхааралтай ажиглаж байна” гэхээр далдаас хардаг бурхны ч юм уу, бугийн ч юм уу нүд маягийн юм төсөөлөгдөөд нуруугаар жихүү оргиод болдоггүй ээ. Тэрхүү мэдэгдлийг үг, үсэг гээлгүйгээр түмэн олондоо толилуулахаар сийрүүллээ.

“Мэдэгдэл” гэсэн сүржин толгой гарчигтай мөнөөхөн албан бичигт “Сүүлийн үед хэвлэл мэдээллийн хэрэгсэл болон сошиал сүлжээгээр “Прокурорын байгууллага, прокурорыг бусдын нөлөөнд автаж хүнийг хорьдог” гэсэн утга агуулга бүхий илтэд ор үндэсгүйхудал мэдээллийг зохион байгуулалттайгаар иргэд, олон нийтэд тарааж буйг Нийслэлийн прокурорын газраас анхааралтай ажиглаж байна.

Прокурорын байгууллага нь аливаа үйл ажиллагааг явуулахдаа хэн нэгний нөлөөнд автахгүй, хараат бусаар, хуулийн хүрээнд үйл ажиллагаа явуулдаг болно.

Цаашид дээрх мэдээллийг дахин давтан гаргасан тохиолдолд хуульд заасан зохих арга хэмжээ авах болохыг мэдэгдье!

НИЙСЛЭЛИЙН ПРОКУРОРЫН ГАЗАР” гэжээ.

Монгол Улсын хэмжээнд хууль ёсоор үйл ажиллагаа эрхэлж буй хэвлэл мэдээллийн хэрэгсэл олон бий. Сошиал гэж буй сүлжээ бол үй түм. Нийслэлийн прокурорын газраас чухам ямар нэртэй хэвлэл мэдээллийн хэрэгсэл, сошиалсүлжээг аймшигтай “анхааралтай ажиглаж байна” вэ? Энэ л ёстой таагдашгүй оньсого шиг тархи толгойг эргүүлж байна. Хэвлэл мэдээллийн хэрэгсэл гэж чухам юуг хэлнэ вэ. Монгол Улсад миний мэдэхээр мянга гаруй сонин, зуу гаруй телевиз, хоёр гурван зуун радио долгион бий. “Нэг үхрийн эвэр доргиход мянган үхрийн эвэр доргидог” гэсэн үгтэй. Үүнийг төрийн нэрийн өмнөөс ялын тогтоол уншдаг Нийслэлээр овоглосон тус газрынхан мэддэг байлтай. Юуны учир ийн учир битүүлэг мэдэгдлийг нийгэмд хаяггүй шиднэ вэ.

Чухамдаа прокурорын байгууллага, прокуроруудыг дээрх мэдэгдэлд өгүүлсэнээр “бусдын нөлөөнд автаж хүнийг хорьдог” гэж үнэхээр гүтгэж гүжирдсэн ямар нэгэн хэвлэл байгаа бол яагаад тодорхой нэр хаяг заан мэдэгдэлгүй, хэвлэлийн салбарын олон мянган ажилтан биднийг давхар ингэж хилсээр хэлмэгдүүлэн бэмбэгнүүлнэ вэ. Хэвлэл мэдээллийг дөрөвдэх засаглал гэдэг ч өнөөгийн хууль прокурорын байгууллага эрх чөлөөнд нь ноцтойгоор халдаж, амыг нь барих гэсэн нэг л явуургүй арга бус уу, наад айлган сүрдүүлэлт чинь. Чухам ямар хэвлэл, хэзээ Нийслэлийн прокуроруудыг “бусдын нөлөөнд автан хүн хорьсон” гэж бичиж, нэвтрүүлсэн билээ. “Зүүдээ ярих гээд хулгайгаа ярилаа” гэгчээр хэвлэл мэдээллийнхнийг арай л нийтээр нь хомроголон хамруулнам биш үү? Үнэхээр тийм буруутай этгээд байваас үйл явдлыг нийгэмд тодорхой ойлгомжтой байдлаар илэрхийлж болохгүй байсан гэж үү?

Энэ мэтийн маш олон асуултыг дээрх мэдэгдэл чинь төрүүлж байна. Прокурор ч бай, сэтгүүлч ч бай өнөөдөр бүгд гэм буруугүй л бол адил тэгш эрхтэй чөлөөт ардчилсан нийгэмд амар амгалан аж төрцгөөж байна. Юунд ингэж “дайны үеийн байдалд орсон” адил хардлага сэрдлэгийн ясыг нийгэмд хаяж өгнө вэ. Прокурорын байгууллага гэдэг бол маш их хариуцлага үүргийг ард түмнийхээ өмнө хүлээсэн, төрдөө тангараг өргөсөн, хуулиа дээдлэн сахьдаг, мэргэжлийн өндөр түвшний субьект гэж ойлгогддог. Монголын ард түмэн үүний хариуг нэхэх эрхтэй гэж бодож байна. Төрийн нэрээр төмөр нүүр гаргахаа илэрхийлж хэвлэл мэдээллийн салбарыг нэлэнхүйд нь “амыг нь барихаар” эртнээс хаяагаа манаж ийм мэдэгдэл гаргаагүй байгаа гэх хардлага хандлага ч төрж байна. Төр түмэн нүдтэй гэдэг. Төрийн түмэн нүдний нэг прокурор чухам хэнийг “анхааралтай ажиглаж байна” вэ. Тэгвэл төрийн нүд, чихийг бүр ч анхааралтай ажиглаж байгаа түмэн олноо прокурор та бүхэн чухам яахаар ажиглаж байна вэ?

“Гурил хулгайлсан хүний гуя нь цагаан” гэгчээр хэн нэгний нөлөөгөөр хэн нэгнийг барьж хорьсон чинь илэрчих гээд ийм сүржин утгатай даржин мэдэгдэл гаргаад эхлэв үү гэж ард түмэн чинь та нараас асууж байна, Нийслэлийн прокурорын газрынхаан!

2020 оны нэгдүгээр сарын 16-ны өдрөөр огноолсон мэдэгдлийг танай байгууллага чухам ямар хэргийн учир гаргаснаа хууль ёсны дагуу, баримттайгаар, хараат бусаар, хуулийн хүрээнд мэдэгдэхийг АРД ТҮМЭН чинь хүсэж байна. Төр түмэн нүдтэй ч түмэн олон түүнээс олон мэлмийтэй шүү. “Хэн нэгний нөлөөнд автаж” гэм зэмгүй “хүнийг хоривол” ард түмэн та нарыг “АНХААРАЛТАЙ АЖИГЛАЖ БАЙГАА”шүү!